السلام عليكم ورحمة الله وبركاته
مصافحه اولى وأتمنى أن ترتقي لذائقتكم الجميله
هنا عبث
فينا الوجع
وش عاد لو صحّا الحنين
والنور للمصباح انين
مدري سواليف المسا
والا النسا
بس الأكيد انه نسا
يا احلامي المستورده
ضاقت خيوط الأورده
ماعادت اوراقي تحن .. لحبرها والمحبره
وماعادت اكسوري تئن .. وكسرها من يجبره
يا ابياتي المتفرده
يمكن عبث .. والا عبث .. بس الأكيد انه عبث
خل التعب
ليه التعب
ليه الصخب
ماللمشاريه اوفيا
خل التناهيت اوف يا
صوت الوجع في داخلي
الفكر ماعدا خلي
هاتك طرب
يامتعب اقدام الشعور
باحساس كاسيه الفتور
هات الأماني .. للمواني .. للسحب
خل العتب
ياأعذب الحاني تعب
ياجنة اشجاني تعب
ليه العتب؟
انا جفيت المحبره
والشعر الغاوي تعب
الطيش مايستنكره
يستلطفه !
يستعذبه !
تعالوا اقروا دفتره
قبل العتب
وبعد العتب
هذا وهم
يا أعذب احساسي وهم
الأسئله ضيقه وهم
والأجوبه تصرخ نعم
على ضفاف الشوق يا احباب القسى
طاغي اسى
عل وعسى
يطيح كحل الليل يتبلور مسا للحالمين
لكّن مين اللي درى بالحال مين ؟
انا شتات العاصفه
يا اوجاعي المتحالفه
عبث.. والحلم يرسم بدر ويضّوي سما الديجور
هتك ستر التغافل وانكسر بعيون حراسه
توشحت البياض ورحت الم الدر والبلور
مسافاتي وجع وخطاه يم اخطاي حساسه
تباطانا الفجر واغتال حلم الخاطر المكسور
وتجلت ساعة الصبح الأكيد ودقت اجراسه
كفيف الشوف مايغريه صبحه وانبلاج النور
وشوك الورد مايستلطف لكفين غرّاسه
تعب.. يا المركب الراسي بضفة بحره المسجور
مجاديفك ورق .. والبحر صعب .. وموغلٍـ باسه
مادام ان الأماني مالها بارض الحقيقه دور
على ايش استجدي انجوم السما واتأمل اقواسه
ضحك حزني على الحلم الغريب ووجهه المغرور
يشوف ان العتيم اشراق وان الغربه الماسه
ظلال التجربه ترسم على نهج المجرب سور
دلايلها وضوح .. وفكر .. واستنتاج .. ودراسه
عتب.. يا احساسي الغافي على صدر الليال البور
قساوسة الرضى ماتو قبل تقديم قداسه
بياض الشاش والا القطن والا معطف الدكتور
ماتعطي للعليل الروح اذا ودعته انفاسه
ترى بيض النوايا ماتشف الخافي المستور
نقايضها النوايا السود للنيات عساسه
ياحلمي : ليت مالك في الوجود الا شهادة زور
تدونها على صدر الأمل وتصك كراسه
وانا بعيش بك غصه مابين الحلق والحنجور
وصوتٍ يرتفع بك بخنقه واحاول اخراسه
وهم .. ماكل طيف يمر بعيون المنام شعور
يتوه النور في وجه الحزين ويسقط احساسه
محمد السويحي