حوار بين مواطن مسلم ومواطن مسيحي في فرنة العيش أبو " شلن "
صباح يوم عادي جداً في مصر .. الست أم أحمد واخده " الكزروله " خاصتها ومتجهه إلى عم أشرف بتاع " الفول " .. وبعد ذلك فكرت " إيه اللي ناقص للفطار " واستردت قائلة .. " أيوه العيش " .. شاهدت الفرنة من بعيد " لحم على بعضه " .. قالت في نفسها " استعنا بالله " .. سألت أحدى السيدات المنتظرات " مين الأخيرة يا ختي " .. قالت لها " أنا " .. قالت " طب أنا اللي بعديكي " .. ووقفوا جميعاً " يبحلقون " في بعضهم البعض و " يتصعبون " .. ثم شد انتباههم حوار دائر في طابور " الرجالة " بين عم إسماعيل وعم زكريا .. كان عم إسماعيل يسأل عم أحمد عما سوف يعطيه صوته .. فرد عم إسماعيل طبعا الأخوان وعلى فكرة رمزهم الميزان عشان محدش يغشك ..
فتدخل عم زكريا وقال : كمان الكتلة المصرية برنامجها حلو أوي
فرد عم إسماعيل : بتاعة سويرس .!
المقدس : دي بتاعة ناس كتير مش هو لوحده .. حتى فيها مسلمين كمان
عم إسماعيل : برضه بتاعته
المقدس : طب وأيه اللي مخوفك منه يا عم إسماعيل ده فاتح بيوت ناس كتيره مسلمين
عم إسماعيل : ولو ده أساء للرسول ينفع كده .!
المقدس : هو ماكنش قاصد وبعدين أعتذر
عم إسماعيل : ده مش ساكت والظاهر أن دماغه تعباه
ضحك الجميع
فتدخل عم أحمد وقال : أنت عارف يا حج إسماعيل لو حكمنا مسيحي دي تبقى وحشه في حقنا أوي .. أحنا أغلبية والكلام ده مايزعلكش يا مقدس يعني دا بيقولك كان عايز يلغي المادة التانية من الدستور وعايزنا نروح نصوتله كمان . وبعدين بقه خد عندك موضة البناطيل الضيقة هتغرق الدنيا أكتر ماهي غرقانه .. ووقتها مش هتعرف المسلمة من المسيحية .. وكل اللي لابسه تحجيبه تقلعها ماحنا هنبقى بلد حرية زي امريكا .. والاذان هيتمنع .. وايام العيد الكبير والصغير مش بعيد يخلوها شغل عادي ورمضان ممكن يقولك ممنوع تفرشوا في الشارع في التراويح وخد بقه ممكن كمان يمنعوا بناء المساجد زي ما كان الفقري مبارك بيعمل .. يا عم ماينفعش بقولك احنا بلد كلها مسلمين يعني أغلبية .
فرد المقدس بسرعة يعني زي ما انتم خايفين أوي كده من المسيحيين أحنا كمان خايفين من الإخوان ومش عارفين هيعملوا فينا ايه طب دانا سمعت ان بناتنا وقتها لازم يغطوا شعرهم وممكن يهدوا الكنايس بتاعتنا وبعدين التلفزيون بيقولك هيخلوه كله قرآن .. حتى المتحف بيقولك هيلبسوا التماثيل أشاربات واي حد هيسرق سواء مسلم ولا مسيحي هيقطعوا ايده .. وبيقولك بعد الساعه 9 محدش من الستات ينزل الشارع .. ولازم أي وحدة خارجة يكون معاها محرم .. طب احنا نعمل ايه ياناس .. والاغاني هيمنعوها من السوق حتى السيم هيقفلوها .. وبعدين السياحة هتقف والاجانب طبعا بيشربوا خمره ده هيتمنع يعني هنشحت .. وممكن كمان يفرضوا علينا الجزية زي زمان .. يا ناس والله داحنا صحاب البلد دي من الأول خالص ودلوقتي بقينا زي الضيوف عليها ..
و انتهى الحوار لغاية كده لان الباقي كان ضرب نار
الشاهد في الموضوع
أن هناك تخوفات كثيرة من قبل الطرفين لأن الصراحة منعدمة والرؤية ضبابية مع الأسف
توقعنا أن الثورة سوف تبدد الظلام وتكشف كل الأمور على حقيقتها ولكن مع الأسف مازال الظلام دامس وكل واحد فيهم محتفظ بأجندته وعايز يخليها مفاجاءة للتاني
فوتكم بعافية