الغائب الحاظر .. فايق عبدالجليل
من منا لا يعرف الشاعر الغنائي الكويتي فايق عبدالجليل . ذلك الشاعر الذي طالما تغنينا بكلماته وقصائده وانين كلماته , وانا من الذين كم تمنوا ان يلتقوا بهذا الشاعر الكبير فايق عبدالجليل , فلم التقيه سوى بتلك القصائد والتراث الشعري الكبير الذي قد تركه خلفه والذي يذكرنا به دائما , وانا أكتب هذا الموضوع أجد لساني وعقلي يعجز عن وصفه , فدعونا نحق لحظة وفاء مع فايق ونتذكره من خلال حياته وقصائده . وانا مهما قلت فلم اوفيه حقه فسامحونا على التقصير .....
هو فايق على محمد العياضي , من مواليد الكويت عام 1947 , ولقبه باسم فايق عبدالجليل نسبتاُ إلى عمه الذي تولى رعايته , متزوج ولديه ولد وثلاث بنات , وقد بدأ حياته رساما ثم أتجه إلى الشعر وقد صدره له أربع دواويين وهي :
وسمية وسنابل الطفولة عام 1967
رسالة صمتي
معجم الجراح
حب العصافير
وقدم في 20 اغسطس عام 1974 أول عمل مسرحي للعرائس في الكويت وكانت المسرحية بعنوان " ابو زيد بطل الرويد "
اسر الشاعر في 20 يناير 1990 أبان الغزو العراقي الغاشم على دولة الكويت وإلى الان لا يعرف مصير وإلى هذه الساعه .
فأني ادعوكم الأن لنتوقف مع بعض القصائده للغائب الحاظر فايق عبدالجليل :
آخر زيارة
آخر زيارة .. حسيت في آخر زيارة
شي بعيونك مختلف .. وشي بحديثك مختلف
حتى حديثك مختلف
كنت بشكوك
وشفت الحقيقه في عيونك .. تعترف
موقف غريب .. موقف أبد ما ينوصف
وين الكلام .. وين الحرارة في السلام
كبير الفرق ما بين .. أول لقا
وآخر زيارة
مدري شقول .. ياحب خانتني العبارة
مدري شقول .. والحر تكفيه الإشارة
كل شي حبيته في بيتك نساني
الهدوء .. الليل .. الصمت .. الأغاني
حتى لون الورد .. الفرحة ومكاني
داهمتني الغربة .. ليتني ما جيت
ليتني رديت
حزني غرّب ضحكتي
لساني ضيّع كلمتي
حسيت بالياس
ومشيت
كنت بشكوك
وشفت الحقيقة في عيونك .. تعترف
*******
الكلمة الأخيرة
بكل هدوء .. وبكل محبة
اسمع الكلمة الأخيرة
ما أبيك
وان رجعت .. اترك الديرة
وأسافر لغير ديرة
وبكل هدوء .. اسمع الكلمة الأخيرة
عرفتك والنظر خدّاع
صدقتك .. وطاوعتك
سلمتك شعوري بساع
واثاري صح كل اللي سمعته وشاع
اسمع الكلمة الأخيرة
ما أبيك
كلمة .. وانتهى الموضوع .. فكر تنسى او ترحل
شسوي .. وشحيلة المخدوع .. يعيد الكره من أول
اسمع الكلمة الأخيرة
ما أبيك
********
آن الأوان
مثل ما ياخذك النسيان
أنا مثلك أنا انسان .. وهم أنسى
أنا وقت التعب .. مثل السفن
لي شافت المرسـى
يا مخدوع في فرحي .. أنا في ضحكتي جرحي
وأمامك كلمتي خرسى
ناديتك .. بصوتي المتعب الولهان
ناديتك .. وانتظرت سنين
ناديتك .. وصوتي والصدى للآن
ناديتك .. لا حسيت ولا رديت
وصوتي والصدى للآن
غيابك .. وصل أفراحي إلى الأحزان
أشوفك راحتي .. ومنك أنا تعبان
يا مخدوع في فرحي .. أنا في ضحكتي جرحي
وأمامك كلمتي خرسى
آن الأوان
انا بارتاح من ياسي
من خوفي أنا .. انا بحاجة لأمان
وداع يا شوق .. يا ذكرى
وداع .. يا زمانٍ كان
وكل اللي أقوله الآن
أباركلك النسيان
يا مخدوع في فرحي .. أنا في ضحكتي جرحي
وأمامك كلمتي خرسى
******
إنتي وين ؟؟
انا لولا عيونك .. عمري ما حبيت
لا سافرت .. لا دوّرت .. ولا ناديت
لا صحيت احلامي .. ولا منّيت أيامي
بحبيبة .. أو بيت
إنتي وين ؟؟
تعبت مني المسافات .. تعبت مني المطارات
انا بكل المدن مريت .. وأنا من غربتي مليت
عاشق .. انثر شوقي .. في صوتي إذا ناديت
إنتي وين ؟؟
تايه يا عمري سنين .. في غربه وعذاب
ابكي نغم .. اتبع وهم
وشايل عذاب
لا شوق يوصلني .. ولا عنوان
لا حب يرحمني .. ولا نسيان
إنتي وين ؟؟
ياللي حياتي .. من غير ذكرك ما تطيب
إنتي امل يبعد .. واحس انه قريب
يا انتي يا مني .. يا صوتي يا فني
يا صوت الفرح .. لاجيت بغني
إنتي وين ؟؟
تعبت مني المطارات .. تعبت مني المسافات
أنا بكل المدن مريت .. وانا من غربتي مليت
عاشق .. انثر شوقي في صوتي .. إذا ناديت
*****
العيـد
قلوب الناس
بين الفرحة والموال
وسط العيد
وأنا اصبح وامسي .. على الباب الحديد
مر احد واثنين
وثلاثا واربعا
مر الخميس والجمعة
والسبت بغيومه والرعيد
وانا على الباب الحديد
تمطر سما عيوني من الداخل .. عذاب
تهزني أفكاري .. وترسيني بعيد
والمشكلة .. بعدها نفس المشكلة
بعد الحلم نفس الحلم
وبعد العيد في عيوني
مو لابس سوى التنهيـد
*****
خلنا أخوان
خلنا اخوان .. هوانا كان
ساعة من شهر نيسان
سفينة والبحر سكران
لوحة والمطر ألوان
قصة كانت ومعنى
وهذا اليوم فوق الرف
لا معنى ولا عنوان
خلنا اخوان
مقدر اوضح لك
مقدر اقول اكثر
في لساني الكلام يموت
وفي عيوني الهوى تابوت
خلنا اخوان
*****
رحلة الكتمان
راح العمر بفراقنا
غايب .. وذي ثامن سنة
غايب .. ياللي انته انا
وراح العمر .. شوق وصبر
وبس الألم .. باقي لنا
لا رساله منّك .. ولا عنك خبر
مليت الألم .. مليت السهر
ومليت اشوفك في منامي والصور
وراح العمر .. شوق وصبر
وبس الألم .. باقي لنا
مدري متى بارتاح
ما بقى كثر اللي راح
حياتي ملوّنه باحزان
وطالت رحلة الكتمان
غيابك هم .. ويا مر الهم
لي لوّن عمر انسان
ثامن سنه
وراح العمر .. شوق وصبر
وبس الألم .. باقي لنا
******
رقم هاتف
بقى عندي رقم هاتف
وحراير صوتها عاصف
وشريط يدور مع الكلمات
غصب يمشي على الآهات
وقيثارة بلا اوتار
ومجلد للشعر .. خالي من الأشعار
وبلابل حب في وسط المطر .. يبكون
وصور اطفال .. حبوا وهم يدرون
ياللي ادورون عن حبي وسط كتاب
الكتب ما تقدر .. تصوّر ألم الأحباب
شعري ضعيف مهما يطول
ما يدقر يصوّرني
وكلامي مكسر .. مشلول
حروفه ما تساعدني
وانا في الوجود قصه خياليه
وصدى أيتام مظلومين
وجسم ذايب .. قريب يزول
****
زلزليني
زليزليني .. زلزليني
واتركيني فوق بعضي
اغرسي الغربه
بيني وبين نبضي
زلزليني
بغربة الساعة احبك
دمعة الغيمة احبك
بهزة رموشك .. احبك
بكل حواس الحب .. احبك
لما شفتك يا حبيبي
اعترف ان الهوى فعلا قدر
ما نفعني كل غروري والحذر
قلبي ضيعني .. وحاصرني الخطر
كنت ادور في عيونك
درب حق شوق وممر
ارتبكت .. وانسرقت
صرت موجة في بحر
صرت في صيفي مطر
صرنا نضحك
صرنا نبكي
صرنا في حالة خدر
زلزليني
****
طيّــب
طيّب وصدقت الحكي
غلطان غرتني العيون
مدري ان الناس في لحظه تحب .. والناس في لحظه تخون
الناس .. آه يالناس
حتى في المحبة يكذبون
كنت اتصور حبي في عيونك كبير
همزة وصل تبدى .. ولا تعرف أخير
كنت اتصور كل شي ممكن يصير
نشوف الكثير .. نعاني الكثير
نروح نتفارق
إلا اللي شفته .. ما هقيت انه يصير
شي خطير
الناس .. آه يالناس
حتى في المحبة يكذبون
اجرح مشاعر حبتك .. اكذب علي
اكذب واصدق كذبتك .. اكذب علي
الطيب انا عادتي .. والظلم يمكن عادتك
مسامحك روح .. رغم الجروح
نشوف الكثير .. نعاني الكثير
نروح نتفارق ؟؟
إلا اللي شفته .. ما هقيت انه يصير
شي خطير
*****
عطشان
عطشان .. اسمع يا نهر
عمر الصحاري والجفاف
عمري انا ما مر على عمري مطر
عطشان لدموع الشـا
مشتاق للون الخضر .. عطشان اسمع يا نهر
صبري عزف .. صبري نزف
انا النخيل .. وانا ارتجافات السعف
ناديتك بصوت العطش
ياللي ما تسمع نشف
شوقي لوّح لك وقف .. ترابي لوّح لك وقف
والصمت في صرخه اعترف
من اين ارتوي؟؟
والدنيا صحرا وبس
النار تحتي .. وفوقي عين الشمس
الشتا .. في الصيف اختفى
والغيم .. ما عنده وفى
وانا العطش بيتي
ونسيمي عاصفه
عطشان .. لدموع الشتا
مشتاق .. للون الخضر
عطشان
اسمع .. يا نهر
****
عطني الحل
عطني ياحبيبي الحل
تجرأ بالصراحه .. قول
إما يكون هذا الحب .. وإلا من حياتي يزول
وكلمنا عواطفنا وخلينا الكلام يطول
وخلينا الأمر اصعب .. وهو في كلمتين محلول
يا تاركني .. مابين وبين
لا بحرك بحر .. ولا شاطيك بر
ولا ادري مكاني وين
ماشي في سراب خدّاع
مبحر والعذاب شراع
وانته هناك
مر وقتي .. ومر عمري
متى ألقاك ؟؟
سنيني شيّبت وياك
رضاك عندي .. كفايه رضاك
معاي انته .. علي أنته
انا بكل الحلول .. اهواك
رسيني معاك .. رسيني
وقرّب للحقيقه بعيني
تتركني .. أنا راضي
ترجع لي .. انا راضي
في يديك .. الربط والحل
وعطني يا حبيبي الحل
*****
غزاني الشيـب
مشى كل الزمن .. وانا في مكاني
غزاني الشيب .. فاتتني الأماني
ولاني بالفرح موجود .. ولاني بين أحزاني
ومهما الوقت .. عاندني .. وتحداني
كأن الوقت في وقتي ثواني
تغيّر وقت .. وجاني وقت
وأنا بعدي .. انا ذاتي
هروبي استحاله صار
بكت في الدرب خطواتي
وأسافر للفرح .. ألقاه مأساتي
وانا وحدي
جهاتي كلها ضدي
وأنا وحدي
وصمتي يشكي من ردي
وغير الصمت .. ما عندي
ياحب .. يا شوق .. يا ليل العسر
راضي بحياتي .. تنتهي .. أو تستمر
وأنا صبور .. وبزرع الدنيا صبر
وان شحّت الدنيا علي
بفرحه وفي
وأنا وحيد بدنيتي .. وما عندي شي
من ذكرياتي .. بشتري لعمري عمر
******
لا تنادي
لاتنادي .. تتعب انته لو تنادي
انته في وادي .. وانا في غير وادي
يا مزهب الأعذار .. ما عندك عذر
كنت تتجنى .. واسامح شكثر
شو اللي احبه فيك .. شو اللي افتكر؟؟
خوفي .. عذابي .. غربتي
عمري اللي صبرته عمر
لا تنتظر .. الحين مو بيدي الأمر
ولا تنادي
كنت تحسبني أجيك.. بأول ندا تنادي عليّ
ماسمعك لو روحي فيك .. مادام جرحي حي
نادي .. وانا اتجاهل نداك
ابعد وروح .. الله معاك
ولا تنادي
ضيعتني في زحمة أيامي وانا الولهان
كنت الأمان بدنيتي
وحسيـت لأ .. مانته الأمان
جرحتني .. باسم المحبه والحنان
جرحتني .. وخليتني ألجا إلا النسيان
لا تنادي .. الشوق في قلبي هدى
لا صوت يوصلني .. ولا حتى صدى
وانتهى صبري .. وبدى ردي بدى
ولا تنادي
*****
ما يستاهل الثاني
فينا واحد بيلعب .. فينا واحد يعاني
أعتقد فينا واحد .. ما يستاهل الثاني
فينا واحد تمنى .. يكون ظل لخليله
فينا واحد تجنى .. الف ليلة وليلة
وأعتقد فينا واحد .. ما يستاهل الثاني
فينا واحد تصبر .. وعطّر الدنيا بطيبه
فينا واحد تنكر .. للمحبة وحبيبه
وأعتقد فينا واحد .. ما يستاهل الثاني
فينا واحد تغرب .. عن حياته ومكانه
فينا واحد تمادى .. حتى خان الأمانه
وأعتقد فينا واحد .. ما يستاهل الثاني
وبعد كل ما جرالي .. منك ومن زماني
حس واشعر بحالي .. صير انته بمكاني
وشوف منهو اللي فينا .. ما يستاهل الثاني
*****
مجروح
أنا مجروح .. عطني جرح
يجوز الجرح إذا داهم أحد يشفي
اجمع لي العطش صخره على لساني
اجمع صمت كل حاجه
وانثر صمت كل حاجه
انا لجمت صوتي اللي سكن حرفي
يعيش الصمت
وأنا الصامت الأول .. وأنا الصامت الثاني
وأنا صامت ويكفي
أشيل البحر في صدري .. وأشيل الأرض في كفي
تعال يا صمت .. أبي كتفك على كتفي
تمر الكلمة من صوبي .. أغض طرفي
وأشوف الصمت .. بس الصمت في صفي
قتلتني حالة اللاحال
أنا موجود أو منفي
*****
نسّاي
نسّاي .. وانته الهوى بالنسبه لي والماي
اسمع انا صوتك .. ولا تسمع نداي
اشهق أنا باسمك .. واشتاق لك وانته معاي
اكتب على سمعي اغاني .. اكتب واغنيك
حيّرتني .. واحترت انا فيك
تزعل بلا أسباب .. وتعاند واراضيك
بكل زلاتك ابيك .. بكل حالاتك أبيك
حبيبي انت .. وإلا العذاب انت
وإلا العذاب انت .. مدري وش اسميك
نسّاي
تغيب .. والدنيا معاك تغيب
تقطع خيوط الشمس عنّي .. ويصبح العالم كئيب
وأصبحت أنا لوحدي .. على ارضك غريب
ما تكتفي من غربتي .. ما تكتفي من حيرتي
الله كم انته عجيب
الصمت دايم لعبتك
الصمت أحياناٌ رهيب
****
واحد من الناس
بكل طيبة العشاق اطلب ننتهي
سافر وغيب وننتهي
بتشوف ناس .. وتحب ناس
وتنسى وأكون بدنيتك .. واحد من الناس
كنت أتصور إني لك .. وانته عارف منزلك
جدّت ظروف .. وعينك تشوف
صرت بصعوبه أقابلك .. صرت بألم اشتاق لك
سلمت .. انا مالي غير الصبر
آه لو تدري بعد هذا العمر
إسمك إذا مرني .. يعطرني عطر
آه يا كل العمر
كون بمكاني وشوف عانيت شكثر
بتشوف ناس.. وتحب ناس
وتنسى .. واكون بدنيتك واحد من الناس
*****
وهــــم
وهم .. كل المواعيد
تعب .. كل المواعيد
باسم الحب .. باسم الشوق
مأساتي معاك تزيد
واتم بعيد .. وتتم بعيد
واتم مثل الحزن .. انطر سحابة عيد
اجي ملهوف .. عطش تحت المطر ملهوف
وقتي يطوف .. لوني ضايع ومخطوف
يضيع الشارع بصمتي
وصمت الانتظار سيوف
وكل ما مر وهم صوبي .. اقول انتي واتم بعيد
ألم .. كل ساعة .. وكل لحظة ألم
وين عيون حبتني .. ومنتني؟؟
وقالت لي نعم
تلاشت فرحتي .. وتاهت خطوتي
وحلمي كبير .. في لحظة انهدم
وكل ما مر وهم صوبي .. اقول انتي
واتم بعيـد
*****
لـوميني
لوميني ..لوميني
قولي للبشر كله
انتي ماتحبيني
يكفيني احبك انا يكفيني
اشعر في الهوى يكبر ويطويني
لوميني .. لوميني
هذا الحب في دمي وشراييني
مااقدر مااقدر اقطع في شراييني
*****
جيت متأخر
جيت الحين متأخر
الورق الاخضر على الاشجار
صار اصفر
انتظاري طال مااقدر بعد اسهر
الثمن عندك بعض كلمات
تكتبها على دفتر
والثمن عندي عذاب وموت
واحيانا يكون اكثر
شوف الفرق
لما انا احس الفرق اتحسر
ش تبي مني بعد اكثر
****
يابعيده
المطر اجبرني اكتب لك قصيدة
المطر هذي السنه
سوه السما صفحة جريده
نشر صمتي
نشر احزاني السعيده
رد لي دمعي
رد لي سمعي
رد لي حنجرتي الشريده
المطر جبرني اكتب لك قصيده
*****
كـانت اللحظة تعب
كانت اللحظه تعب
كانت الهمسة غضب
وكان احساسي مشاغب
تعبت من نزف الكلام
كيف حالك والسلام
وكل نتايجها مصاعب
من وين اعدلها تميل
لاصحوة لاغفوة بليل
ضمير صاحي للمتاعب
حكمة آلهيه نتألم
يجوز في يوم نتعلم
ومن الالم تبقى تجارب
****
ليش الحذر
ياما سحابة تخون توقيت المطر
ليش الحذر
ياما نجوم تموت من كثر السهر
ليش الحذر
ياما الربيع يمر ويبكي الشجر
ليش الحذر
واحنا مثل كل البشر
احنا بشر
****
انا في الشوق
انا في شوق مسجونه
وانت السيف والسياف
وانا ياروحي من صغري
احلم فيك بدون اطياف
وحناني لك غرقني
وحنانك راحة قط ماشاف
زاد الحب
صار اضعاف
واحنا من زمان اثنين
خوافه مع خواف
****
عرفتك
عرفتك صارت السكته قوافي
عرفتك صارت الدنيا
حقيقة اكتشافي
وصار لون السما ازرق
لون صافي
صار حتى الورد يشرب من جفافي
وصار حتى الشتا
شتا الكويت دافي
صدقيني هذا واقع
سجلي هذا اعترافي
****
باعوني للريح
جريح جريح
واللي علمني المشي
علمني أطيح
واللي شراني بالذهب
رد باعني للريح
عاشق قديم
عاشق صريح
اسألو نوم الشوارع
تحت أجفان المصابيح
واسألوا البرد والشمس والريح
اسألوا .. صبري
اللي سوّيته مفاتيح
اسألوا يمكن قوافي الشوق
مني تستريح
يمكن الصمت اللي ساكني
يغافلني ويصيح
جريح جريح جريح
درايش الديرة عيوني
عيوني نواطير
عيوني ألم غافي
عيوني ألم صاحي
وعيوني في الغربة أطيَّرهم عصافير
مجروح وعيونك ضماد
مجروح وعيونك بلاد
ياموسم النار بحياتي
والرماد
ياموسم النور بحياتي والسواد
مكتوب في بحرك يمر السندباد
مكتوب إسمك للربيع وللحصاد
ياخضرة
ياصفرة
ياحمرة
يامشغولةٍ .. بالطفرة
سمعت إسمك
غني عصفور ٍ على سدره
قريت إسمك
قبل ماأكتب وأقرأ
وأنا عاشق .. وعاشق
عاشق الرملة
انا بعدي طفل في شارع الذكرى
أحبك دمعة صيفية
أحبك صحرا عطشانه
تحلم بالمطر
تسأل عن الأعشاب
كتبت اسمك
على ضلوع السر والماي
طار اسمك غاب .. وغاب
ولقيت اسمك
عصفورة اسكنت الأهداب
أنا دمعة ارهنتني الغربة
في عيون المرافي
حبيبة عمري
رذاذ المطر في ليل غافي
عرفتك صارت السكتة قوافي
عرفتك صارت الدنيا حقيقة واكتشافي
وصار لون السما ازرق لون صافي
صار حتى الورد يشرب من جفافي
وصار حتى الشتا
شتا الكويت دافي
صدقيني هذا واقع
سجلي هذا اعترافي
****
ياصقر واهنيك لك جناح تطير
لي طرى لك نزعت وطرت يم الهوى
بين قلبي وبينك فرق كبير
لي كفخت انطلقت ولي كفخت التوى
انت حايم وانا بالقاع دوبي اسير
في صحاري زماني ذيب ليلي عوى
فوق جوك سحاب وحدر جوي هجير
القدم فوق رمضا والخفوق اكتوى
الحذر ياصقر لايشبكونك اسير
ويل صقر يتله مربطه لنوى
كل حر الى ضاق انتهض للمطير
حومته بالسما ساعه لقلبه دوا
واعذاب الجناح اللي يجره كسير
كلما فز مكسور النواهض هوى
****
ليش الحذر
ياما سحابة تخون توقيت المطر
ليش الحذر
ياما نجوم تموت من كثر السهر
ليش الحذر
ياما الربيع يمر ويبكي الشجر
ليش الحذر
واحنا مثل كل البشر
احنا بشر
*****
" منقول " للأستمتاع "
نور..
آخر المشاركات
12-07-2007, 10:14 PM
فايق عبد الجليل
العرض العادي
