إذا شفتك
إنت ماتدري وش تسوي بي اللحظات لاشفتك ..!
وغلاوة قدرك العالي .. تبعثرني .
تمرجحني على موجة عذوبة
آه ياموج العذوبه في عيونك ..
كيف يسحرني .
وش تبي .. ما فيني أنظم هالشعور ..
إسمع بلا وزن وقوافي عاشقك ..
وإتخيل إحساسه إذا ما جيت تغمرني .
إذا شفتك .
***
أذكرك والصبح يلعب في تضاريسي ..
وأحاسيسي بصوتك ساحل طربان .
وأذكر إحساس الجهات ..
وقصة الشمس الخجولة
وإرتعاشات المكان .
وأذكر أوصافك على لون الشفق ..
والعطر الأبيض لا تباهى وضيّع الألوان .
تاريخ إنت ، من السهر ..
مني ، ومن حلم قديم يصيح بي ..
ومن صفوة الإنسان .
إنت المسرة ، ياحريري المعاني ..
لا حكيت أنسى ..
وأجيك من إنكسارات الحزن.. طربان .
أتوحدك ..
وأهمس أبيك وألتفت ..
لا تسمع الجدران .
وش تبي .. مافيني أنظم هالشعور ..
إسمع بلا وزن وقوافي عاشقك ..
وإتخيل إحساسه إذا ما جيت تغمرني .
إذا شفتك .
**
تركتك من شوي ،
لكن راجع وكلي أغاني ..
وجيت شاعر محتفل .
اليوم قانون جديد من القصيد ..
اليوم لا ناديت بإسمك ..
طاح من عرشه زحل .
يا أقرب من النبضات ..
ياجار الوريد ..
خل إندهاشك والذهول ..
وإسمع طلال اللي يقول ..
(حبك سباني وأنا جسمي نحل ) .
والله نحل ..
ماعاد أبي إلا أنت ..
دوّر لي على كوكب غرامك ..
يابعد عمري ..
محل .
الناس .. ما أبيهم ..
شبعت الناس ..
صدرك وين يا أغلى الناس ..
أبا جنيه العسل .
وش تبي .. مافيني أنظم هالشعور ..
إسمع بلا وزن وقوافي عاشقك ..
وإتخيل إحساسه إذا ما جيت تغمرني .
إذا شفتك .