[سعيد الموسى]

مرّت صدري
مثل العِطرْ !
تحمل وردْ
_ وقطعة نَردْ !
قالت : نركض ؟
صدرك أعرَض ؟
قلت أرمي سِنّار
النّردْ !
خمسه
أربع
ستّه - واحد !
قالت : عِندي !
" حظّي وردي "
ياويلك : بسأل
تأويلك !
قلت : اللي ودّك
يضوي لك !
قالت : قلّي كنت تحب ؟
قلت : أنصّب !
وكنت أنشّب !
كنت أتمزق
أغرب وأشرق !
كنت أضوي من صدري
ليل !
أعطي :
حتّى أنهدّ الحيل !
أذبح في كلْ ليله : خيل !
قالت : خيل ؟
وقلت : الليل !
أقطع كل دروب الميل - أصنع من كلمه أنجيل ..
قالت : ويلك هيّا استغفر !
قلت الله يعلم " مايُذكر "
ماهو كل أنجيل محرّف ؟
حتى حكيي " صار مزيّف "
قالت : ظنّ ؟
الله يالحزن !
قلت الظن _ وظن بفنّ !
قالت : دورك
أرم النرد !
واحد
اربع
خمسه
ستّه !
قولي لي :
وشهو التأويل ؟
قالت تحتاج لتحليل !
أنّك تدرك - هذا الكمّ !
بس ماتقدر تحسب
كَمّ !
أنك تشعر - في هالهمّ !
بسّ تخونك ..
رجفة فمّ ..
أنك أوعى .. لكن تعيا ..
أنك .. يعني
كيف أشرح لك ؟
إنك طفل - وتسبق سنّك !
وأن أفكارك ..
تتعب منّك !
طّيب طّيب ..
ترمي النرد ؟
قلت أتعبني هذا : العدّ !
قالت لو ترميه
بصدري ؟
لو تغرس : في أرضه يدّ ؟
أتوقع : بتحّب العدّ !
بس أسمعني ..
لاتطاوعني !
حدّك ترمي - للأثنين !
هذي - مافيها تخمين !
واسأل عن كل الأشياء !
بس أضمن لي ..
ماتسألني :
أحنا فـ الدنيا
أو
[ وين ] ؟
شِلت أيديني : قالت ويني ؟
قلت بصدري ..
وباست عيني !