مسـاء الخير
:
:
:
ابـ اكتب الشعر .. دام الشعر يكتبني
واصوّره.. ثم ابَروزني .. مع الصوره !!
مرّه.. لأجل خاطر عيون ٍ .. تعاتبني
ومرّه.. لأجل خاطر الخفّاق وشْعوره !!
والليله احساس خفاقي .. يجاذبني
مابين عالي سماه .. وغبة بحوره !!
ياصاحبي صدّق احساسي .. وكذبني
ان قلت انا الحال من فرقاك.. مستوره
ودي بدرب ٍ .. على وصلك يقرّبني
ودي بصبحٍ .. يغرد فيه عصفوره
ياكثر مااشتاق لك.. والحظ يغلبني
واحلامي اللي بقت حيّه .. ومقبوره
اتركني ابقى مبعـثر .. لا ترتبني
خل المشاعر .. بوسط القلب منثوره
الحزن والهم والضيقة .. تحاسبني
وباقي خواطر من الايام.. مكسوره
والخوف من كثر زلاتي . يعذبني
والحال مابين مرتاحه .. ومقهوره
اخاطب النفس.. واحياناً تخاطبني
والنفس مابين أمّاره .. ومأموره
والصمت في عالم الضجة.. يهذبني
في وقت يشهد لفن الثرثرة .. فوره
حتى القصيد اكثره .. ماعاد يطربني
مهما انتشر في زمان الحكي جمهوره
ما كلّ مايكتب الشعـار.. يعجبني
الناس كلٍ له احساسه .. ومنظوره
والشاعر اللي قصيدِه فيه حببني
ماصار حرفه يبل الذوق وغْروره
يا صاحبي .. قلتها لك قبل تطلبني
لو هي مجرد قصيدة نظم : مقدوره
أغيب وارجع لعينك.. وانت ترقبني
واجمَع لك الشوق كله واقطف زهوره
احارب الوقت .. وظروفي تحاربني
مدري متى الصبح يملا دنيتي نوره
نبني ولكن زمنا .. هـدّ .. مانبني
وامالنا .. بين مهدومه .. ومعموره
وان مابقى غير نقطة حبر تكتبني
كتبت انا ياظروف الوقت : مشكوره
.