زعل يبغى شعر

[حسام المجلاد]

بعد التحية والسلام، أدع هذا النص يقدم نفسه لذائقة كل جميل هنا :

زعل يبغى شعر، من بالقصايد يبعث الاحساس
‏وبكى محبوب قلبي وادري بدمعتهْ ملعوبه

‏وتمنيت المطر لاهلّ حبري..والمدى القرطاس
‏عشان آفهّمه وش كثر احبه واعشق عيوبه

‏انا كيف اوصف اللي مرتوي من راسه ليا الساس
‏حسن .. سبحان من صوّر بهاه وزاده عذوبه

‏رقيق شعور.. متشبع غنج.. باذخ ترف، حسّاس
‏خجول..ولا استحى في وجنتيه النار مشبوبه

‏كلامه من ذهب وحده ومن فضه كلام الناس
‏هو أجمل من يسولف والحكي يحلوّ بإسلوبه

‏حضوره يبهج القلب وغيابه يحبس الانفاس
‏ومزايا من سواه من البشر فدوه.. لعذروبه

‏حبيبي لاتجهم خاطره يعبث بي الهوجاس
‏إلى منه رضى حثيت عمري عشق بدروبه!

‏وإذا مَرّ.. وتبختر فاتني في قدّه المياس
‏دعيت الله كثر ماذبت فيه..يكفّر ذنوبه

‏معه حتى الشعر له لذّه، ويزهر به الكراس
‏وبلا روح القصايد كان ماهي فيه مكتوبه

‏سكن قلبي سنين ومالحبّه داخلي مقياس
‏ولاله من شبيه وفرحتي لاغاب مسلوبه

‏هذاك إن قصر بحقي عذرته وان جرح لاباس
‏جروحه ماتزيد الّا غلاه بقلب محبوبه

‏احبه..وإن بغيت ازعل عليه، عيونه النِعّاس
‏تجبّ اللي يسوي من خطايا.. كنها التوبه!

‏تمكن بي غلا واروى عروق اللهفه اليبّاس
‏وبنى صرح المحبه داخلي طوبه ورا طوبه

‏بكى كذب، وبعث روح القصيد بكل بيت إحساس
‏أجل وشلون لو مادمعة المحبوب..ملعوبه!؟؟