غيمة مطر

[عبدالله سماح المجلاد]

المشاركة الأصلية كتبت بواسطة عبدالعزيز الرميحي

اقبح من التقصير مع قصرالنظر

ان الذي يقدر على الواجب يغيب

الحر يبقى حر والبقر .. بقر
مايسقي الظامي سراب في لهيب

لاشفت ابن عمك بعد طول السفر
ترحال عمره هده وحاله كئيب

كن له مثل وبل من الغيمه مطر
يطيب من طيب الفعول وتستطيب

ترى البناخي لو يعد من البشر
لازم يكون لوقفته وقفات ذيب

في هالزمن يغلب على الناس البطر
تلقى الصحيب ليا اغتنى ماله صحيب

يجيك كنه مالك بر / وبحر
بعيد خايب وان قرب خايب يخيب

حتى السلام اللي كتب فيه الأجر
ما ياصلك وان جاك صوت المستريب

كنه يوزع شرهة اللي بالقصر
صاحب سمو الغطرسة واللي تجيب

ماله ذكر الا قليل محتقر
ذر الرماد بعين هفوات النصيب

وان جاه ضيف يجيب له واحد نفر
واكثر حلاله يرتع بجال الشعيب !

هذاك لو يقدر على الشيخة طمر
مير انها ابعد عليه من المغيب

ما كل من قال اقدر العليا قدر
تقطع يدين القل '' لو ما الفقر عيب

القل خلا شكل باهين الصور
في مجتمع بائس من الشكل الغريب

تلقى الفقير يموت من غبن وقهر
لامن جلس ماله من المجلس قريب

عن وجهه الابلج يولون الدبر
ولا حسيب لكلمته ولا رقيب

زلة رفيقك دمحها فيه الفخر
وجهك ليا شاح الزمن واصبح مريب

بعض المعاني والجمل مثل الدرر
للغل بقلوب البشر مثل المذيب

وادهى على الجاهل من الخيبه وأمر
قلبه لنصح أهل الوفاء ما يستجيب

وأخبث شياطين البشر يحفر حفر
يغتاب والغيبة بدمه ما تغيب

غيبة لسان النذل ما عنها مفر
أكبر مفوه بالحسد واكبر خطيب

الحمق بلوى والعقل يبغى الشكر
كيف العمى لا حطو الشاره يصيب ؟

آلى بلاك الله بحمق مقفهر
اطلب من الله الصبر والله حسيب

سبق وأن قلت في نص سابق/ رائع من روائعك
معلم الشعر يضع المقتفي للجمال الشعري في مأزق كبير وها أنت تؤكد ذلك من خلال شعر مختلف من شاعر يهدي للأجيال صنعة شعر لن يتقنها بالتعلّم سوى المثابرون من الشعراء الباحثين عن الشعر الحقيقي بصنّاعه ومبدعيه
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ
الحديث عن النص من زاوية النقد لو بدئت عجلتها بالدوران فلن تتوقف لأن الحرفه والحرفنه ظاهرةً للعيان ليس في كل شطر بل في كل جمله وهذا سر الكبّار أيها القدير