درب السنين

[سليمان الشدوي]

يقوله اللي على مركاه متواسي
.........يجمع (طيوف المحيطات )ويموّجــها
مدى عيونه ابد ماهوب ينقاسي
................ كِنّ الكواكب مع السبحه يدرّجها
يقرا (سطور الزمان) الهيّن القاسي
.................ويدعي لمن كان بالكفين ينسجها
يالله ياللي بذكرك نلجم( الخاسي)
................اللي ليا ضاقت الضيقات يفرجها
مانيب عن قدرتك داله ومتناسي
................وانت الذي قدرة المخلوق تخرجها
انا وريث الخطا والعرق دساسي
.............. وانا الندم يحتوي روحي ويحرجها
يفيض صدري ألم /ويفيض قرطاسي
..............وهموم صدري ترازم ! من يفوّجها؟
الفكر مامور / والهوجاس هوجاسي
...............والشمس ماتنجحد /ساعة توهجها
اهدتني (ام الشعر) قبله على راسي
.....................ياليتها قبلت روس ً تتوجــها
شربت حب (الديار الجرد) في كاسي
..................واسقيتها من حنيني مايبهرجها
ماطال (درب السنين) الا من احساسي
................ولاكرهت الدروب الا من اعوجها
ماكل نوماس دون الحق نوماسي
..................ولاكل كلمه على الباطل نروجها
البحر ممدود وجهه/ والجبل راسي
...................مداخل الكون/ ماتشبه مخارجها
والعمر مدراج ياخوفي ويا ياسي
...................لاحضرّت رحلتي/ باخر مدارجها
اليا ذكرت المصير/ وضاقت انفاسي
....................تتعذر (جروح قلبي) من معالجها
اخاف من لحظة ً / ماتقبل افلاسي
.....................والنفس تفنى / ولاتفنى حوايجها
وياموت لاجيتني /لاتحبس انفاسي
............... وانا مع الريح كنت البارح اسرجها
وان صرت( تحت الثرى) مدفون ياراسي
.......................ماتنفعك / زينة الدنيا /وبهرجها
لك من حياتك خطايا (بين الاقواسي)
.................ومن (رحمة الله )تظهر لك مباهجها
لكن ياللي على مركاك متواسي
.....................هموم قلبك . على ربك . يفرّجها

 

[علي الحسني]

فرج الله هموم المسلمين جميعاً
قصيدة تجسد في ثناياها الكثير من الشعر والحكمة والروحانية
شكراً سليمان على هذا التنوع الجميل

 

[أمجاد محمد]

نص رائع مملوء بالتميز والجمال
راق لي حرفك كثيرآ
دام لنا هذا الابداع

 

[محمد السالم]

بالفعل أستاذ / سليمان
فأنت تموج الذائقة كيف تشاء
وللذائقة معك موعد لا تخلفه البتة
لك وافر المحبة

 

[محمد الحجري]

اخي الشاعر سليمان

ان من الشعر لحكمة

وهنا ابياتك تشع بالحكمة

وفقك ربي

 

[سليمان الشدوي]

المشاركة الأصلية كتبت بواسطة علي الحسني

فرج الله هموم المسلمين جميعاً
قصيدة تجسد في ثناياها الكثير من الشعر والحكمة والروحانية
شكراً سليمان على هذا التنوع الجميل

هلا وغلا
اللهم امين

مشرفنا العزيز يشرفني حضورك

 

[عبدالإله المالك]

الشاعر سليمان

قصيدة من العيار الثقيل جزالة

لمثلها ينسجم الشعر والنغم

 

[عيسى غالب العنزي]

وياموت لاجيتني /لاتحبس انفاسي
............... وانا مع الريح كنت البارح اسرجها
وان صرت( تحت الثرى) مدفون ياراسي
.......................ماتنفعك / زينة الدنيا /وبهرجها
لك من حياتك خطايا (بين الاقواسي)
.................ومن (رحمة الله )تظهر لك مباهجها
لكن ياللي على مركاك متواسي
.....................هموم قلبك . على ربك . يفرّجها

سليمان

صح السانك ولاهنت
قصيده لا توصف الا بالجمال والروعه
احسنت واجدت

لك جل احترامي