سوالف عرب على جال (نقدهم) *

[عبدالعزيز رشيد]

قصيدة أرسلها الشاعر:محمّد أبودباس من بلدة العودة بالسدير لإبنه في عُمان:
[poem="font="simplified arabic,5,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يا ونةٍ ونيتهـا مـن خـوى الـراس=من لاهـبٍ بالكبـد مثـل السعيـره
ونين من رجله غـدت تقـل مقـواس=ويوّن تالـي الليـل يشكـي الجبيـره
ويا حمس قلبي حمس بـنٍ بمحمـاس=ويا هشـم حالـي هشمهـا بالنجيـره
ويا وجد حالي يا ملا وجـد غـرّاس=يوم اثمرت واشفا صفـى عنـه بيـره
من ثمر قلبـي سـرا هجعـة النـاس=متنحـرٍ دربٍ عسـى فيـه خـيـره
الله يفكـه مـن بـلا سـو الاتعـاس=ومن شـر عبثـات الليالـي يجيـره
فى ديـرةٍ تقطعـت عنـه الارمـاس=سبعيـن يـومٍ للركـايـب مسـيـره
لا والله إلاحـال مـن دونـه اليـاس=حـط البحـر والبـر دون الجزيـره
يالله ياللـي رد مـن عقـب ما يـاس=يوسف على يعقوب وابصـر نظيـره
ترد على دباس يا محصـي النـاس=يا عالـمٍ مـا بالخـفـا والسـريـره
يا دباس أنا بوصيك عن درب الادناس=ترى الـذي مثلـك يناظـر مسيـره
عليك بالتقوى تـرى العـز يا دبـاس=فى طاعة اللـي مـا ينجيـك غيـره
هاذي ثمان سنين من رحـت يا دبـاس=لا رسالـه جتنـي ولا مـن بريـره
يا دباس من عقبك ترى البال محتـاس=وعليك دمـع العيـن حـرّق نظيـره
وعليك كنى فى دجـا الليـل حـراس=أصبح على حيلـي وعينـي سهيـره
أصبح انا مابين طـاري وهوجـاس=وطـواري تطـري علينـا كثـيـره
مثل الوحش قلبي على كـف حبـاس=يكفخ كمـا طيـرٍ اسبوقـه قصيـره
متحيرٍ من عيلـه البيـت يـا دبـاس=ارجى ثـواب الله وأخـشى المعيـره
أخاف من حكي العداء ثـم الانجـاس=أهـل الحكايـا الطايلـه والقصيـره
ويقال خلا عيلته عـنّـز الـراس=أقفـى وخـلى عيلـةٍ لـه صغـيـره
والا فأنا يا بـوك قطّـاع الارمـاس=مانيب مثبـورٍ أو رجلـي كسيـره
آصلك لو دونك نبا حمـر الاطعـاس=الصلـب والصمـان دروب عسيـره
مهالـك مـدارك مـا بهـا أونـاس=ألا الثعـل والبـوم تسمـع صفيـره
لو كنت فى نزوى وديرة بنـي يـاس=أهـل المـوازى والوجيـه الغبيـره
عبّـادة الاصنـام شرّابـة الـكـاس=الخمـر والتنبـاك فيهـا وغـيـره
لركب على وجنا من الهجن عرماس=فجا النحـر يا دبـاس حمـرا ظهيـره
متروسة الفخذيـن مزبـورة الـراس=كن الخلاص عيونهـا يـوم أديـره
أو شبـه ربـدا تخـفّـق للأونـاس=وان رفّعـت جنحانـهـا مستـذيـره
تنشر من العوده على نـور الانفـاس=عند الفجـر والليـل مقفـي مريـره
والعصر بالصمان تسمع لها اضراس=حبل الرسـن خطـرٍ تبتـر جريـره
نهـار ثالـث بيـن حمـا الاوراس=واره يمينـك جعلهـا لـك سفـيـره
ثـم أركـب ساجيـة تقلـب الـراس=تمشي بأهلها فـى البحـور الغزيـره
إلى مسقط الفيحاء بها الخير محتـاس=لولا الكفـر والشـرك واوي ديـره
عز الله انها ديرةٍ مالها أجناس=لولا بها يعبد مع الله غيره
لولا بها يشرك علي وعباس=وأيضا بها الفاروق سبّه بريره
فيها الطبيخ وراهي الخبـز يا دبـاس=يقعد خـوى الـراس خنـة خميـره
هى ديرة اللي باغـيٍ كيفـة الـراس=ولا له أحد همه مـن النـاس غيـره
هيسٍ ولد هيسٍ للمواعين لحّـاس=يفـرح إلـى نيـدي لذبـح النحيـره
وماقفك ذا يا دباس مـا فيـه نومـاس=يصلـح لقيـنٍ مهنتـه طـق زيـره
ترى الفداوي دون وانشد الناس=راعيـه مـا يذكـر بمدحٍ وغيـره
ماله سوى طق الحنك منـه واليـاس=وليا انقطع خرجه فـلا لـه ذخيـره
طلب المعيشه بالحراثـه والاجنـاس=المشترى والبيـع يوصـف وغيـره
قم انهض العيرات مـع كـل فـرّاس=يـا دبـاس دوّر خـيّـر تستشـيـره
جدك وعمانـك هـل العـز والبـاس=أهـل اللـوازم مكمليـن القصيـره
يا دباس ما يصبر على البق والحـاس=ألا الـذي مالـه بنـجـدٍ عشـيـره
واليوم يا مـروي شبـا كـل عبـاس=أنـت الرجا يـا كعام وجه المغـيـره
عشرين عامٍ كلها أرجيك يـا دبـاس=مثـل الغريـر اللـي تولـع بطيـره
عد المناكـب هيلـعٍ فـرخ قرنـاس=يمناه فـى لطـم الحبـاري شطيـره
عانق خلوجٍ روّحت عقـب مـرواس=عنـد العصيـر لبيضهـا مستذيـره
والليل جاها وحال من دونهـا اليـاس=روحها علـى فرقـاه فـرت فريـره
يا دباس أنـا يابـوك مانيـب بـلاس=ميـر ان عيـلات الرفاقـه كثـيـره
جنبت وسط السوق وامشي مع الساس=وأخذ شوي الحـق واتـرك كثيـره
يا دباس لو جبت من دحب الاكياس=مختلفـةٍ مــا بـيـن رزٍ ونـيـره
مالـي بهـا يا جعلـها بألـف قبـاس=أو جعلهـا تذهـب ولـو هـي كثيـره
يا دباس قلبي كل مـا هـب نسنـاس=شرقيـةٍ هبـت بقلـبـي سعـيـره
والحال يا فرز الوغى مسّهـا البـاس=عليـك يـا ناطح وجيـه المغيـره
وغصون قلبي يا فتى الجـود يبّـاس=غادٍ أنـا يابـوك كنـي هشيـره
مـن شافنـي يقـول ذا فيـه لسّـاس=واللـي بـرى حالـي إلهـي خبيـره
لا وعلا من قبـل غـوّال الانفـاس=ومفـارق الدنيـا يجينـا بشـيـره
عسى يطق البـاب والنـاس غطـاس=يا والـي القـدرة عليـك اتعبـيـره
وصلاة ربـي عـد ماهـب نسنـاس=على النبـي عـدة حقـوق المطيـره
.[/poem]

وهذا جواب ابنه:
[poem="font="simplified arabic,5,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
حي الجواب اللي لفانـا مـن الـراس=جابـه غـلامٍ مـا توانـى مسيـره
اهـلا هلا عد مـا حبـك قرطـاس=أومـا كتـب فوقـه بيـوتٍ شطيـره
جواب منهو لي مـودٍ مـن النـاس=ابوى مـا يوصـف حلـيٍ لغيـره
فرز الوغى كنه على الوكر قرنـاس=قـروم ربعـه كلهـا تستشـيـره
دليل عيـراتٍ ليا هـب نسنـاس=ثـم ادلهـم الجـو ومابـه ذخـيـره
مهفي الغنم لاهل الركايـب والأفـراس=لا روحوا له فلا عليهـم قصيـره
راعي معاميلٍ بهـا العبـد جـلاس=للبن يشـري بالسنيـن العسيـره
هاذي بمركاها وهاذي بمحمـاس=وهاذي يصبـه للوجيـه السفيـره
وخلاف ذا يا راكـبٍ فـوق عرمـاس=مامونةٍ من نقـوة الهجـن عيـره
حمرا وهي فى سنها وقـم الاسـداس=متوسط لا فاطر ولا هـى صغيـره
ماهي لحوحٍ راكبه بالعصـا قـاس=حرّم عليهـا غيـر شيـل النقيـره
والخرج هو وبيـوت قيـلٍ بقرطـاس=مـع مزهـب الأيـام ما هـي كثيـره
وفوقه غلامٍ منـوته قطـع الارمـاس=لـو هـو بليـلٍ ما تغيـر نظيـره
وليا لفيت الدار فاجهر بالاحسـاس=وبلغ سلامـي كـل ذيـك العشيـره
وختص ابوي اللي نفل جملة النـاس=وخصّه بعلمٍ وقـل ترانـي بشيـره
لا يا نقى العـرض يا بـوي لابـاس=ان كان تشكـي الضيـم فأنـا اسيـره
وان سايلك عنـي ترانـي بنومـاس=وأنا أحمد اللي مـا توسلـت غيـره
الحمد لو يشـرى شرينـاه بأكيـاس=بأموالنـا نرخـص نـدوّر الستيـره
مطرق فنرجـيٍ مضاريبـه الـراس=ومصلبـخٍ جبتـه عسانـى ذخيـره
من صنع نصرانيٍ مشـروبه الكـاس=يذكر ورى جـاوه بعيـدٍ مسيـره
أبغيـه للـي حادينـك علـى السـاس=اهـل النمايـم والحكايـا الكثـيـره
ربعٍ نـووا فيـك الـردى والتخسـاس=مهبول ياللي قـال غايـبٍ عشيـره
علي ديـنٍ لأودع الجمـع ينحـاس=لين العشيـر يقـوم يلعـن عشيـره
يا بوي انا ما رحت لكيفت الراس=مع ذا ولانـي فـى سفـاهٍ أوغيـره
أما سكنا الدار مـن غيـر هوجـاس=وألا نعـاف الـدار وندوّر غـيـره
كلـه لعينـا كلمـةٍ قلـت يا دبـاس=تشكي وأنا دونـي بحـورٍ غريـزه
خذ لك يمين الشرع قطـاّع الأنفـاس=انه فـلا جتنـي علـومٍ بصيـره
لانيب جانـي ولا حبـرٍ بقرطـاس=ايضـا ولا جتنـي علـومٍ سفيـره
ان كان تشكي الضيق يا بوي لاباس=جاك الفرج يا بـوي هـو والبريـره
ولا فأنا يـا بـوي قطـاع الأرمـاس=اصبر على الشدة ولو هـي عسيـره
يا مسندي يا بوي شف اوكد النـاس=ثم أنشده قل ويـش هو في مسيـره
ان كان ما يفرح صديقـك بنومـاس=تحرم علينا اللي نهـوده صغيـره
مدلول مجهـول زها زين الالبـاس=بنت الذي يثني ليا جـت كسيره
طارٍ يقول اظهـر وطـار بجـلاس=قمت اشرب التنبـاك واثـره نكيـره
ابغى عسى الله يبرد القلب يا نـاس=من لاهـبٍ شبـت بقلبـي سعيـره
ومن كان له غايبٍ فلا يقطع اليـاس=ان قدّر الله جـاب علمـه بشيـره
.[/poem]


.
عنّي كما يقال عن طرفة بن العبد:"هو أجودهم واحدة" يعنون بها معلّقته أجد قصيدة أبودباس كذلك بالنبطيّ