طاح السكوت فْـ ضجيج المدينة واحتضنْه الشعور
وقاد المساري هواجيس ما دلّت طريق النجاة
ذكرى تمدّ الوجع للمسافة ، والسّهر ما يبور
خاوى عيون الورق من رعد حزن فْـ ضمير الشتات
صوتٍ نزف من لسان الصبا لوّن شهاب السرور
لمّيته الشاعر اللي وهم كبره…يزفّ أمْنيات !
طفلٍ ترنّح على سكّة آماله بـ صوتٍ جهور !
سارق منَ الْقابلة ضحكِه،وذبّ الطفش بالحصاة
ما للهرب يا مجاهيم نسيان التفاصيل "نور !
لو حرّك اليأس غصن الأمل، تبتر يديه أغْنيات
مثل الخطاوي على صفحة الأحلام مرّت عثور !
مرّت سنين العمر واقفه؛ ترمي العذر للجهات !
رحلة كَسِر حلمها " هقوة الفكرة بـ دهشة سطور"
وراسي يهلّ الخيال بْـ سحر يحيي على القفْر/ذات
كفّ الندم تخنقه بالشّعر لكن يغوص البحور !
إنسان صدره: حنينٍ ركض، يبكي لـ غالي ومات !
يا صاحبي ما جفيت الحبر لكن جفيت الظهور
يوم الليالي نفض بالها ريحٍ تهدّ الثبات !
على أراضي القدر كلمة البارح صداها يدور
قفّت قلوب الاوادم ! وأنا، شلْت المواجع رفات
أرض البلد حسّت بْـ خاطرٍ ماستوعبته الصدور
ليه أحتطب ضلع "ناسي؟ وأنا موقِد فـ جوفي سكات !
الأجوبة ترتجف لا سأل جرحي -غياب الحضور-!!!
وين أرتحل؟ والصّبر دمعته: صرخة فـ وجه الحياة !
طفلٍ يحسب العمر تنتهي شمسه بـ وسط القبور !
لكن كبر وانصدم بالعمر ! كيف انتهى ذكريات ؟؟؟