نبض متواضع أرجو أن يشفع طول الغياب
مع كل الحب ..
.......................................
لبسني حزني البارح
ألم جارح
وقمت ارتب أوجاعي
على رف الزمان اللي
مضى ابـ عمري
هنا دمعه
هنا آهات مجتمعه
هنا ضحكه اطلعت مره
هنا عبره .. هنا حسره
هنا حلم انكسر بدري
هنا صورة عشق عذري
تذكرني زمان أول
يمر الليل وما أسأل
متى أصحى
متى الفرحه
على بال الحزن تطري
هنا انسينا أمانينا
وغنينا
أمل يشعل أيادينا
فوانيس وفرح واشموع
هنا امتدت أصابعنا
تمسح دمعنا الموجوع
هنا نام السهر بدري
بكل حاره
طشرنا طفولتنا
ولا اعرفنا
أبد ويش يحمل الآتي من الأيام
كنا ننام
نربي حزننا أيتام
بقت تكبر بداخلنا
يمر اليوم وما كنا
بحزن باكر أبد ندري
ويوم شاب الألم بينا ..
تغيرنا
تغير كل شي فينا
بقت أصداء ماضينا
إذا نمنا .. تصحينا
وانا الذكرى تمرجحني .. وتوجعني
تشب النار في صدري
أريد أكسر
كل صوره مضت مني
أريد أتعرى من حزني
وادروني
ابـ زمن ثاني
يمكن يوم ألقاني
ولو صدفه .. صوره حيل مختلفه
أريد أحزاني تنساني
على رف الزمان اللي .. مضى ابـ عمري ..