في جُعبتي [بعض الحكي ] ..!

[شهد الدوسري]

بسم الله الرحمَن الرحيم ,..
السلام عليكم وَرحمَة الله وبركـاته ..



خُزعبله ..!
ثم هرطقه ..!
ثم أغنيه .. !
من لحنِ كذّاب الغرام قَطفتُها !!



تعالوا واقدعوا من هم قلبي !
............. ألا يا لَيْتكم ما تقدعونه
طريح الحُب إغلاقه لعب بي
.............عجزت أضم بيتًا تفهمونه !
ألا ما صابني هتّان نحبي
.............عَميق الجرح ليتَكُمُ ترونه
أيا صحب الحروف وَ أين عَذبي
.............وحرفي مثقل الهمِّ بعيونه
أُمازج بالفصيح سفيف شربي
.............إذا خالطتهُ نبطي يخونه
ألا هل زرتمُ أسفي وندبِي
.............تَرونَ الهمّ معقود بجفونه ؟!
أهيمُ ولَكنَ الهيمانَ ذنبي
.............توفّاني وكفّنني كفونه
أعيشُ بحالة المجهول ضربي
.............فلا حُلمًا يسّلفني جنونه

ليتك تسولف ..!
ليتَك تسولف وأكسر الضيق بـ حكَآك ..
........... يا اللي سوَاليفك سبايب رضاتي
على الأقل بسمَه تجامل محيّآك ..
........... تضحك معَاها دنيتي يا غنَاتي !
أثلج لهيب الصّدر بالحَرف يهناك !
........... وأنا أهتني بمراقبك في حياتي !
عيّا المسا يحفل بضحكي بليّاك !
........... يا اللي ترافقني بحزني وهناتي !
جسّدت لي من غيبتك شخص شرواك !
........... يجلس معي يضحك معي (لاتحاتي) !
هَذا المسَا ما يحمل إلا بقـاياك !
........... يومك تناثر داخلي بـ أمنياتي !
قضيّتك صمتك+ وصدّك +وذكراك !
........... ومَالي مُحامي لي سوى أغنياتي <3 !

ومحدٍ فهمني غير نفْسي يا نفْسِي !
ومحدٍ فهمني غير نفْسي يا نفْسِي !
........... إليا تضايق خَاطري جيتك حروف <3 !
- تهيج موجات المواجيع عكسي !
........... وأضمّ داخلك العظيمات مَا أروف !
أثقل عليك الهمّ و أرجوك تنسي !
........... وأنتِ عظيمه تحملينه بلا خوف !
إليا تلوعج خاطري ضاق حسّي !
........... وإليا تنفّست الوجع جالك صنوف !
وجعَات صدري فايقه وجع ضرسي !
........... أكبر وتكبر وجعة الجوف بالجوف !
دفتر وكرّاس و مكاتب وكرسي !
........... بنيت فصل بداخلي ناقص ضيوف !
عَليْكِ يا نفسي بمن شَاق أُنسي ..
........... عَابَ الفؤاد مُخلفًا جرحَه خلوف !
أعيش به حاضر تفاصيل أمسي !
........... كنّه مغلّف هايج الجَرح بـ ظروف !
وإليا تثنى أصفر اللون شمسي !
........... رفرف لي الحزن وتباهى بالوقوف !
أصبح على حزن وعلى همّ أمسي !
........... يا الله عسى هالهم للأجر مَصروف !

أنا أحتآجك .. !؟
كثر ما قلت ..
مَا أحتاجك!
كثر مَا غنت .. (أنفاسي) ..
حنين مْعَانق ...[أهدابي] !

أغني لك ..؟
على صفحَه من (كتابك )..
يغنّي حرفك الأحمر
على تشطيبة أبوابي !

ألاعب بك نَغم صوتي
يعشّمني بجيّاتك ..!
وأعرف بداخلي بأني ..
أغيض الجرح ويزهى بي !

و تَعَال وطلْ بعروقي
وشوف الدم بغيابك !
نقص عيّا يخليني
أعيشك دون تحيا بي !

ألا هل شفت شيٍ بي ..
نفض حزني على جَالك!
ألا ما خبّرك ليلي ؟
من جروحَك فدا ترابي !!!!

أغني لك .. ؟
ولا أبغي من أغانيك الحزن يبقى ..
وَ أردد صوت غنواتي .. على شان الحزن يبقاك!
وَ أغني لك .. ؟
من ألحان الوجع ..
ما جابت الذكرى !
يرد النَاي وجعاتي إلى من جابتك ذكراك !
حزين الصّوت في جوفي
حزينه دقّته وجعا ..
ولا رددت في حسّي
أغاني غيرك بطرياك ! ‎
قصيدك ..
صوتي المبحوح ..
لا غنيت لك بكّى ..
ألا يا ليت لي حرفٍ ... عشان الحال ذا بكّآك
تعال اسمع ...!
اغانيّ البكا والهم والسلوى
تعال وناظر عيوني على عزفي تجي تبغَاك !

في جُعبتي [بعض الحكي ] ..!
في جُعبتي [بعض الحكي ] وَأشلاء شيّ بضامري..
................... متى على الله نلتقِي وأفضّ بأنفاسي قسَاك
النفس ضافت (دمعتي) تيه و ضياع بناظري ..
................... والحَال لو قلت [بهنا] أكذب علي أرجي رضَاك
أجمَع من جحافك (وجع) وأكسر خواطر خاطري !
................... وإليا انسدل خِدر الغلس صيّحت نجمي في سمَاك ‎
وهذا أنا .. يا صاحبي لأجلك تزآيد [مَاطري] /
................... مَا راب قلبي من وجعك الا رحيلك واختفَاك
بالله وشلون المَسا .. حزنه يلوّن صابري !
................... وأنا ببسمَاتي هموم إن شفتها هدّت قواك !
صُداع / وقولون / وَألم / كنّي بعالم دائري !
................... وَ الدّم بـ أمراضه جفا وما زاد هالوجعه سوَاك
وتبي المسا طيب مَعي ؟ وشلون وفرحي هَاجري !
................... وشلون وعروقه أسى قلبٍ تعنى في قفاك!

وَ أدوّر شي يسليني ..
بعد ما غآبت [أيّامك] !
وَلا ألقى غير ..
وجعَات الألم لا
(جَابك الطّاري)'!
وأدوّر شي ..
بعيون الحنين إن جيت ما لامك !
ولا ألقى غير ..
صوت الأنّ يتوسّد على نَاري'!
تَعال أرجوك لا تقطع أمل ..
متوفّي إجرامك !
تعَال (استر) وجع نبض الفؤاد اللي غدَا عَاري'!
تبي تعرف وش اللي غيّرته اقفاءة أقدامك!
تعال اقرآ على جَال الحروف ودوحة أشعَاري! ‎

كل ليل !
يا هدوء الليل بعروق المَدينه ..
........... يا لقاءات [النجوم] فمهدها !
لا ذكرت النور وعيوني حزينه /
...........ليش تظلمني العيون بدمعها .. !
كل ما وادعت من عمري (سفينه) ..
...........غرق جفون وتوقّد جمرها
كُل ليلٍ يحتوي جوّ السكينه ..
...........ينثر أوراق البكا ويلمّها ..!
كل ليل أفض أطراف (الغبينه) ..
...........وكل صبح يعيد لي تحصيلها..
الألم لو مات فرحي في يدينه ..
...........بست يدّين الألم ما خنتها ..

يا مدّعين إنّ الثقافه
a
b
c
والله إنّي في ثقافتكم عَدم ! ‎‏
وخرّوا من حرف (ضادي ) بـ احتسي !
.................... غيرها ما راق لو عالي اصطدم !
كنت أظن الشوق عندي منتسِي ..
....................لين بيّحني خياله بالندَم ..
رحت أعلّم درس عيني (احرسي) /
....................طاحت الدمعه وبنياني انهدم
ازهم على فرحي ينادينَ (اخرسي) !
....................منجلط من حظي اللي منردَم ..
كان فعلا هالثقافه
a
b
c
/ عبّروا فيها عن احسَاس الهَدم !!

سُؤال عَابر ,,
شـ الحل مع قوم الفتن و اللقافه ؟
.......... من هو يداويهم بلا طب وحروق ؟
ودّي أعمر دآئره لـ السخافه ..
.......... وأشبّ فيهم نآر مَا تترك عروق !

مروا علي قبل الرّحيل -استريحوا
................ يا اللي تركتوني على مُرّ نوحي
مروا علي ثم ودّعوا واستبيحوا
............... يا اللي سكنتوا في عيوني وروحي
فنجالنا ذوقوه قبل ان تشيحوا
............... يمكن مرارة بنّنا مثل بوحي
بأشكي لكم لذّات حزني وصيحوا
............... فنجالكم ما هزّه إلا جروحي !

يا معَوّج أسلاك الدفاتر وأضلعي..
........ جفّفت حبر وحبر جفّ وما روى..
ملّيت بك سطر المشاعر وأدمعي ..
....... لا جيتني جرحك مع أكفاني سوى!

عند الإشاره.. يكون الجَرح كـ الآتي ..
................... ضيقة ألم عيّت تضم حروفها بيتي !
بلّغ عيون المودّع من تحياتي !
................... جزل الدموع اللي تثنّيتها (ميتي )!



عُذرا لـ الغياب وَ الإطـالة !
ما أسلف من الـ شّهْد الدوسريْ !