سيمفونِيّة مَطَرْ

[سعيد الموسى]

ياحنين ..
وكل شي حولي حزين
ياحنين ..
وكيف هالدنيا تبين ؟
لا عطور ..
ولا زهور الياسمين !
ولا وجيه الناس رُقيا
ولا هي تحمل آيتين !
قد ماهي مظلمه !
او ملاها هالأنين !
يعني مافيها إخضرار !
لجل تنبت بالوقار !
ياحنين ..
وكل شي
مافيه شيّ
وكل شمس
بدون فيّ
وكل نور
بدون ضيّ
لاتقولي لعمك .. أوقف!
والزمن ماهو بمنصف !
واقف بحيلي
.. سنين !
صامد
وكلي يقين !
بس هالوقفه .. ثقيله !
لاغدا حمل ٍ
واشيله !
كل ماهو أهتز .. كتفي !
قلت عيب
يبان ضعفي !
ياحنين
كل شي ماهو مُبين !
كون مُبهم !
ليل أعتم !
من وجوه الكاذبين !
لو سألتي هالحجاره
اصدق اللي تسألين !
ياحنين الوقت : خيل
يركض وركضه هزيل
والسنين اللي تطوف !
ماتطوف وكتفي محرم
ولاترش بصدري زمزم !
ماتطوف إلا بعلقم !
لو جروحي ماتكلّم !
ياحنين ..
وشوفي .. شبت !
انغرس بالوجه .. نبت !
ياحنين وعندي بنت!
تحضن ايدي لاحزنت
ولاتقولي ليه لنت ؟
كم تكابرت ، ونبلت !
والزمن ماهو نبيل !
ليه يسبقني ب جيل ؟
ياحنين ..
الناس تجهل!
من هو اللي قال تعدل؟
هذا انا يرمون ظهري !
مانزفت الا بعطري !
ياحنين
ورب آدم
بالزمن هذا .. تصادم !
الوضيع يصير " قدوه "
والكريم أصبح " بـ خلوه "
معتزل هالناس " عاكف "
لا تقولي لييييه خايف ؟
إيه خايف
إيه خايف
ايه متضايق / وعايف !
لاالزمن هذا زماني
والأماكن ..
مو مكاني !
لكن أستغفر ..
واكبّر !
وانفض ايديني وتزهر !
والصبر ..
لابد يثمر !