مدري الزمان اللي زبد ثم عربد
ـــــــــ ولعبت بك امواجه معاليق وحجاج
أوهو الحبيب الي نزح عنك وابعد
ـــــــــ ولك حاجةٍ به وانت ما قلت محتاج
أوهو الجسد لا بد يعرق ويبرد
ـــــــــــ دور لروحك لحظة الضعف مخراج
يا ضاربٍ في الصخر بذراعٍ اجرد
ــــــــــــ بين بياض العظم ما فاض هداج
ويا ضايعٍ في غابة الحبر الأسود
ـــــــــــــ ضاع العمر ما جبت حرفين من عاج
اشعلت جمرٍ وأحرقك لين رمد
ـــــــــــــ واليوم تـبني حوله ضلوعك سياج
أرخ الستاير ما بقى كود مشهد
ــــــــــــــ كهلٍ كفيف يشعل لغيره سراج
هداج