[تفاصيل منسيه]

السلام عليكم ورحمة الله وبركاته
أسعد الله أوقاتكم جميعاً
بسيطه جديده ,, وليدة اللحظه ..
گ مصافحة متواضعة أتمنى أن ترتقي لذائقتكم

أقول:



يابعد كل الغياب ولهفة أحبابك
تـ بوك ماهي تبوك إن غابت عيونك

كن الأماكن خذت من قسوة غيابك
ماعاد تستقبل الضحكات من دونك

تـ بوك أرخت كفوف الوصل لعتابك
تـ عال واصل بها اللي يحبونك

تـ عال قبل الغياب وأسرد أسبابك
وش له تقاوم وتبني عالي حصونك

ملعون أبو شوقك اللي مابعد جابك
مذموم هالحب لو ماحرّض جنونك

ودّي لو أعرف بهاليومين وش صابك
أصبحت تهمل بشر كانو يهمونك

أصبحت أبرد من الأجواء وثيابك
ماتستر اللي بدا من عاري ظنونك

تبخل بأحاديثك اللي تجذب أصحابك
تجلس بعز الصخب ويسيطر سكونك

تحضر وغيبتك ضيفن واقف ببابك
تسهر ويغفى الكلام بطيّة جفونك

مرتاح؟! ما أعتقد يافلان..وحسابك
خالي بعين الذي قد كان مديونك

لـ تْجيب طاري الغياب وتوجع أحبابك
تـ بوك ماهي تبوك إن غابت عيونك


ـــــــــــــ
وسلامتكم