خَـــيَّــــمْ خَيَـــــالكْ

[رضا الهاشمي]

الوادي اللّي فيهْ خيَّم خَيالكْ

بدْموع شُوقي...ترتخيلَهْ جِباليْ


يا نَجْمِ في عًلْيا الحَنايا مَجالكْ

ياليتْ في عجْما فُوادِكْ مَجَاليْ


يومْ إنَّ كلِّي يا حَبيبي حَلالِكْ

خِذْني علَى دَرْب الهوىَ بالدَّلاليْ


آنا علَى يِمْناكْ واسألْ شِمَالكْ

وانتهْ علَى يِمنَايْ واسألْ شِماليْ


خَلْني مَعَكْ واحضِنْ خُفوقي لِحَالكْ

وخَلّكْ مَعي بحْضِنْ خُفوقِكْ لِحاليْ


يا حَقِّ قلبيْ يا شُعورِ التَّهالُكْ

في شوقِ قلب ٍ صُوبَهْ المُوتْ ماليْ


درْبِ اللّقى هَل يا تُرى اليومْ سالكْ

لوْ كانْ مُغْلقْ صارْ شُوفِك مُحَاليْ


أشْتاقِ لكْ حتّى فقدِتْ التَّمَالكْ

مالِ الجّفى مالِ التَّلاقيْ و ماليْ


همْساتِكْ اللي قلتَها في وِصَالكْ

راحتْ معَكْ ما عادْ شي ٍ بقىَ ليْ


إلاّ عَباتِكْ بعدَها تحْت شالِكْ

في حجرَةِ الاشواقِ و الدمعِ ساليْ


لامنْ ذكرتِكْ وأِدْعِجْ العينْ حالكْ

مثلِ اللَّياليْ آهِ ذيكِ اللياليْ


يا وينْ ألقىَ في حياتيْ بَدَالكْ

ويا وينْ تلقىَ في حياتكْ بَدَاليْ


يا امْلبسنِّي اشْماغ عشْقِ بْجمَالكْ

ويا منْ حَضَنِّي لينْ طيَّحْ اعْقاليْ