خ ي ا ن ه

[عبدالحميد بن ناحي]

لمن له الفضل في هذا النص

الرجاء ربط الأحزمة

.

.

[poem="font="simplified arabic,5,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]ماجهلت من الجهل لو كان بالدنيا جهاله = البحر عاتي وانا ويّاك في وسط السفينه
خذ على صدر الزمن جرحي على الدنيا دلاله = كان ماتدري عن اللي يجرح القلب ويهينه
جيت لك قلبي كذا ماله على الدنيا ولا له = منتحر بالشوق هايم فجّر ظلوعي ونينه
كان لاشافك بضيقة ضاق بك من ضيق باله = وكل لحظة حزن في دنياك تفقده السكينه
حط لك في وسط صدره فرش واركالك دلاله = ولا ذبح لك من معاليق الحشا غير السمينه
والله انّك تذكرين انّه وهب عينك حلاله = ولك مشى حافي عشان يجيب شي(ن) تطلبينه
والعرب قالوا ترى الطيب قدر يعطي عياله = ولك حبيب وطاب لك وش عاد يترك بالخزينه
وانت ربح المال عند اللي خسر لك راس ماله = ماحسب دينه عمى عينه على ماتشتهينه
حطّ حبك فوق اخوه وفوق عمّه قبل خاله = لعنبوك اسرفت به واصبحت ثالث والدينه
دام لجلك كل شي(ن) مستحيل(ن) قلت ناله = بك تحدى ابليس قبل الناس لاتصبح لعينه
قال لك وانتي عليمه في كلامه يوم قاله = مابغيتي من حياتي في حياتي تملكينه
الله اللي لك عطاني من جلاله في جلاله = وصرت بيدينك وانا عبد(ن) ورزقي له ضمينه
حبّك اللي كنت انا سكران به حدّ الثماله = حبّ طاغي ماعلى هالأرض حبّ بنفس دينه
كنت احبك رغم تقصيرك واجي مشتاق واله = ولا سألتك ليه تخلف بالوعد ماقلت حينه
كنت اجي يمّك وانا لي قلب وجه الموت جاله = ودي اغفى وسط حضنك واترك العمر وسنينه
آه ياوجدي عليك ان جيت لك والحال حاله = وجد طفل(ن) والده في ليل عيده دافنينه
قام صبح العيد لابس ثوبه اللي قد شراله = وراح ينشد كل واحد والدي ياناس وينه
مانشد يدري يبي ياخذ بعد عيده رياله = ولا درى ماعاد به باقي لقى بينه وبينه
ووجد قلبي يوم تخلف بالوعد وتروح داله = وجد من راحوا به العدوان من قومه رهينه
كبّلوه بوسط سجن وزوّدوا فوقه حباله = وقالوا اركد لاتضايق امّك بجنبك سجينه
قدم عينك بالسياط الجرد نسقيها النكاله = وانت مالك غير قيد(ن) في يدك تسمع رنينه
ووجد قلبي يوم خنتي من معك ضحّى بحاله = وجد فارس قوم خان السيف يمناه ويقينه
جوه من قبل المغيرب قوم مطلبهم قتاله = خيلهم طفح وبواترهم باياديهم سنينه
والتفت ليسار والياخوانه الستّه قباله = قال لاوالله وفا الديان في ذا الليل دينه
قال خيال الكحيلا مالعمر العبد طاله = ارمحي ياخيل ابوي الفعل عندي تذكرينه
ويوم ناطحهم وقف محتار واللي شاف هاله = في يده سيفه وقدم العين ناس(ن) طالبينه
كلهم ربعه ودمّه من بني عمّ وسلاله = وكلبوهم ذابحينه ذابحينه ذابحينه
قال يايمنايّ كان السيف في ربعي مجاله = عرق قلبي يايميني كيف ودك تقطعينه
ويوم صكوا طالبينه صار للموت اجتواله = قال ردّوها ترى حلق الفتى دونه يدينه
صاح وين اخواني الستّه زحازيح الرجاله = وينكم ياعيال ابوي العود حال اليوم شينه
ويوم ناظرهم ولا فيهم عطا .. رد لسؤاله = أيقن اخوانه معادينه ولا هم ناصرينه
ويوم كل(ن) جاه رافع سيف والمقصد زواله = صدّ عنهم طيب يوم السيف خانت به يمينه
يوم قصوها وطاحت خمّ سيفه في شماله = وانتخى واثره لحاله مامعه واحد يعينه
ويوم طاح من الفرس والفال الاقشر صار فاله = جاه رمح من اصغر اخوانه وطبّ بوسط عينه
قال شلّ الله يمينك مابرمحك بي بساله = ان ضربت اضرب وخلّ الراس من ضربك عجينه
ذاك وجدي يوم وجدي فيك يضرب به مثاله = وكل وجد(ن) فيه جرح القلب يفضح به كنينه
وش بقالي منك ولا خافقي قل وش بقاله = ذنبه انّه قال احبك قول وانتي تسمعينه
كنت الاصدق يوم الاصدق حبّ بين العوج شاله =قلب بيّن مايبي له شمس غيرك تستبينه
آه منك ومن ضماك العذب يوم اشرب زلاله = بعتني ماكنّ هذا القلب غرقك بحنينه
لعنبوك القلب قلبي مامعي قلب(ن) بداله = كيف تعبث به واحسب ايديك في قلبي أمينه
بس واللي باليقين ارسل مع الطاهر رساله = غير تاخذ من يقين العلم مايقطع وتينه
تحسبين انّ الخيانة جرح وتروح بسهاله = ولا على بالك أجيك وكل زرع(ن) تحصدينه
ماقبلتيني غلا والشمس من نورك خلاله = اقبليني ذنب مايغفر ولو تستغفرينه
دامك البدعة وانا ادري ترجع البدعة ظلاله = والله انّي لاكسرك كسر(ن) صعيب(ن) تجبرينه
انتظر والظلم له معنى مع الظالم عداله = لادريت انّ الدموع اللي ورى جفني ثمينه
هان قلب وهان عمر ولا بقى طيب وجماله = وفي دروب المغترب ضاعت عناوين المدينه
وطاح من عرش الدجى نجم(ن) عليه النور هاله = فوق دفتر شاعر اظلوعه على قلبه حصينه
وانكتب حرف استحاله فوق سطرين استحاله = في نظر عاشق لقى عشقه على الدنيا يدينه
قال ذا عذر الجهل رد البرا عندي جهاله = والبحر عاتي وانا ويّاك في وسط السفينه[/poem]