ذنــــــــب

[عبدالعزيز العميري]

(ذنب )

لَوْ كَان حبّك دَاخِلي شيَّ ينْزاح
___________ مَاسبْتِ لكْ فِي آخر الدَّرْب عينِي
كِنْتِي حَيَاتي وْكَان وَقْتي بِكَ افْراح
___________طيَّرْتِ لِكْ مِنْ غصْن حَلْمِي حَنينِي
يـ اطْهر حَبيبَهْ أهْدَت الْعين مُصْباح
___________واجْمَلْ قصِيدَهْ سَيـَّلتـْها يمِينِي
طَاحَتْ سنِينِيْ والْهَوَىْ ظلَّ مَا طَاح ْ
___________رَغْمَ الشَّقا والشَّكَّ كنْتِي يَقِينِيْ
كِنْتِي بِلاد تـْضمَّنِي بْحبُّ وارْتاح
___________ صَرْتِي مَنَافِيْ واحْرَقَتْ لِيْ جبِيْنِي
يَوْم الشَّتَا يِجْلدْ بضَلْعِكْ وَيجْتاح
___________جِيْتِكْ حَطـَبـْت لموَّقدِكْ مِنْ سِنِينْي
ماقلْتِ لَكْ لاتَهْدِي الشَّكَّ مَفْتَاح
___________صِكِّيْ عُيُونِكْ وارْمي الْهَمَّ فِينِي
الْيَوْم وانْتِي تغْرِسِي بْظهرَي رْماح
___________ ظلَّيت شَايَل صُورتك في يديني
الذنب ذنْبك مابقى لـْحلمنا جْناح
___________ الله مَعَك ..صَدْرِ الْمَنَايَا يَبِينِي
لَوْ كَانْ حِبِّك دَاخِلِيْ شيَّ يِنْزَاح
___________مَاكَان ظَلَّتْ صٌورِتِكْ وَسْط عَينِيْ

شعر : عبدالعزيز العميري