أحبتي في ابعاد دمتم مكسب الشعر؛ أهديكم هذا النص مع كامل الشوق لهذا الصرح :
حسمت الأمر مـ اقوى اعيش دونك
ولالي ديرة إلّا* .. في عيونك
تظنّ الصد* .. ينفع* .. والتغلّي؟
ترا ظنك خطا .. ماينفعونك
احاسيسي تجاهك مثْل ماهي
ولاتغفى احبك في شْفاهي
وإذا ناوي تعذّبني زياده
حلالك؛آمر لْروحي وناهي
تبيني اتركك وتصير ماضي؟
محااال وباسط السبع الأراضي
إذا أنك خير قلت .. الحمدلله
وإذا أنك شَرّ بالمقسوم راضي
اشوفك بالشوارع والمساكن
واعاني وانت ماحرّكت ساكن
يطرّيك الصباح وطول ليلي
وابونوره ليا غنى الاماكن
تخيّرتك غلا.. قبلة لروحي
يصلّي وين ماوجهت بوحي
ولو تطلب لصدق الحب شاهد
على صدق الغلا تشهد جروحي
كتبتك .. والشعر فيك يتباهى
قصيدة حب؛ تذهل من قراها
فلا تبعد عيونك عن قصيدي
انا مابغى جماهيرٍ سواها
على كيفك تحاشاني وكابر
وانا ببقى مثل ما أنت خابر
يا إما تْكفّر بحبّي .. ذنوبك
يا إما ابقى على هالحال صابر