مهمــا كــــان ....

[منار عبدالعزيز]

خل دمعاتي تهل ولا تحن
.............. يمكن اصحى من غرابيل الغرام

خلني أصحى وأحلامي تجن
.............. لين ربي يجعل آلامي تنام

 

[منار عبدالعزيز]

النور وصلٍ يعاودني ويحييني
.......... ماهو إسم في قوائم والا في "لسته"

وانا سأمت التعاكس في موازيني
.......... ودي أقايس وفا قلبك.. ولا قسته!

 

[منار عبدالعزيز]

لا تلتفت أرجوك..زيد من الهجر

................. اقطع عروق الوصل.. واترك لي الهنا

بعض الفراق علاج لجروح العمر
................. وانت اقترابك جرح .. ما يلزم لنا

 

[منار عبدالعزيز]

يا عالقٍ بالروح لا تنسى مواعيدي

............. تو الوصال وتونا نحسب الساعة

أبطيت واغصانك ما طالت عناقيدي

............. مدري متى هالحال تتحسن اوضاعه!

 

[منار عبدالعزيز]

غبت وتركت الوقت باحزاني لعب

.............. لا قلت لي "راحل" ولا قلت "الرحيل"

يا من تسبّب لي بهالات التعب

.............. دوّر بدالي كود تلقى لي بديل

 

[منار عبدالعزيز]

استجرت بطيب فالك .. جيرني
............. من بقايا الضيم واسباب العنا

انتظرت اسراب حب تشيلني
............. للبحر.. للحب.. وانوار السنا

اعتبرت الهم حاصل.. ردّني
............. من تفاصيله إلى بر الهنا

واستشرت الكون بعدك.. دلّني
............. عالحروف وجيت ابكتبها..هنا

 

[منار عبدالعزيز]

فيض الشعور ينادي أهداب عينك

.................. ويقول حي اللي غيابه مطوّل

ما شفتني رهن لإشارة يمينك؟

.................. والا العواذل عادوا يطرون لوّل؟!

 

[منار عبدالعزيز]

جعلي على دربك كما غيث معطي
.......... ياللي عن الناس بكلامك تساميت

عجّل على قلبي فرح عام مخطي
.......... وازداد لك بوحٍ ينادي بكل بيت

لا تبتعد، واتحمّل اليوم سخطي
.......... على البعاد وباللقا قول انا جيت