وحيده ما معي إلاي
وصدري يضيق من حولي
غريبه خانني ممشاي
أحمل جرحي البكاي
واخاف آطيح من طولي
انا اشسويت يا دنياي
كبر هـ الهم ..
كبرت وزادت احمولي
ي أيامي
طويله رحلتي مليت
وعاف الدرب أقدامي
سرى هـ الليل ..
وهمي ما بعد يسري
بحضن الصبح .. من بدري
تثاقل جرحي ونوخ على صدري
تنفسني
نعس يلعب على اهدابي
وعلى بابي ..
حنين يسأل عن احبابي
حلف يا عين م تنامي
أرق تتمرجح أحلامي
مدى مسدود
جثث لـ اوعود
ألملمها ..
خيالات الأمل تتساقط ابـ عيني
وانا ويني
أدورني وألقاني
بقايا من جسد أنثى
على اجدار الألم مصلوب
وطن منكوب ..
وحوله حزن مترامي
يا ليل الهم
أخاف التم
على بعضي وأجحدني
أخاف الغربه تخنقني.. وأتيتم
يتامى ادموعي اتركها
وانا الأحوج لـ أيتامي
رحل صوتي
هناك ابعيد اناديهم
على يال الشقى أسهر .. أتانيهم
تمر اصواتهم عتمه
تهدهد رمشي السهران
أنام .. أغفى
تفز روحي
يصحيها .. حنيني ورفة أحلامي
أتلفت .. هنا وهناك
أفتح للوهم شباك
يعبرني ..
أتبعثر واجعمني
وانا وياي .. ألم بعضي
غريبه خانني ممشاي
تحاصرني جيوش الهم
واتبسم
أدثر ليلي المعتم
وتكسرني..
شظايا جرحي الدامي