وردة غمام

[مشعل بن طواله]

وردة غمام

وردةٍ نبْتت على صدر الغمام من العذوبة
غصنه الاستبرق ورقة ورقها سندسيّة

تاخذ من الشمس روح الصبح وترتل غروبه
وان غشاه الليل قالت شاعري سولف عليّه

عن شعور الوصل يوم يبل ديم الهجر ثوبه
كيف جف الحلم دام العزم سيله عقربيّة

قلت جرحٍ نوجسه لو كان في شرحه صعوبة
لكن السجّة علاجه لو كفوفه حاتميّة

والظلام يعيش وسط النور ياكل من ذنوبه
ما على روحك ملام ولا على مثلي خطيّة

كنت انا شاعر سقاك اعذب قصيّد ومادروبه
يوم كان الغيم بستاني وكان الغرس ليّه

يوم كنتي اختصار العمر والكون ودروبه
وانتي تشوفين بي رَجّال مابالكون زيّه

كان مسباحي ثريا الليل يوم الليل دوبه
وارسم ابياتي على صدر المسا لجلك هديّة

لين صرت اشوفني مقفي معي روحٍ كذوبة
عاش ماضيها ومات الحينها وتقول حيّة

وردتي مدام ماضينا سقى الغيمة عذوبة
كل ليل بنلتقي بالامس في ذكرى عذيّة