...... ياغليّم
يا (غليّم) رح على أمك ونام
مالك بفن القوافي والخطب
الفصاحة ثوب للناس الكرام
ماهو لمن باع حظه بالذهب
ايه أنا طيب وابادل باحترام
لكن لساني به سقام وعطب
ماخذيت (ال) باكياس العظام
ولا كسبته بالتزلف والنصب
من تجارب قاسية كلها جسام
علمتني كيف أحصل عاللقب
اشهد انك نسل عالين المقام
الرجال اللي خذوها بالكسب
بالفعول الغانمة شالوا وسام
لكن الله مستعاني بالعقب
يا(غليّم) ماعلى مثلك ملام
ماانت ندٍ بالمكارم ونحسب
وشلّتك ماعندها رد السلام
بالسُكر والعربدة شادت نصب
الرجال أفعال ماهي بالكلام
لاقصر فعلك تغنّج وانطرب
الصعيبة تهون بعيون الهُمام
والهلاش يشوف بالهين صعب
والمذلة ماهي بطبع القطام
يكفخ بجنحان ماكلت طلب
ثوبك اللي تلبسه هذا حرام
انت مثلك للصراير والحلب
بني هاشم بالنبي سادوا الأنام
فيهم العباس.. فيهم بولهب
احشم ابياتي عن الماله ذمام
وعن طراطيرٍ تستر بالنسب
الهجا فنٍ وله فعل الحسام
مانجرده لسرابيت العرب.
عبدالكريم العفيدلي