أجنحة وأغاني

[مشعل فايح]

ما تعودت انكر الما ولا اخون الرغيف
ولا تعودت اشرب من المودين الزلال
ولانبت عظمي من السحت والنحت الضعيف
ولا ربيت بكنف فرعون يا بنت الحلال
آدميٍ يعرف الغرب والدرب المخيف
كثر ما سارت به أقدامه دروبٍ طوال
من عيونك شفت ماضي وبالحد الرهيف
أنقتل مستقبل وضاع حلم وشان حال
تعشقيني طيب أشلون بالعهد الشريف
تكذبين بكل جرأة على اول سؤال
والله أني لولا هالما واصلي والرغيف
ما تكلفت المشاعر وطولت الحبال

 

[مشعل فايح]

اقلّب الأيام بين الأصابع
على ضفاف الحزن / والفرحة شراع
مدري مسافر.. او من البعد راجع
او عابرٍ عاثت به امواجه وضاع
أيام.. مرتني وراحت مواجع
وأيامٍ اتجاملني وترفع ذراع
فكتابي / اصحابي رجالٍ بواتع
لكنهم / مدري ثقيلين الأسماع
وأقول.. يا رب البحر والزوابع
وراهم أطفالٍ وحيدين وجياع
ما الومهم واعدّ عمري واتابع
أهلي وهم أهلي رضوا بارد القاع
ولي من خصيب المورقات المرابع
روضٍ رطيب وطيب مسكٍ ونعناع
الغربة اللي وشمها صار طابع
على جبيني مالها عنه نزاع
تحبني واحبها حب واقع
حب الرفيق اللي تطيعه وتنصاع
هالناس.. اذا ما حصلت بك منافع
اعزهم عندك تشرّى بك وباع
ويا بنت.. جيتي جيتي انسان رابع
للغربة وطيفي وشعرٍ به صراع
يا تعتقين اصابعٍ من أصابع
يا تركبين البحر.. مع أول شراع

 

[مشعل فايح]

حالة تعب .. بس الصبر يا ابيض القلب
بشويش تمضي هالظروف العصيبة
نكظم مواجعنا ولا يشمت الكـ
موت الشعور ولا حياة الغليبة

 

[مشعل فايح]

لا هذا مكاني ولا هذا أنا
مين اللي رماني*بدروب العنا
وقف يازمان
مهو كان اللي كان
واتركني هنا

لا هذا مكاني ولا هذا أنا*
مين الي رماني بدروب العنا
في عيوني مدينة*
من ماس وذهب
وفصدري سكينة
من ضجر ولهب
وقف يازمان
مهو كان اللي كان*
واتركني هنا

لا هذا مكاني ولا هذا أنا
مين اللي رماني في دروب العنا
في صخر الرواسي
في عتم السحاب
في أملي في ياسي
في وجع العتاب
وقف يازمان
مهو كان اللي كان
واتركني هنا

 

[مشعل فايح]

الليل يافارس رفيق السهارى
رمى عباته عن كتوفه وبينت
هزيل في وجهي سنينِ حيارى
غريب فيما صرت عن كل ماكنت
في كل ليلِ مر كنت اتدارى
عن صبحي الفضاح والليلة اذعنت
خل الجروح اللي بصدري تبارى
تبين يمكن لا تبدّت تحسنت
الأمر أكبر من قلوب العذارى
ياليتها كانت معاناتي فبنت
بي همّ ياس وهمهمات الغيارى
عليّ يوم استنزفوني تكفّنت
اجاري امواتِ بما لا يجارى
واساري افلاك ولا يوم برهنت
واداري سباعٍ وهيّ بتثارى
واباري احراش قبل ما تكوّنت
واجاهد جموعٍ خباث وسكارى
واعاند جبال الذهب ما معي سنت
واكابد عطوبٍ جداد وخدارى
واناكد ضلوعٍ تخشّب ولا لنت
ويوم انجلى ليل الستر والسهارى
رما عباته عن كتوفي وبينت

 

[مشعل فايح]

يصير يا دكتور.. وشلون ما يصير
لا تحرم الراحل من اخر أمانيه
مليت من هذي الابر والعقاقير
واللي بروحي صعب مثلك بيشفيه
ارجوك كملها بلا أي تخدير
دامه معاي اشلون ابرحل واخليه
لا تطفي عيوني قبل روحي اتطير
ولا يوقف لساني وهو يبتهل فيه
جاني بعد ما انهيت كل المشاوير
وانا الذي من عام تسعين اناديه
جاني مثل ما راح.. من دون تغيير
لولا الدموع اللي تزاحم بعينيه
لمسة يديه.. لميّت الحسّ تصبير
وبسمة شفاهه ميّت القلب تحييه
دكتور.. تكفى .. قصّ حبلك عن الطير
ماله جناح يطير لا تنشغل فيه
وارجوك كملها بلا اي تخدير
دامه معاي.. اشلون ابرحل وأخليه

 

[مشعل فايح]

مهزلة..
هذا الجواب اللي يدوّر أسئلة.
انا لا سيد زماني
لا ولاني عبد له..

مهزلة..
لو ظهرت من السنين.. بلا أنين
وما انتهيت من الحنين
والعيون الراحلة
والمقبلة

مهزلة..
بعد باريس اليتيمة في الفصول
تلبس الأزرق لباكر.. يشبه امسك
عطرك ( الفينول )
وكل شي ممكن تشوفه
الا باكر.. والا شمسك..!!
واللي يحصل تجهله

مهزلة..
ترمي وجيه الأسرّة
.. بابتسامة مُرّة حيل
تشبه احساس الرحيل ..
للي ما مرّ الحياة
الا قليل..
ودمع كل اللي معاك..
في عيونك تحمله

مهزلة..
قالوا باكر..
بعد باكر..
اللي بعده..

يا انا.. يا هذا ( باكر)
صرنا فعلاً مهزلة

 

[مشعل فايح]

تتوه في عتمة حروف..
منهو اللي غاب..
ومن هو اللي عاد من الغياب
مابه احد.. غير الظروف..
وطفلٍ كبر تحت احتراق الشوق
واهله.. والصدف
كبر كبر لين الفراق
وبعده وقف.

اخوانه صغار كبروا
الا أهو..
ما زال تحت الشمس واقف
يعترف
ما عاد له غايب يعود
وما عاد لاحلامه وجود.

مرت سنين.. كل شي يكبر الا هو.
روح ذبلت تحت الهجير
والكون من حوله كبير
وهو صغير
ولا تحمل هالجسد..
ملّ وبَرَد..
تحت الهجير.. ملّ وبَرَد

ريح عصفت.. طارت به لكل الدروب
شرق وغروب..
كانت تدور له دوا..
كيف الدوا ..
باريس غيمة من ترف..
تمطر على الغاوي سلام
وسلام يا اللي تحتضر.. مالك دوا

برلين.. قطعة من غسق..
حتى في ساعات النهار..
اشجار خانتها الثمار..
اما الجذر... ماله دوا

لندن حبيسة للسراب من البكا
لا هو حقيقة لإرتياح
ولا هو وهم يلقى سماح
ولا هو جراح.. ولا دوا

لوزان..دمعة من جنيف
مثل الفقارى والرصيف..
تبكي الشوارع همها.. كيف الدوا

روما.. غريقة في السدور
ما للبحر طاري سوا
عاش الرئيس بهالحضور
ومات الرئيس اللي غوا.. وين الدوا

وفجأة.. انتهت به رحلة العصف
وترامى في الحضيض
اوهايو.. رماح ومقاصل
والنقيض.. اخو النقيض..

وهو ما كبر.. بعده صغير وما كبر.
طول المسافات البعيده
شتته
وتيه الأماني فتته..
فجأة .. جته.
ماله حبيبة ولا أمل.
لكن جته.. مدت يديها ضمته.
تحت البياض..
وهو كان غارق في البياض
الزائرين من الفضول
كانوا بياض
الساهرين لرحمته
كانوا بياض
ولما جته.. كانت بياض
طيف يناديه: اقترب..
حتى ارتمى ومن ضمته
فجأة كبر..
من ذاكرة طفلٍ صغيرٍ من سنين
فجأة كسا راسه بياض..
فجأة كبر..
وصارت تجاعيده مدينة
حاكمها فرحة وامتعاض

وتتوه في عتمة حروف
من هو اللي غاب
ومنهو اللي عاد من الغياب
مابه احد..
سوى السنين..
وجذوة حنين تنطفي
كلما سأل وين الدوا
ولا لقى بعد الشقا
ايّة جواب.