ودي أكتب لك وصية
يا بعد عمري " يزيد "
استمع يا وليدي قولي
واحفظه مني ... وعيد
من أبوك اللي يحبك
ويلثم الخطوة بدربك
لا بكيت ... يزيد حبك
أو ضحكت ... يزيد حبك
استمع يا أجمل هدية
من غلا حبك ... وخوفي
رحت أكتب لك وصية
كان ودك يا" يزيد"
تزرع الدنيا ورود
وتجعل الأيام عيد
انسف وعودك ... وراوغ
وخلي ميثاقك منافق
لا سهرت الليل ... نافق
أو صحيت الصبح نافق
أو مشيت بدرب .... نافق
خلي ميثاقك منافق
ابتسم
اكذب
.... ونافق
إيه راوغ
إيه نافق
كثر ما تقدر تراوغ
وفوق ما تقدر تنافق
والمُثُل لو يوم جتك
حطها يا وليدي تحتك
دوسها بأقذر نعولك
وارمها ... براً... بعيد
وارجع وكلك تحدي
لا تخاف ... ولا تهدي
ابتسم
اكذب
..... ونافق
عالمك... عالم سخيف
مجرم إقطاعي مخيف
والعفاف اللي نعرفه
لص ... إرهابي ... عنيف
والأمين ابن الأمين
سافل وكلب ولعين
والــحــرامــي به عريف
والقذر ... جداً نظيف
وكان ودك يا "يزيد"
تصبح مواطن شريف
خلك اسرق
ثم اسرق
ثم اسرق
ثم اسرق
ثم اسرق
دوووم اسرق
كثر ما تسرق
تراك تصير يا وليدي نظيف
وتعتلي كرسي الوزارة
والشوارع ترتجي لك
والشوارب تنحني لك
والصحافة تفتخر بك
والمنابر تحتفل بك
والسحاب .... أيضا يحبك
والشعر فيك يتبارى
شوف يا وليدي اش سوّى
بالبشر كرسي الوزارة
وممكن إنك يا " يزيد"
ترتفع فوق السحاب
ويصبح الشارع نعولك
والصحافة.... تدور حولك
والشوارب ....
ترجى إحسانك ونولك
والمنابر من بهاك
تمشي ... وتغني وراك
واللحى وأهل الفتاوي
حلمها ... واكبر مناها
تلثم بلهفة خطاك
وممكن إنك يا " يزيد"
الزمان يشيلك أكثر
فوق أكثر
أكثر ... وأكثر ... وأكثر يا أمير
وتصبح أهدافك عظيمة
وأتفه أحلامك وزير
وإن تعثرت بزمانك
وأنت يا وليدي حــرامــي
مجرم إقطاعي نظامي
لا تخاف إنك تطير
من مكانك
أو تصيــــــــر
شي تافه ... ماله قيمة
وترجع مواطن حقير
لا تخاف ... ولا تضيق
راح تطرد يا حبيبي
منفي للخارج .... سفير