أعانِق بِكْ أمل ما ماتْ

[رشا عرابي]

" مِن "
حَرف (ن) زَرع لَهفه
وضَيّعها الزّمَن لِيْ ضَاعْ
تِواريني أبـَــدْ رَجفه
ولا يِهدى حَنيني سَاعْ

" في "
جوفي وَلَهْ باقي
يِهَدهِدْ عَبرة (ن) تِنسابْ
تَناهيد الوَخَزْ شوقي
وطِيفَك حاضِر(ن) لو غَابْ

" عَن "
نَفسي أيــا نفسي
أَعانِقْ بِك أمل ما ماتْ
وِيِهمِس لي العمر : إنسي !
وتَرفض روحي الإنصاتْ

" إلى "
حرف (ن) يِجرّدْني
مِن الواقِع إليـــن إنتَهْ
ويِـنـزَع لَهفِتي منّي
يِلَملِم صَمتيْ وصَمتَهْ

" وأنـا "
يا بَعضيْ وكِلّي
حُروف إنسان مِجتِمعَهْ
تِشابَه ظِلّك وظِلّي
ودَربْ إلقانا مِتّسعَهْ !!