اشــدُّ مـن الشِــعر !!

[فيصل بن عسكر المهلكي]

اوقف مسير الظلم لو انّك اعزل
........ دباّبة العدوان ماتزرع إقدام !

وافتح ضلوع الصدر للموت ..ينزل
........ على بطون الخوف ..والذلّ ظلاّم

 

[فيصل بن عسكر المهلكي]

عيّا طريق الشوق يمشي لآخرك
............ واولك بُعد وضيق واسلاك شايك !

نامت جفون امسي على حلم باكرك
............ مع صوت يزهمني وانا اقول : جايك

على الاقلّ اليوم يجرحني اكثرك
............ ورى حنين النور فوق الارايك

عجزت من حيلي على حيلي اقدرك
........... قصة ذهب يصدأ بلمعة سبايك

آسف حبيبي : لو بعد كنت فاكرك
............ نسيان درب الشوق بلحيل شايك

 

[فيصل بن عسكر المهلكي]

وش بقى في القلوب وموج الاشواق هادر
.......... حزّةٍ جات بين الروح واعماق سلمى !

اكتسي بالشروق وليل الاحلام ... غادر
.......... لو سترت المواني .. ماستر عيني .. الما

سلمى لاتتركيني .. للقصيد النوادر
.......... كل ماجبت بيتٍ للحزين .. اكسب اثما

اذكره فيك وانسى بانّي اصلاً مٌغادر
.......... واحطب العمر واشعل للمواليف ظلما

 

[فيصل بن عسكر المهلكي]

ضاقت الدنيا على القلب الرحيب
........ حتى عود الوقت / وقت وينثني

العمر شمسٍ تهادى .. للمغيب
........ياغزير الشيب تكفى ردّني

للزمن والناس والخلّ الحبيب
........ والنشاط اللّي هواه يهزّني

ياغزير الشيب : هل حان المشيب ؟
........ ماتحنّ بحال : شايب منحني

ان غدى قلب المروّه .. قلب ذيب
........ من نحاس الناس .. يظهر معدني !

 

[فيصل بن عسكر المهلكي]

هو يستحيل النوم من مقلة العين
.......... او انّ غفوات القهر حسْب الامكان !

من يحبس احلامه ورى خاطري .. مين ؟
.......... ومن يطلق جنوني معه .. خلف قضبان

ياليتني شدّيت حبل العنـ وين ــا
.......... ولاصار لـ كتاب الغرابيل .. عنوان !

مثل الامل مبطي يمارس بي الطين
.......... من فوّهة ثلجٍ يبي يغيظ .. بركان

وش اصعب من السجن .. لولا المساجين
.......... لاصار وسط السجن رجّال .. له شان

 

[فيصل بن عسكر المهلكي]

يادروبه
واثرنا ظلما عروبه
في خطاوينا
... للشوائب وجه داكن
لكن اجمل في شحوبه !
للثرى : طارت ملامه
شامخه تحت الاماكن !
مالقت حتّى قمامه
فاضيه جنب المساكن !
وينها روح العروبه ؟
وينها روح العروبه ؟
واصلاً : اقصى شي نستنكر ونشجب في عذوبه !
يالهذا الليل قصّه
مانتهت رغم البدايه
باقيِ في الحلق غصّه
والجروح اللّي بحشايه !
يالهذا الليل معنى .. ان حضر وان غاب .. معنا
والمرايه .. ماتبالي .. لوتجيب وجيه منّا!
هي كثير ... وقلّها فعلاً كثير ..
هي كثير
اقلّها : شوف الضرير اللّي في بالي !
هي فلسطين الضحيّه
تنقتل وتعيش فيّه !!
ماعليّه ..
لوبكيت سنين .. والعين محجوبه !
راضي بدمع العروبه
لو فلسطين مغصوبه !!

 

[فيصل بن عسكر المهلكي]

ماعاد لي قلبٍ حبيس النّور
......... يشتاق للهجران فـ غنايه

بدا يجمّر صالي الديجور
......... لاصمّل الساري على رايه

مرْني صباح وسنْبل وعصْفور
......... ولاحدٍ حكالي عنّي .. حكايه !

مـ اخترت اكون الخاطر المكسور
......... كانت وسيله برّرت .. غايه

حتّى صباح القارب المهجور
......... قصّ البعيد .. اخباره الجايه !

سولف : ضباب وموعدٍ مهجور
......... لـ ضْفاف نهْـر وساحل منايه

ياصاح : مادام الزمان يدور
......... لاتهت ؟ .. قبلك واحدٍ تايه !!

 

[فيصل بن عسكر المهلكي]

باب الزمن واقف على درفة مسافات الثواني
........... من قُربه : اشعر بالسنه .. عقرب ثرى .. تلدغ ثريّا !

عيني بعينك ياصبر : عنّيت رجلي في مكاني
........... وَصَلْت اراوح بيني وبينك / وخطواتي .. هنيّا

ياليتني لاشبْت ماشيّب ولي بعض الاماني
........... لاقلّوا الاحباب من زوّادة القلب .. اتـّـــهيـّـا !

ناديت باصوات السنين السود : جدران المباني
........... ماردّ طين الراحلين .... وحاجتي تملا يديّا

خلّوني اعيش بزمانٍ جاهلي .. ماهو زماني
........... كلْ مازهمت الجرح في حاجة سؤالي قال : هيّا !

برحل مع الذكرى .. سفير احلام .. متغرّب عشاني
........... وان جبت للحلم المقفّي ( حلم ) ثاني منه : عيّا !!

مال الزمن .. غيري زمن .. والعمر ماسدّ بمكاني
........... ان غبت لاتبكين : ياعيني عليّه / هي جفيّا !!