تغرودة

محمد السالم · 02-13-2012, 10:14 AM

أيها الأحبة صباح الخير
هنا بعض تغرودات أخيكم أمل أن تكون خفيفة ظل على ذائقتكم
------------------

بكره ؛ يروحون ناسك يا حريب النعاس / ولا يلتفت في وداعك كود وجه شموت / يفيق بكره ؛ وكل ورود روحك هراس / يطل وجه الممات ولا تطوله تموت ..
---------
كانوا كثير وكنت انا وحدي القل / والظاهر انه زل واستكثروني / هذا انا في وحدتي ؛ وحدتي هل / يمكن يجيني يوم وانتي بدوني ؟ !
---------
-- لا خصّك الإنسان في حاجة له / تذكّر إنّه دون غيرك تذكرك/ خلّك على ماهو هقى بك محله / وردة فعل من جانبه لك تعذرك !
---------
-- ارحل ؛ إذا كان الرّحيل بشجونه / يمكن يوقّد في تعازيك شمعة / وصال ؛ ماتروي ضمانك عيونه / ضحكة كسير يتقي سقط ؛ دمعة ...
---------
-- ما قدرت انسى على شان لا جيت اذكرك / اقدر اقنع قلبي انه مثل قلبك نسى/ شف نجوم الليل ؛ وش كثرها ما تكثرك / في مساريبه توقض مناديب الأسى
---------
-- وانا على جال العذر كان ذنبي / دلوا يزم الري من جمّة البير / معاد يتحمل سوانيه جنبي / ولا عادت احلامي لها ريش وتطير
---------
-- صبّوا لهم في بير صدري خطايا / وصارت دليهم تنزع الذنب بالذنب / وانا اتجرع حنظليل العطايا / واذا افرغوا من جنب ؛ ناولتهم جنب
---------
ليت الأسى يفصل على حدّ سلمي / وبعد الفصل يتحمله قارع الباب / يا خي غيابك يوم ما كان حلمي / واليو حلمي ليت ما بيننا غياب ...
---------
مجرم ولد مجرم ولا به غرابة / تناسق الموجب معا جسم سالب/ اسمه أسد لكن حقيقة ترابه / انثى الثعل ما تنجب الا ثعالب
---------
-- هذا انا الغادي وانا احسبني الجاي / أبكي علىّ ؛ وانا احسب اني اغنّي/ تعال دوّر لك معي ؛ يمكن القاي / من فرط ما انا أدوّرك ؛ ضعت منّي ...
---------
شفت البحر وشلون غدار ومخيف / والليل موحش حين يرخي سدوله / ما ماثلوا في روح مغليك تعريف / خوفه إلى اسرج رمش عينك خيوله
---------
- جيتي من اقصى بروج الذاكرة والحنين / وهدّتي اقرب حصون الصبر ولانزياح / يا عابرة وان خذيتي سكة العابرين / شتّان بين العبور وبين ركز الرماح
---------
إن لم يكون الشعب سيّد عرينه / لا خير في سيّد ولا خير في شعب / حريّة ما تغترفها يمينه / ما تنعطا له لو عقد يابس الحب
---------
ويش تعني لك تفاصيل رجّال غريب/ مظهره ما يعترف لك ؛ بخافي مخبره/ يمتطي صمته جودا ؛ وبه هاجوس ذيب / كل سهم ترتعد منه ؛ يمكن يكسره
---------
- ابوس راسك يا زمن يكفي بلاش / بلاش تنخر في جدار الذاكرة / بلاش تلسعني بومضات الفلاش / واعيد عمرا ناسي انّي ذاكره .
---------
-- وين أنت ؟ . هذي مواعيدك على ماهي / لا وفّت لصدر حاضنها ولا غابت/ وانا وحرف العتاب اللي على اشفاهي / نرمي سهوم الظنون ولا صدف صابت ...
---------
.. من علمك تضحك على شوف ناطرك / يكسر من الحيرة دقيق الأصابع/ ما كان ذا طبعك ولا كنت خابرك / تستمتع بشوفي حبيس الروابع ...
---------
تعال سلفني من شعورك شعور/ نفسي يجيني يوم مالي مشاعر/ نفسي يجينا يوم واعيش انا الدور / أصير انا النساي وتصير شاعر
---------
- هاجس الليل ما كنت اسئله كيف جابك/ لين حجّر عليّ طيفك حدود الوسيعة / يقصر الحلم دونك واتطاول غيابك / واتمرجح على حبل الوصل والقطيعة
---------
- عزّمت احبّك على ما فيك / واشوف لك عذر يقنعني/ واردم على هوّة التشكيك / يقيني اللي مضيعني
---------
- طيف " سلمى " كل عـام يمرّنـي / ولا يجي مرّه مثـل مـرّ الكـرام/ كنـت اخبـره بالوصـال يبُرّنـي / بس هالمرّة طلـع ولـدة حـرام ...!
---------
- الله ياكبر فرحتنا / أبعد من حدود ما نامل / دنيانا معاد وسعتنا / السيّدة الأولة حامل...
---------
يا سيّدي ما علينا اخلاف / ما دمت تولد لنا سيّد / نحتاج " لمحمد الصحاف " / ونؤمن بأن وضعنا جيّد ...
---------
- يا طويل العمر ما ودّك مطبّل/ ودّي أمدح فيك لين يطيب حالي/ لو رصيدي ؛ فالشهر ذا ما تدبّل/ لا أنا طيّب ولا صدري شمالي
---------
ما كنت لي غصنا ولا كنت لك طير / احرمتني وانا جناحي يرفرف / مدري تجي لي منك ولا المقادير/ احترت كيف احسن خيار التصرف
---------
ما عرفت اكتب على شانك قصيدة / ولا عرفت اقصد على شانك كتابة / مو غريب اني عجزت اكتب جديدة / الغريب ان الجديد اكثر غرابة
---------
-- الغيث مرّ وتعدانا = مع إنّه اجتث خيمتنا/ مافيه شينٍ ولا جانا / باق لنا الموت ما متنا/ الله يسامح خطايانا / ولا يسامح جماعتنا /
يا صاحبي وش تحرانا ؟ / حنا قضية ؛ قضيتنا / شفنا قبل تنطق اشفانا / يغلب علينا تلفتنا ...
---------
هي ضيقة الصدر ولا الصبح من دونك / مدري بهذا اونها منفضة هذي / يا ما ابيخ الصبح لو ما شاف بعيونك / اللي عيوني تشوفه مرهم القاذي
---------
وانا اتحرا طلّتك في " تويتر " / جلست ناطر لين مانا توترت/ غديت شاي بريق في عين هيتر / نساني الموقد علي ؛ وتنثرت
---------
-- وش عليك ان طاح في صدر التعب / عزم رجل ما شكى شوك الطريق/ يمكن ان النار من قدر الحطب / تحضنة حتى يشاركها الحريق ...
---------
-إشرب من أدنى ذحاح الصبر واغرف لي/ ما دمت يـا حلـم مثلـي راويًـا ظامـي/ يا عزمي المنكسر وشعـاد تخـرف لـي/ وانـا نخـل واقعـي فزاعـة أحـلامـي
---------
- صباح : هذا الصباح اللي يحطّ السّهر /في كم ليله ويطوي فيه من صاح به / واحنا انتراود بصحوتنا حدود السكر / لاحن سكرنا ولا نال الصحو صاحبه
---------
-- الرّوح قطرة والضلوع ايهاب / وامنين ما هز السقا طاحت / بالله قلّي يا نوا الأحباب / وش تخسرة لو نوّتك ساحت
---------
هم سجلوها لك كرم ضد مجهول / وانا عليك أثبت خطاها لاعانة/ تعبت وانا أقول واقول واقول / كل يهون إلا جروح الخيانة
---------
-- الله يسامح من سعوا في دماري / كانوا لي الما ؛ مثل مانا لهم طين / راحوا . وخلّوني يعسكر اغباري / عينٍ تراعيهم ؛ وتبكي لهم عين ...
---------
-- هذا انا الغادي وانا احسبني الجاي / أبكي علىّ ؛ وانا احسب اني اغنّي/ تعال دوّر لك معي ؛ يمكن القاي / من فرط ما انا أدوّرك ؛ ضعت منّي
---------
- لا تقول لي خيل ؛ ولا تقول لي عيس / ولا تقول لي كنا رجال ودوله / حنا عرب ؛ لو شاخ في عرفنا ابليس / قلنا وليّ لامرنا صفقوله ...
---------
-- صباحك مثل ممساك يا حلمي المكسور / يطل الصباح وكن ليلك بعد توّه / فختناك ليل البارحة وانت روضك بور / ولقيناك صبح اليوم ما زارتك نوّه ...
---------
- حنين كم لي وانا محتاج / اقرأ شعر "بكرته" حالت / حنين صمت الحنين ازعاج / لو زال ذكراه مازالت / حنين يقتلني الإحراج لا قلتي الناس وش قالت...
---------
-- من كثرة اوجاعي عليك .. ازريت اوصّي بك علي .. ابيك ابيك . ابيك ابيك .. ابيك يا ريحة هلي ..
---------
- قالت من أنت ؟ ؛ وقلت مجموعة اقساط / من كل ذل وهم تلقين منّي/ من شبّة اظفاري وانا كومة احباط / لو تفرشي لي رمش عينك طعنّي ...
---------
- من توارى ظل ؛ من كانوا طموحي / صرت اشوف ذنوب خلق الله خطاهم/ كل ما سولف على روحي بروحي / صرت قمح وصارت الذكرى رحاهم ...
---------
- ما قدرت أحب غيرك مع أني مجتهد / كل ما ابذر سنبلة حب مع غيرك تخيب/ والله انّي خايف تطولني كف اللحد / واجتهادي ما غدا ؛ لكل مجتهد نصيب ...
--------
- يا ضيق صدر البلد يا حسيـن بعيونـي/ وياوسع صدر البلد ياحسيـن باحزانـي/ يا حسين لوشفتني يوم انخطـف لونـي/ وانا أسأل الناس ؛ حدّ اليوم لاقانـي؟..
--------
حبّيت أبيّن لك قبل يدفن الليل / ظلك ويحتدّ الغلس في عيوني / ما انت أوّل اللي كُنت لعيونهم ميل / ويوما تبلاني الرمد زنجروني ...
-------
تمر الايام وأمالك على ماهي = لا قدمت لك جميل ولا مشت خطوة / لانت الخلي البليد الساهي اللاهي = ولانت الحظيظ السعيد وصاحب السطوة ..
-------
هذا وانا لي سنين وشهور واسبوع / متحمّل اللي يستحيل احتماله / اطلب سقاك ؛ وطاوي قلبي الجوع / ولا قنعت ؛ بمسألة لاستحالة ...
-------
اذا كنت موسعني بوهمك على المكشوف / وتطلق خطامه كل ما صادفه مسلك / فعليك إن نتحمل ما يحدّك على السرجوف / انا المصدر اللي مارضى يكشف اسمه لك ...
-------
... مشغول بالٍ وكنّك غافل داله / كن الوجع فيك فرض وراحتك سنّة / اقسى الاحسيس حزن ما تحرى له / واوجع مواجعك جرح ما حد يظنّه ...
-------
لو حاجتي لك تنلقى عند غيرك / من وقت يمديني قنعت وتغانيت / بالله لو حرك شعورك ضميرك / تذكّر إنبه حي ؛ ما يحسده ميت ...
-------
ذلول الحكي في خاطري ودّها تمرير / وانا خايف لا صد عن وجهها تنقال / على حد علمي قالوا انك ذكر لا غير / ولا هو ضروري كل منهو ذكر رجّال ...
-------
معادهي غلطه بسيطة وتصحيح / ولا عادهي كلمة بريئة ومرّت / عين تغسّلها دموع التماسيح /وعين على دمع الهجاد استمرّت ...
-------
غيّر مسار الحديث إن كنت تبغيني / خوي درب إلى من شانت يعينك/ ما ودي أكذب عليك وأصغر بعيني / ولا ودي اصدق معك واطيح من عينك ...
-------
ما عدت محتاجك ولو كنت محتاج / إنّي الاقي للفكاك أي حاجة / باقي يحاصرني من الماضي اسياج / من وقت حابسني بعنق الزجاجة ...
-------
تعال شوف " القاهرة " بعدك اشلون / ما ظل فيها غير عيني وبابك / اللي يقول : ابها ثمانين مليون / ما شاف وحشتها بلحظة غيابك ...
-------
اعطني حظ وارميني بحر / ودّي اغرق معا حظٍّ جميل / ودّي اغرق لعله لي مفر / من صحاري كفوف المستحيل ...
-------
حتى لو يقول باللي صار مسموحة / يبقى من اللوم ما يستصرخ الداعي / لو تمنحيه الامل ما ضمته روحه / من شبّته في منايح خيبته راعي ...
-------
وانا أدوّر لك من أقصاي لدناك / صادفت في دربي وجيه ومشاهي / هذا مع أني موقن صعب لقياك / من قال لي أقلط ؛ سبقته إبلاهي ...
-------
يا صاحبي لو طال حلمي سمائي / حملت حملك لو بتر حبل متني/ ما انا كذا شخص حزين انطوائي / غير إنّ خيبات الهقاوي طوتني ...
-------
ما انت اوّل اللي سرق من حلمي ارقادي / ولانت أخر اللي أخاف يوسّع طعوني // لكني اخشى ملاءة حزني البادي / تفرج اسارير منهم بك يعذلوني ...
-------
سيّدي لا ؛ مانت سيّد ولا انا عبد لك / لأننا في واقع الأمر للواحد عبيد / تعرف أني لا نويت وبغيت استبدلك / لانت في عقلي مقدّس ولا للعزم قيد ...
-------
يا خوي الدرب ؛ هالدرب عافته الركاب / والطريق اقشر إذا صرت عبد للمصير/ لا غدت بك ضيقة ما تغطيها الثياب / وش عليه إن اظلم الكون في عين الضرير ...
-------
اعتبرني أي شي إلاّ وليف / خلّك إنسانٍ تهمّه عزّته / اعتبرني غصن في عز الخريف / هبّت الريح الصريم وهزّته ...
-------
اليوم وانا أقلّب أوراق عمري / وجدت لك ذكرى صدى صوتها حي / سرحت معها لين ما قال صدري / تراك توجعني كذا حيل يا خي ...
-------