طين ثاني

[فرحان الصعب]

هذا السهر لا غدا لليل جفنين
ما اذكر انه على دربه نساني
ولّم حنينك .. وقل للنوم بعدين
لليل ذيبٍ على مسراك عاني
الليل روّح.. وباقي ..منه ثلثين
وانا من الشوق اشوفك من مكاني
من وجهك اللي يشع النور نورين
ومن عينك اللي .. تعد الموت حاني
رميت صبر الاحد في وجه الاثنين
وجيتك اسابق مع الوقت الثواني
هات الاغاني وصف الشمع باللين
في حضرة الحب انا بحاجة اغاني
شاعرْك تعرف معاناته من سنين
حزنه يهده ..ويبني به مباني
بس قلّه الله عليك ان قال بيتين
لاصار صايد.. وفايد بالمعاني
خل الشعر تنبت لروحه جناحين
ومرده ان طار.. يرجع للمواني
الشعر علمني ان الشعر من طين
والطين علمني.. انك طين ثاني
وعلمني آكون ما بينك وما بين
دمعك اذا سال بالخد وبكاني
لذا انتبه لا تجف ارض البساتين
وتظما شعور ويصير الشعر جاني
وانت تعرفْني وخابرني على الدين
والله هدا الشعر يوم الله هداني
خلك على العهد مثل اول وهالحين
لا شفت مزنٍ ..من مزوني عصاني
لا تنشد العين درب الصدق من وين
والعين تفضح لك اسرار المحاني
ما عاد للصبح..مثل الليل جفنين
من يوم حبك خذا القلب وخذاني