فايق عبدالجليل ـــ يعودْ ولَكِنْ !!

[حنان محمد]

رحلات سندباد


عيونك سود
وقلبك للحنان اسود
تروح وتعود
وفي الحالين معاك أسعد
أحب منك حنان وظلم
أحب الحلوه والمره
وحبك طوق ما أقدر على كسره
أتكسر مثل موجه على صخره
مثل بسماتك الصفره
ولما أبعد . . .
اصير اجزاء من ذكرى
ويعصرني الصبر
قطره بعد قطره

* * *

عيون الدود
تاكلني . . .
عيون الدود
وانا بعدي . . .
احب تحنانك المحدود
قلبك للسحاب مشدود
وتهمس في أذوني . . نعود
وارجع لك . . .
أرجع واختصر الحدود
وادوس الشوك
عشان احمل معاي ورده
ضعيفه اسنين . . ما أنكر
هذا الواقع موجود . .

* * *

رحلاتك
تركها سندباد ومات
وانت في سفينه
ادور الملذات
ترحل من خصر سمره
وترسى في صدر شقره
وصور رحلاتك الحمره
عليها من النساء قبلات
يا موهوب في الرحلات
شراعك في البحر . . .
. . . آهات
يا ليت اتحس . .
يا ليت اتجرب . .
. . الدمعات
يا ليت اتغوص بأعماقي
مع التنهيده . . .
. . . والآهات

* * *

اتمنى اتحبني . . .
. . . نعم اتمنى
وتكون ملكي وحلالي . .
النار والجنه
انا طفله . . عليك ابكي
انا محتاجه اتهنى
عوضني
عطني فرصه . . أتهنى
كل شئ في الوجود يلين
حتى يصير مثل الطين
وانت يا قدر قلبي . . .
عنود اسنين
حبيت العناد منك
وحلمت آكل معاك التين
وذاب التين
وراح الموسم الزاهي
وعاد الموسم الزاهي
وذاب الامل المسكين . . .


فايق عبدالجليل . . .

 

[حنان محمد]

(( إنتي وين ؟ ))


انا لولا عيونك .. عمري ما حبيت
لا سافرت .. لا دوّرت .. ولا ناديت
لا صحيت احلامي .. ولا منّيت أيامي
بحبيبة .. أو بيت
إنتي وين ؟؟

تعبت مني المسافات .. تعبت مني المطارات
انا بكل المدن مريت .. وأنا من غربتي مليت
عاشق .. انثر شوقي .. في صوتي إذا ناديت
إنتي وين ؟؟

تايه يا عمري سنين .. في غربه وعذاب
ابكي نغم .. اتبع وهم
وشايل عذاب
لا شوق يوصلني .. ولا عنوان
لا حب يرحمني .. ولا نسيان
إنتي وين ؟؟

ياللي حياتي .. من غير ذكرك ما تطيب
إنتي امل يبعد .. واحس انه قريب
يا انتي يا مني .. يا صوتي يا فني
يا صوت الفرح .. لاجيت بغني
إنتي وين ؟؟

تعبت مني المطارات .. تعبت مني المسافات
أنا بكل المدن مريت .. وانا من غربتي مليت
عاشق .. انثر شوقي في صوتي .. إذا ناديت
إنتي وين ..؟!

 

[حنان محمد]

حدود الشوق ..


يوم .. شهر
سنه .. عشره .. عشرين
خطوة .. ثلاثه
أربعه .. الفين
أعرفك يوم ..
لازم للهوى تعودين
تحديتي ..
وقلتي كلام .. تحديتي
تركتيلي السكوت ..
ينام في بيتي
واشوف هناك
كلام هناك
كلام يقول حبيتي
مهما انت تمردتي
مهما انتِ توعدتي
ومهما انتِ على آخر غصن
في الدنيا حطيتي
أكيد لازم تعودين
لانك في حدود الشوق مرّيتي ..

 

[حنان محمد]

الفراشه المغروره ..


لف ودور
على الشمعه الحزينه
انت يا سبب حزني فراشه ادور
والفراشه لو تدور اسنين
لازم تحترق في النور . . .

سور في أحاسيسك
. . . وعلى السور
خل بينك وبين الشوق
سبع بحور
هذا النور
قصدي الحب
وراك يدور
وراه أدور
وانت لو تدور اسنين
لازم تحترق في النور . . .

 

[حنان محمد]

الكلِمَة فضاءْ
ونحنُ عَصافير . . .

فايق عبدالجليل

 

[حنان محمد]

ضيعنا القدر . . تهنا
فرحنا راح ودعنا . .
وانتهى كل شئ معانا كان
بس الحب يربطنا
نحبه سنين ويحبنا
ضعنا والهوى وحده يرجعنا . .

الزمان اللي عرفنا كان
عنود واجسى من الحرمان
خذانا للفرح مره
وعشر مرات للاحزان . .

ضيعنا بدروب الليل
ذوقنا الالم والويل
ياروحي تعال انذوب
ونكتب للفرح مكتوب
يمكن الفرح يفرح
يمكن الحزن يسرح
يمكن الزمان يتوب . .

ليش انضيع . .
وفرحنا هناك ينطرنا
تعال انبيع
ضياع سنين ضيعنا
ورا ليل الوهم . . . دنيانا فرحانه
وعش صغير . . الفرحه مغيره الوانه
ليش انضيع . . ليش انضيع . .
. . . وهوانا خضره اغصانه

 

[حنان محمد]

بطاقة العيد . .

عيون الناس . .
قلوب الناس . .
بين الفرحه والموال
وسط العيد . . .
وانا اصبح وامسي
على الباب الحديد
مر أحد واثنين
وثلاثه واربعه
مر الخميس والجمعه . . .
والسبت بغيومه والرعيد
وانا على الباب الحديد
تمطر سما عيوني
من الداخل عذاب
تهزني افكاري
ترسيني بعيد
والمشكله . . .
بعدها نفس المشكله
بعد الحلم . . .
نفس الحلم
وبعد العيد في عيوني
مو لابس سوى التنهيد . . .

 

[حنان محمد]

..


لا رساله منّك .. ولا عنك خبر
مليت الألم .. مليت السهر
ومليت اشوفك في منامي والصور
وراح العمر .. شوق وصبر
وبس الألم .. باقي لنا