هات لي قصيدة وعلاقتك الـ شعريّة معها

[عبدالعزيز رشيد]

لـ [سليمان المانع]
قصيدة كنت قد حفظت أحد أبياتها فبتّ أبحث عنها في كلّ مكان ولم أجدها إلا بعد سنتين وبعدها أدركت بان القصيدة كانت تستحقّ ذلك فعلا

هذي ثلاثيني تعدّن وحسيت
ـــــــ لوهن تعدّن داخلي ما تعدّن
هن ذكرياتي لو جهلت وتناسيت
ـــــــ الله كم ودّن وجابن وودّن
وكم غنجت لي وهنفت لي وعييت
ـــــــ غبا بدويٍ يزعجك لا تمدّن
وكم عاندتني في جنون وتحديت
ـــــ عزومي رغم ما صابني ما تردّن
ويوم أنها قفت أنا قبلها أقفيت
ـــــ لاهي وعيوني وين ما أهب لدّن
رسمت بحروفي غزالة وناديت
ـــــ بالرحب يا ذيابة حنيني تغدّن
أحيان يشرب كل كل الظما بيت
ـــــ وما همني لو كل الأيام صدّن
تقول تفهمني وأنا أقول يا ليت
ـــــ عسى الهجوس المخطيات يتقدّن

 

[عبدالعزيز رشيد]

لـ [محمّد الدحيمي]
صدقًا القصيدة الوحيدة التي تمنّيت لو كنت كاتبها لألقيها بصوتي أحسّ أن للقصيدة صوتٌ صارخ وبالذااااات البيت الاخير

للترف خيلٍ غدى مركاضها صدري
ـــــ وطيور شوقي غدى مقياله عيونه
لبّا جفونه ولبّا طبعهـا الخدري
ــــــ ولبّا سواد رقد في خدري جفونه
اثره بضحكة سنونه حافرٍ قبري
ـــــ ولاكنت اظني باموت بضحكة سنونه
شرهة متونه على شلالها الخمري
ــــــ وان نثرته الهبوب مردّه متونـه
جيت اجبر الكسر لكنه كسر جبري
ــــــ مجنون والحظ ساقـه يمّ مجنونه
يتفنن بلوعتي واتفنن بصبري
ــــــ حتى غـدت لوعتي من اجمل فنونه
لارحم ابو الحظ ساق الهجر من بدري
ـــــ وشيّد جسور الجفا من دوني ودونه
واقفيت لاني ضرير ولاني ببصري
ـــــ اليا منعني الحيا ساقتني المونه
واجهمت اسوق الخطا في الدرب وهذري
ـــــ "تكفون ياللي خذوا خلّي تردّونه"
ابطى وخلّي سؤالٍ يلهـث بفكري
ـــــ مادري يصون الغلا ؟ مدري هو يخونه
ويوم اني اسجّ بين ادري ومادري
ــــ عقب البطا .. جا يقول : الدار وشلونه ؟
قلت : انت دارك هنا واشّر على صدري
ــــ قال : انت دارك هنا واشّر على عيونه

 

[عبدالعزيز رشيد]

لـ [فهد عافت]
وفي كلّ لحظة تضيق بها نفسي وأنفاسي أجد في هذه القصيدة راحة نفسيّة ومتنفّسا فأغفو بالقرب منها كأن صلة بيننا تقرّبنا

((المرجوج))
_في ذكرى من لا يحتفل بذكراه_


" جـرّة أولى " :
" ياما رميت الكيس "
عن ظهري المحني
من خوف يلمحني
قبل آصلك إنسان !
" يا صخيف الذرعان " !!

" جـرّة ثانية " :
مغروس انا في القاع
مالبـّس الــ لا ، "إيه !
" يقطعك يابياع
دمه وشاريه "

" حــالـة " :
مهدور دمي ..
يابنت عمي ..
بس الفحم مو مكحلة !
ولا الليالي الممحلة :
............... ربيع !
اقولها على شفا حفرة
من النفط ...
............. واضيع !!
{ عزيزتي وداد
البارحة كنت اغسل العشب انسرق وجهي ، نبت , و ..
الخضار : غبار .. له منقار نار، وله جناح : جدار .. وعيون ٍ جراد .
البارحة هاجر مشت أشواطها المليون في روحي بأقدام ٍمن التاريخ
والاطفال والفوضى .. نبت زمزم من البترول يشربنا سواد !!
البارحة جيت اسرق السمع لـ صهيل الخيل من باكر يجي ،
قلت التجي ،
غمضت .. داستني الجياد !! }




جـرة ثالثة :
أيامنا علبة
احلامنا أعواد
... معقودة مفقودة !
" بوقت ٍ ركض كلبه "
ينهش لحمنا زاد
.. " ونامت به فهوده " !!
جرة رابعة :
السالفة
قد قلتها في شفة ٍ متراجفة
" سم السبب ياعارفه "
" سم السبب ياعارفه "
" حالة " :
لجل السنين المقبلة
لجل الوجيه الكالحة تصبح جواب الاسئلة
كل الذي نحتاج له : -
كبريت
سجادة صلاة وتمر !
لجل انفجار السنبلة :-
خبز وثياب صغار
لجل الزلزلة
كل الذي نحتاج له : -
كبريت
سجادة صلاة وتمر !
لجل اختصارالمرحلة
لجل الفحم من غير خوف ، نقول
ماهو مكحلة
كل الذي نحتاج له : -
كبريت : سجادة صلاة
وتمر !
..............
جاني ملاك الريح
والقيد في يدينه
لكن يدي عفت !
اعطيته المفتاح
اطلق جناحينه
ريح ٍ بها لفت !
ومن عهد ذاك اليوم
بيني وبين الريح
صداقة ٍ : -
لا جيت آبطيح
...... خـفت !!
جرة خامسة :
وحيد
وحيد
وحيد
ازرع سنابل وانتظر ، تنبت رماح .
وحيد
وحيد
وحيد
اكتب على نجم ٍ بعيد :
" احد ٍ يحاول ستر "
مابه من جراح
" واحد ٍ يحاول بالردى "
ستر القصيد !
جرة سادسة :
" متىيجي في الارض بعض التدابير
................. حتى يجي للصابرين انفراجي "
طفل وفـَراش ودمعتين وعصافير
................ أموت ، واترك في حديهم سراجي !
" ثلاث ورقات وجدت فيما بعد " :
" 1 "
السفينة :
ناقة البحر الحزينة
والمواني : غلاف .
والفانوس : قاموس القصيدة ،
والقصيدة : شاعر ٍ مطفي ..
ويكفي
دثريني
- أول الكذب الحقيقة -
لهجتي بوابة الثلج ،
وعناويني : غبار !
مانام احد بفراشي البارح ، ولا لي
صاحب ٍ في الغار !
" 2 "
في الظلما ..
من يشرب البرق
ويعرف الفرق بين النار والما ..
إما نبي ، أو شاعر ٍ صعلوك !
أو أسمى !!
" 3 "
عزيزتي وداد ..
الوكاد :
إن الغيوم بتنقشع
وان الشموس اللي زرعنا في رماد
الجرح ، في وقت اللقا المسروق ،
في تلويحة التوديع ، في الممنوع
.. من كتب ٍ قريناها ، وفي موت
الصغار من العطش ..
................ لازم تشع !
يمكن على هيئة قصيد
أونار ..
أو ضحكة صغار ..
ويمكن على شكل ٍ جديد :
طفل بيده حديدة ٍ يذبح بها
.............. رجل ٍ جشع !
بس الوكاد ..
ان الغيوم بتنقشع ..
وان الربيع ..
مقبل على الجميع ،
مقبل على الجميع .
..............
...........
.....
استبشري

 

[عبدالعزيز رشيد]

لـ [قسمة العمراني]
ماإن قرأتها إلا وباتت ذائقتي تتبع خطوات حرفها أحببت أن أشاهد شرفة القصيدة خلسةً من دون أن يعلم أحدٌ بذلك بالفعل قصيدة أحسست انّها كُتبت بكلّ لطف

ناس وقفت هنا وناسٍ تروح وتجي
ـــــ وكلّ ماشفت واحد قمت أشبّه عليه
في مداهيل حقل أمشي وادوّر عشي
ـــــ فـ الشوارع غديت وفي الملامح غديه
واتحرّى واطالع في الشبابيك ضي
ـــــ وطول ليلي هنا وهناك أنادي ياهييه
آااه ياوحدتي ياكلّ حزني شوي
ـــــ وينه الليله إلا وين وصله أبيه
وين بعده ؟ أبلقى لي وطن ظلّ في
ـــــ وين ذاك الطريق اللي يودّي إليه
ليه يادنيتي دايم عليّ وعليّ
ـــــ همّ يمسي عليّ وهم أصبّح عليه !!
موحشه ياحياتي مابقى لي خوي
ـــــ غير قلبٍ يتيم الحزن واقف حديه
كنّ هذي الحياة أفول وموت بطي
ـــــ لي فقدت الحبيب اللي تظمّك يديه
وتصير هذي الحياة لرفاة لانسان حي
ـــــ لاغدى عمر انثى بدون رجّال فيه
من هنا مرّت الذكرى ومرّوا علي
ـــــ وكلّ مامرّ واحد صحت أنادي عليه

 

[عبدالعزيز رشيد]

لـ [شاعر يجاري مسفر الدوسري]
قرأتها في أحد المواقع على انها لـ مسفر الدوسري فصرخت الروح في داخل جسدي " أجمل رثائيّة .. ومسفر أجمل من يكتب التفعيلة " لأتفاجأ بعد نشرها هنا من رسالة أحد الأعضاء هنا بأنها ليست له ! بل هي لـ شاعر يجاري رثائيّة أخرى لـ مسفر لكن أعترف لازلت أقول ماقلته حول كونها اجمل رثائيّة قرأتها وإن لم تكن لـ مسفر نفسه وكذلك أعترف بأنني أحبّ قراءتها لأنها تمثّل دراما مأساويّة وواقعيّة بالفعل

يبـه شلـونك...؟؟؟
**
يبه شلونك...؟؟ملل هالــكــون من دونك ..
يبه شلونك ؟؟وتمضي رحلة الدنيا..
بليا طلة عيونك..؟؟!!
يبه شلونك ؟؟وشلون المرض وياك ؟؟
بعد ماهدك بدنياك..عساها تغمض جفونك ؟؟
تبي تدري عن أحبابك ؟؟عن عيون تغنى بك ؟؟عن قلوب دفنها الشوق..وإذا جاها الغفا جابك ؟؟
.. يبه أمي تخيلك دوم...تغني لك مع القمرا..
يبه واللي خذاك بيوم....خذا بنيتك بكرا..
خذا.. وياماخذا.. ويا ما..خذا ناس يحبونك
يبه حنا صرنا كبار..توفقنا وتخرجنا..
يبه معاد فيه صغار..يموج بها الزمن كل شي..
وحنا ماتموجنا..على ذاك العهد نسري..
نبيع العمر والدنيا..ولا تخلف بنا ظنونك
يبه شلونك ؟؟تبي تدري عن إخباري ؟؟
عن أفكاري وتذكاري ؟؟
أشيلك داخلي جمره ..وبعيون الحزن عبره..تغرقني .. وتحرقني..
أشوفك نجمة تجبر..مراعيها .. يراعيها..
وأشوفك للرجولة اسم..إذا شد الزمن تقسى..واحلم من معاني الحلم..أحسك مقبل بكرى..وعيا لايجي بكرى !!
يبه تذكر زمان مر؟؟
يبه تذكر مجالسنا ؟
مقلطنا ومجلسنا ؟
وحارتنا ومسجدنا ؟
يبه تذكر هدايا العيد ؟
صلاة العيد؟ وبشت العيد؟
يبه تذكر سوالفنا ؟
لأجل هذا ..
وكل هذا ..
أقول اليوم يايبــه ..
ملل هالكون من دونك
يبه وينك ؟؟ .... ولهت لنظره من عينك ....
يبه وينك ؟؟
أشوفه طوّل غيابك !! ... و من ودّاك .... ما جابك !!
قالوا ما يدوم الزين !! ... و أنا عندي أمل للحين ..
و لكني أعرفك وين !!
يبه وينك ؟؟
عسى الداعي يبه بس خير ؟!!
عساك بخير .... مداين تكرم لعينك ...
بس أرجوك علمني ...
علمني .. يبه وينك ؟؟
سألت أمي عن رجوعك ... ولا كني أعرفك وين !!
و قالت .. ما يدوم الزين !! ... و أنا .. عندي أمل للحين ..
في رجوعك !! .... يبه بس تكفى علمني ....
متى رجوعك ؟؟ .... يبه بس تكفى علمني .
وش أحلى من طلوع اثنين ؟؟
طلوع الشمس .... و طلوعك
يبه وينك ؟؟
سألت أمي ...... غيابك طال ؟؟
ولا كنّي أعرفك وين !!
و قالت مثل ما قالت .. حسافه ...
ما يدوم الزين ... مع كل هذا صدقني .. أنا عندي أمل للحين !!
سؤالي عنك يالوالد .. صار كما الموال
و أشوفه طال ... والله طال ..
حزين .. بلحنه و حروفه ... يخاف .. يموت من خوفه ... و قلب ٍ كان أقوى قلب ... ضعف .. من قسوة ظروفه ..
يبه ..
أرجوك علمني ...
تشوف اللي أنا أشوفه ؟؟
أنا أشوفك نهار و ليل ...
في وسط المجلس تصلي .. و تدعي الرب ييسر لي ..
يبه ..
ما عاد بي من حيل .. وين الحيل ؟؟
و أنا أشوفك نهار و ليل .. مع إني ادري ما ترجع !!
غريبة .. بعدها تدمع .. عيوني من هموم البين !! .... و ادري به مكانك وين !! ... مع َ هذا .. أرد و اسأل !!
يبه .... وينك ؟؟
و لا كني أعرفك وين !! شبكت العشر في غيابك ... على رأسٍ ٍ كساه الشيب .. و من وداك ... ما حابك ..
و لا ادري وش يخبي الغيب !! ... و جرح ٍ عذّب أحبابك .... يبه ..عيّا يخف و يطيب !!
يبه.. كل جرح في الدنيا .. مصيره بالدوا يلتئم ... و لكن البلا من جرح ..
نزف فرقاك ... بليّا دم !! ... و هذا الفرق في جرحي ... عجز يلقى الدوا دكتور .. أنا جرحي غريب الطور !!!
ينزف ... بس بليّا دم .. و زاد الهم فوق الهم ... و دام انك يبه غايب ... جروح الغيبة ما
تـلتم ..
بس عندي أمل للحين !! ... و لا كنّي أعرفك وين !!
يبه .. ذكراك تفرحني ....
في نفس الوقت تجرحني !! ... لا من جبت في طاريك ... دموعي غصب تفضحني ....
يبه .. تذكر ليالي الصيف ؟؟
عرس الحي .. و رقص السيف ؟؟
و كرم قلبك معَ هـالناس .. كل ٍ كان في بيتك ضيف ..
آلا يا حيف .... آلا يا حيف ..
زمن قاسي .. زمن قاسي ...
اخذ مني بلا رحمه ... اخذ مني اعز ناسي !!
و خلاّ لي سهر هالليل .. في عيني ضيف .. إلا يا حيف !!
يبه وينك ؟؟
تعال و شوف ...
كبرنا مثل ما تمنيت ... درسنا كل ما حبيت .. نصلي مثل ما وصيت.. و ندعيلك في كل الظروف ..
يبه وينك ؟؟
تعال و شوف .. صحيح الدنيا ما ترحم ..
تجرعنا التعب أنواع ... و لكن الأمل ما ضاع ..
و أنا عندي أمل للحين !! ... و لا كني أعرفك وين !!
يبه تذكر شطا نتنا ؟؟
أنا و اخواني و خواتي ... معانا عيال حارتنا ..
نلعب في زوايا البيت .. يبه ... والله أنا حنيت ..
لذاك الوقت في وجودك ... ألا يا ريت ... ألا يا ريت ...
ترجع .. يا يبه حنيت ..
حسافه الدنيا ما ترحم ...
خذت منا سعادتنا ... خذتك بعيد .. و خلتنا !!!
يبه أمي تذّكرنا ... بأيامك قبل ما تروح ... تناديها.. يا روح الروح..
تغازلها و تنظر لك .. مثل طفله ... ملامحها عشق مفضوح ...
في ذاك الوقت .. كنا صغار ...
معَ هذا ... كنا نغار ..
عليها .. أو بعد منها ... كنا نغار
نحبك يا يبه ... ارجع .. مثل شمس الفجر .. اطلع
حزينة الشمس في غيابك .. و نفس الحزن في أحبابك .. وأخاف الشمس من حزني ..
تغيب و ما بعد تطلع !! .. يبه ارجع !! ... اذا لي خاطر فـ قلبك ..
تعال و زورنا بس يوم... مع انه ما يكفينا.. نشوفك يوم.. نبي حضنك يدفينا .. و نشوفك دوم..
لكن قلّت الحيله ... و يمكن مـ البطا ضاعت ..
و قلنا يوم !!
يبه سامحني بترخّص ... قبل ينشف حبر الأقلام.. كلامي بعده ما خلّص..
و لكن موعد الأحلام .. حان ..
ولازم أوفي له.. بعد ما ضاعت الحيله .. أشوفك والوعد باكر !!
إذا فكّر يحي باكر..!! .. و برجع أسألك وينك !!
بس لازم تجاوبني.. ترى عندي أمل للحين !! .. و لا كني أعرفك وين..!!
يبه شلونك ؟
ملل هالكون من دونك
يبه شلونك ؟
وتمضي رحلة الدنيا ... بليا طلة عيونك
لأجل هذا ... وكل هذا ... أقول اليوم يابـوي
ملل هالكون من دونــك...

 

[هـيـفـااللاّفـي]

لـ [ الشاعر تركي عواد]

قرأت هذه القصيده بالصدفه للشاعر المبدع تركي عواد حيث اجتاح روحي واحتواها هذا النزف ..



آآآآآه .. يـــا ظـلــم المـديـنـه يـاعـهـود
الـوطــن مـنـفـى وبعـيـونـك وطــــن 0
0
مستـضـيـق ومـــا أبـــي إلا الـوجــود
بالكـيـان الـلـي رســم وجـــه الـحــزن
0
0
نـامـت عيـونـي عـلـى أطــراف الـوعـود
وخـلـوا أحـلامـي بــلا قـيـمـه وثـمــن 0
0
تـذبــل أيـامــي مـثــل ذبـل الـــورود
والغـريـب . أحـيـان .لـديــاره . يـــحـن
0
0
الـتـعــب أنـفـاس . والـرحـلـه قـيـود
سـولـفـي لـلـيـل قـضـبـان الـســجـن 0
0
سـولـفـي مـعـنـى الـرحـيـل ابـلا حـدود
وسـولـفـي صـمـت الـمـشـاعـر لا حـكـن 0
0
والـشـتـاء والـلـيـل وأصـوات الـرعـود
والـتــــشـرد .. كـل مـا دور سـكـــــن
0
0
سـولـفـي وشـلـون أحـزانـي تـزود
والـسـنـيـن شـلـون مـن عـمــري خـذن
0
0
الـرسـايـل تـنـتـظـر لـحـظـة ردود
لـلـعـيـون الـلـي يـعــانـقـهـا الـوسـن 0
0
فـرّقـونـا والله أعـلـم مـا نـعـود
والـلـيـالـي طـبـعـهــا دايــم تـمــن
0
0
شـاعـرك يـبـقـــى عـن أشـيـائـه يـذود
ولـو يــشـوف الـمـوت عـمـره مـا يـكـن
0
0
دمـعـة الـرجـال صـعـبـه يـا عـهـود
أكـتـبـيـنـي روح . وفـراقـك كـفـن . !!

[



.
.

عبدالعزيز رشيد

كل الشكر لقلبك ..

 

[صُبـــح]

لـ ( الشاعر عبد العزيز رشيد )

حين قرأتها لأول مرة تخيلت أن مايسقط في المكان هو أجزاء من روحنا وعمرنا وحبنا وأن الرغبة في إلتقاطها بعد الإبتعاد عن المكان محاولة لإعادة كل الروح وكل العمر وكل الحب ..!
هذه القصيدة الرائعة تثبت أن المكان هو وعاء تفاصيل حياتنا ولذلك نشعر بأنه يمنحنا حياة جديدة دائماً ... !




(( دروبي دار ))
كفاني ياعذاباتي تركت الدار
__________رحلت ابغى اكون العاشق الساري
سكتنا عن هوانا والهوى ثرثار
__________الا وش حيلة اللي ساكت وداري؟
بدينا وانتهينا ومانتهى المشوار
_____________يداريني يبيني اشعل اعذاري
دروبي يادروبي بانثر الأزهار
__________زهور اسمى اماكن صارت ازهاري
وفي دربي حمام البين ناح وطار
___________وانا لحالي يرفرف للهوى طاري!
غريبه كنت انا لحالي وِشِ اللي صار
____________حنين الدار مرسوله من دياري
تتابعني وهيجنتي خُطا وآثار
_____________وتقرا فـ كلّ خطوه كلمة آثاري
تشخبط بالثرى همس وكلام امطار
___________تذكّرني وجوابي صمتي الذاري
يلوح البرق وينادي عيوني دار
________________وبرقٍ يتبعه حيّاك ياجاري
كأن البرق عين دموعها مدرار
___________بها جفن الظلام بـ حزنه الضاري
وانا من وين اودّي الروح ياستّار
__________وهي ويّا الهوى برد وجسد عاري
لفت روحي ورى الظلما ديار ونار
_______________اثاريها دياري واجلبت ناري
أثاري الناس في دربي كما الأشجار
___________تساقط حكيهم مخفي ومتواري
حطبت الناس بالنسيان والانكار
____________تعب لو هالتساقط يلفت انظاري
جلست بـ عزلتي أبني بها أسوار
________رسى كتفي عليه وطاحت اشعاري
على بعد المسافه ضمنا مضمار
___________وعلى رسل النهايه ذاب مشواري



عبد العزيز دمت للشعر ...


صُبـح

 

[عبدالعزيز رشيد]

الكريمة \ سحر المسا
ولـ قلبك كلّ الـ شكر ياااه أعدتِ لي ذاكرة هذا الـ نصّ

المشاركة الأصلية كتبت بواسطة عبدالعزيز رشيد

رحلة وارتحال عبر الروح التي تتوه بحثا عن ملاذ وماكان ملاذها إلا الشعر بـ شعوره وإحساسه
قلقٌ لذيذ يعترينا حالما نقرأ هذا النصّ لأنه يرتحل بنا بعد ان يمسك بأيدينا ويضعنا امام تساؤلاته
هنا نقف ونتخيّلها [عهود] وهي تجيب على هذه التساؤلات!
ألف تحيّة لك

اختيارك جميلٌ كـ ذوقك , كان وجود اشراقةً جميلة
لـ روحك ألف تحيّة



\



الـ صُبح \ صُبح
لاأدري هل أفرحُ بـ قدومك أم باختيارك أم بـ تعبيرك الـ مبهج وبإرجاعك ذاكرة البهجة لـ ردّك هناك
وبعد كلّ هذا لاعجب لو تنبت لي أجنحة الـ فرح لأحلّق بها
تحيّاتي