طالت هواجسي وانا أقول ياليل
****** متى على الله ينبلج لي نهـــارك
وما لي على جر السوالف معاليل
****** والهم ما بين الضلوع يتعــــارك
كن السهر جمرٍ وجفني معاميل
******* وفنجالها بين الكفوف يتفــارك
العمر يمضي والنوايا محاصيل
*** ** ويا زارع المعروف زرعك تبارك
هذي هي الدنيا نزول ومراحيل
****** ** مسكين ياللي تحسبنها قرارك
..........
صائم...
الصوم عن بعض السوالف غنيمه
واللي ضمى من ظيم لايام يفطر
ما ضر راعي الحق كذب ونميمه
تمايزت بين الخطى خطوة الغدر
زلة عدو(ن) قدم وجهك حشيمه
ولا رفيقٍ في القفى يبطن الشر
نوح الحمائم في ضميري مقيمه
وأطلقتها والليل في تالي الفجر
تسابقت تنسج من الشعر غيمه
كنها تقول الحال ما يقبل العذر
عبود القحطاني..