***
الصايع : راضي سويكت
نص لـ ( الحميدي الثقفي )
ضاق صدره ..
حس حتى البيت اللي انولد به صار قبره !
لملم انفاسه واحساسه وبعض اوراق كرّاسه
شرب باقي بقايا الشاهي البارد بكاسه
وخرج ...
وقف قليل على الدرج
.. ولّع سيجاره
استرق نظره على شباك غرفة جارته !
شاف جاره .. وانحرج
ارخى راسه :
صار نصف انسان ,
ربع انسان ..
بعض انسان ..
ما باقي من الانسان فيه .. إلا لباسه !
.. كان في حالة ندم ,
لو طعنته وقتها , ما سال منه .. نقطة دم ,
والله يا ديما .. ما اسامح اسلافي
اخذوا الايادي ما خلو سوى .. اكتافي
امشي كما الاعمى : قدامي / اخلافي
والنور والظلمى .. حمل على اكتافي
" واغض طرفي ان بدت لي جارتي حتى يوارى جارتي مأواها "
على خيال الما , هذا الحجر طافي
/ كل النسا سلمى/ وكل الرجال وافي
لصارت الاسمى , تلمس وتنشافي ..,
وامتطى سيارته .. سار في كل اتجاهات المدينه
لف ابو كل الشوارع :
مرّه نازل / مرّه طالع .. مرّه نازل مرّه طالع ..
قل : يدور شلّته ,
قل : يفكر في عذر للجار .. اذا .. علّم ابوه بزلته !
يبي " كافتيريا" جايع
يبي يشرب وياكل
قل : يدور عن حلول , او عن مشاكل
قل : يسوي ما يسويه المراهق :
انحرافات
وخرافات
وسخافات .. ومهازل !
قل : يغآآآآآآآآزل ؟
+ + + + + +
البحر ويش البحر لولا رمال الشط والاطفال
واليامال والمرجان والاصداف والما والسفينه ؟
والمسا ويش المسا لولا دفى لون الستاير من شبابيك المنازل ..
والنسا وخشوع جمر الليل في احضان المباخر ؟
انت شايف ضحكة الموجه على صدر البحر تختال ؟
شايف ضحكة الماء كم حزينة ؟ .. في نوافير المدينه ؟
شايف الفرق الكبير / الشاسع / الواسع , وشايفكم ...
هي الاشيا تكون اجمل كثير ... بدون آخر ؟!
+ + + + + +
وفي اليمين من التقاطع .. اعترض له نور احمر...
نور ساطع ...
صاح به اوقف .. وكان الصوت حازم ...
حزم قاطع ,
خفف السرعه ... رخاااا
صوت " المسجل " .. " ارتجف " ..
صاح نفس الصوت وبقوة صراخ " اوقف "
وقف ..
واستعاذ بطيبته من شر حراس النوايا ...
: وين رايح , او اذا ماكنت رايح , قل لنا من وين راجع ؟
: ما.. انا .. ما ..
: ما انت ما عندك ادب !.. انت تربية شوراع ..
.. ان شكلك واحد مسوي سوايا ..
هات اثبات الهويه ,
: حاضر .. وماعندي مانع ... هذي هيه
الاســـم : راضي سويكت ..
المؤهل : جامعي ..
المهــنة : صايع !!