[ضوء خافت]

لا إله إلا الله محمد رسول الله ...

و ألف من ذكره يا ناس ... و صلوا سلموا عليه ...

شطلبت آنا ؟!


أسافر ؟

أجرمت ؟

طيب بهاجر ...

بترك البيت لكم ... بس ما عندي تذكرة ... و لا حجز حاضر !

ودّوني البر ... ودي أخيم ... يم جسر جابر ...

حجروني هناك ...

بالهواء الطلق ... كل اللي أبيه كاميرتي و جنطة هواياتي ...

و تامر يتكفل بباقي احتياجاتي ...

أكل و شرب و دوا ...

بس ديروا بالكم على نباتاتي ...

خصوصا المونستيرا ... دلوعتي الحساسة ...

نادوها نفسي ( ماماتي ) ...

ما تتطلب مثلي ... بس لا تزعجوها

عادي و انتو تسقونها قولولها : شلونك يا حياتي !


أحبها و تحبني ... لا تخلوني أحاتي ...

هااا ... لا بس هونت ...


مابي أسافر ...

و لا بخيم عند جسر جابر ...

و لا بطلب شي من تامر ...

برجع غرفتي ...

أكمل رسمتي ...

و انطر القمر ...

يمكن ينور باجر ...

أو عقب باجر ...

أو عقب عقب عقب ما يرجع ... نسافر