شبــَّاك الوجــــــــــــــــع

[عبدالعزيز العميري]

وطن وش جابك الليله خناجر والصدور جْراح ؟؟!

 

[عبدالعزيز العميري]

حليمة مواطنة في بلاد ما قبل التاريخ ...كانت تمتد بلادها من خليج الحرية إلى محيط الشمس ..






بعْـد ما طار الحمام
جيتي إنتي ذابله
من الف عام
ياخذك حزن الليالي
للضياع
وْترجعي للضيق وحدك
تلعنين الجرح وحدك
وْتنبت الغرفة وطن
تملاه أحزان الغياب
وْترسمي كل الوجوه
تـْصير حيطانك بلاد
لابسه ثوب السواد
وانتي وحدك
تغسلين بدمع همك
وتكبر بْصدرك
جراااااااح
ياحليمه
الاماني
والمقاهي والتكاسي
كلها طابور خامس !!!
العني نظرة سوادك
بسَّ لاتـْخوني بلادك
ارمي كل احلامك الخرسا وراك
كذَّبي اسخف سلام
واهربي
من كلَّ شي
حتى دمك !!!


ياحليمه .. ياحليمه .. قلت لك مليون مره
______________ [المخابر] ... ظـلنا اللي مايواريه الظلام !!

/
/
/
/
/

 

[عبدالعزيز العميري]

من التاريخ : بعد قطع النفط على الغرب .. خطاب البطل الشهيد الملك فيصل طيب الله ثراه .. ليتهم كلهم كانوا كأنت ؟؟!!!ليتهم كانوا كأنت او بعضا منك ؟؟؟

رحمك الله واسكنك فسيح جناته ..

 

[عبدالعزيز العميري]

حالي تعَبْ أدْرِي غيَابَكْ مقادِيرْ

جَالسْ اخيْط الجْرح لكنْ دميْتَه

 

[عبدالعزيز العميري]

المشهد الاول من وفاء العصافير :




(1)

لاتخاف
راح اشيلك فوق جنْحاني واطير
بس ابي منـْـك الصمود
كلها لحظه
واعووووود !!!!


(2)




لاتموت
احْلامنا صارت مقابر
وْباكر السرْب بْيهاجر
لاتموت
كل هالاسفلت ظالم
لاتموت
كل هالاسفلت جاير !!!

(3)

بعد ان فارقت عصفورته .. الحياة ...




للضمير
آنا اسف
دام هالشارع حقير
اسْتسلمي للموت أرحم
وانا بصْـرخ
في البراري
والغصون
انّ هالشارع حقير!! !!


/
/
/
/

 

[عبدالعزيز العميري]

المشهد الثاني ( إلى الانسانية ) :

طفل يبحث عن فتات ..من القمامة .. لكي يصلب به عظامه ..





ماتحرّك اي ضمير
ولو تموت
ياصغير
دامك العاري الفقير
موت جوووع !!
/
/
/
/

 

[عبدالعزيز العميري]

المشهد الثالث : اتت إليه غاضبة .. رمت إليه الدبلة على الطاولة ...ثم ذهبت بغير رجعة !!!




ياحسافه
يوم كل اللي مضى
يبقى مجرد [دبلة ٍ] في طاوله
تنشال من روح الاماني
ثم تموت !!


[دبلتك] كانت حياة انسان مجهول المصير
_______________ كل ذنبه كان له ماضي قديم وْ تجربه
وين ما حاول يهاجر كان له شارع [ضرير]
____________ رغم صدقه في شعوره بس قلبك كذ َّبه
امس جفت في حقول الحلم زخات العبير
_______________ والحزن الجم شبابيك الضجيج المتعبه
في شرودي الف خنجر يطعن بقلبي الكسير
_____________ فكري المتعب شتات وْما قويت آرتـَّبه
ودام جبتي سيرة الماضي لتعـذيب الضمير
_____________ اسمعي كل الكلام اللي بدينا نكتـبه
شاعرك ما عاف [مريم] بس اقدار المسير
______________ شالها في كاس حلمه ثم راحت تشربه !!
/
/


لا ادري من اين جاء إلينا تقليد مايسمى بالدبلة ... !

 

[عبدالعزيز العميري]

المشهد الرابع : جلست وحيدة .. تناجي حزنها..




ياوحيده
قومي إصْحي
الشجر عاري حزين
والصحاري
كلها وجه انكسار !!

/
/