صوت الاخوّه يوم ناداني اطبقت
سمعي، وصوت الغيض جيته من اقصاي
ياليت قبل اطيع ظني تحققت
أو ليت لي بالٍ ليا اخطيت نسّاي
لحظة غضب عقلي بها غاب مافقت
الا وانا اندب حظي بموت سلواي
هذريت من كثر الزعل ماترفقت
وجرحت خاطر طيّب الذات بحكاي
الصاحب اللي من عرفته توفقت
ماغشني في نصحه ولا كتم راي
والله ماكني قبل لا اجرحه ذقت
طعم الندم على مرارة سواياي
لو الزمن يرجع بنا شوي ما اطلقت
حكيٍ لو إنه قاله تضيق دنياي
عزالله بمثله وشرواه مالقت
ياحكيٍ ارفع عنه مثلي وشرواي
ظلمته وماكني بظلمي احرقت
.قلبٍ بحسن الظن يقرا نوياي
لو ثار في وجهي حشى ما تضايقت
لكن قتل في حِلمه العذر بشفاي
ليته زعل واقول يرضى مع الوقت
ولا ذبحني يوم دوّر على رضاي
والله لوّ إنه عرف وش كثر ضقت
كان اعتذر لي صاحبي عن خطاياي!