ما حلا الـبراق ,, والدنيا رشيش
ـــــــــــــــــ والرعـد صوته يهش الأرض هش
والشـعاب تفيض ,, بالماء ,, والقشيش
ــــــــــــــــــ وكل طيرٍ عـاد فـي وكره وخش
طول ليله والحيا ,, يرهش رهيش
ــــــــــــــــ والمعزب قال ’’ للطرقي ’’ تعش
والصباح اليا بدا ينعش ,, نعيش
ـــــــــــــــــــ فاض بالريضان وبله وأنتعش
ماتكفيني مطالعة الدريش
ـــــــــــــــــ دش حبه في الضماير دش دش
شي نيش وشي ما ضنيت نيش
ــــــــــــــــ وشي فش وشي ماضنيت فش
فيه بعض من البشر ,, ما يستحيش !
ـــــــــــــــــ لين يلقى له على دربه وحش
الحرار حرار ما تنهش نهيش
ــــــــــــــــــــ وكل سبعٍ لا بطش ,, يعني بطش!