سيمفونِيّة مَطَرْ

[سعيد الموسى]

ودي أقول إني أحبك .. وخايف!
‏مابين أحبك لين .. أحبك ، مسافه!
‏في ذمتي لاشفت .. حمر الشفايف !
‏قلت النساء من بعد زولك ..حسافه!
‏#سعيد_موسى

 

[سعيد الموسى]

سلمى .. وانا صدري مثل طير يعلى !
يطير فوق ، بعيد ... ويمشط الديم
سلمى .. وكل آهه غدت فيك تسلى !
الله وكيلك.. فيك طفله من الغيم !
سلمى ..
ويتناثر عطر ..
سلمى ..
ويتساقط مطر !
سلمى ويربكني سؤال !
الحسن ذا ممكن يُقال؟
بنيّةٍ من ناس ..
ماتشبه الناس!
مخلوقة الألماس!
مليانة الإحساس !
سلمى .. ويحضنها الحبق!
سلمى لها الورد .. العبق !
من طين هذي
مثلنا ؟
أو رياحين ؟
سلمى .. وانا قلبي عطش !
للشعر .. ولهذا الرمِش !
سلمى ويتساقط جدل !
لين امتلى الشارع غزل !
اذا انطقت .. كن الحكي
بستان.. به خوخٍ شهي !
سلمى .. اذا قالت أنا !
فزّ الحكي .. غيرك هنا ؟ !

 

[سعيد الموسى]

‏كيف انام ؟
‏كل شي حولي ظلام ..
‏كيف أنام ؟
‏داخلي زحمة ... حطام !
‏كيف أنام ؟
‏صدري به .. مثل الجمر ،
‏والحكي .. اللي اندثر !
‏ماله عذر .. ماله عذر !
‏كيف أنام ، ووجهك أظلم
‏والسيوف اللي بصدري
‏ماارحمتني
.. قطعتني ..
واوجعتني !
‏وجرحي ابكم ..
ماتكلّم !
‏علميني الليله هذي ..
كيف انام؟

 

[سعيد الموسى]

اغفر لي اني احبك ..
وآنا بغفر لك .. سوادي !
وإني حبي .. مثل ظلمى !
لاانتي شفتي ولااعتكزتي ..
اغفر لي .. هالسواد !
وهالرماد ..
وانا بغفر لك سهامك ..
" روح عادي ، هو يضر الكون واحد" ؟
غيب .. عادي !
هالبلد كله أيادي !
وقفّت يعني .. عليك ؟
بغفر إني صرت .. عادي !
وان لو أرحل وافارق !
كل هذا الكون هادي !
يالحبيبه .. والحقيقه
مثل موس ..
تقط روس !
تطفي أيام وشموس ..
يصبح العالم .. عبوس !
لفّي هذا الكون كله !
بحره وجزره ومده ..
ريفه .. واصعب تلاله ..
من جنوبه .. لي شماله ..
وعلميني .. بعد مدّه !
من هو اللي حب كثري ؟
ومن هو اللي صان مثلي؟
ومن هو اللي شال صدرك .. مثل ماشال الحمامه
بين كفه .. بكل عفه !
يالحبيبه ... صدري الأبيض .. تجمّر !
صدري المعشب .. تصحّر !
كيف مااغفر لك سوادي ؟
رغم إنه ابيض أبيض من حلم
وأكرم اشمخ .. من قمم !
ربما .. غيرك يشوفه
كل حلمه .. وكل شوفه ،
لكن الأيام هذي .. مانبي الشخص النظيف !
مانبي الا السخيف ..
مايعيش الا الرخيص ..
ولا يقوم الا النقيص !
جرحك اللي هزّ جوفي .
لينها أهتزت . كفوفي ..
" إني عابر .. جيت عابر .. رحت عابر "
مااصعب شعور المقابر !
،
بغفر جراحك ... وانتي
داخل الله .. تغفري لي
إني احبك ..
هذا أكبر ماحملته ..
هذا ذنبي اللي اقترفته !

 

[سعيد الموسى]

الحب ذا كذبه
‏كذبه بـ فمّ أطفال
‏كل ٍ عطى قلبه
‏وفرقّهم الترحال
‏بنت افقدت لعبه
‏وطفلٍ غدا رجال ..
يالسهله .. الصعبه
سهم الهوا قتّال !
كلٍ مشى دربه ..
وتغيرت احوال !
أحدٍ طفى .. شهبه!
والبعض منه .. رمال !
ماأجمل .. الكذبه !
في شفّة الاطفال !

 

[سعيد الموسى]

وعن والدي أقول :

‏يكفي إنه لا دعا
‏قالت آمين : السما !
‏يكفي إنه لااعتزى!
‏قال كلمه وأحتمى!
‏ماهو عادي ..
‏شي ماهو إعتيادي
‏إنه لوحده بلادي

 

[سعيد الموسى]

‏يجيك من الزمن .. حادي !
‏وتنسينه ..
‏وتتناسين ..
‏شي عادي !
‏وهو باقي العمر
.. باقي؟
‏كبرنا ..
والزمن يكبر !
‏وانا ماشابت اوراقي !
‏دخيل " آحبِك "
الأولى
‏وهي تمشي
وتتلعثم !
‏وأربّيها على يدي ..
‏واكبّرها على صدري !
‏ولكن للأسف .. تكبر
‏وتصبح عاقه بـ قلبي !
‏وغصه في وسط فمي!
‏ولاتثمر!

 

[سعيد الموسى]

كل دمعه مرّت فْمي مالحه
..... ‏ذقتها من قبل حتّى لاتفوت !
‏الجروح أحيان مو متصالحه
..... ‏والكلام احيان في صدري يموت!
‏شف شحوبي شوف عيني سارحه!
..... ‏كم بهذا القلب هزّه دون صوت!
‏يابن آدم .. والأوادم .. جارحه!
..... ‏كيف أكون انسان في صدره ريموت!