" ملاذ "!

[خالد صالح الحربي]

:
:
وقعت ملاذ عن طريق الصُّدفة - على متصفحين يحويانِ أبياتًا
موجهة لـ وطن ونون ؛ وقالت لي: " ليش ما كتبت بي شيء ؟!
فكتبت:

:
طلّة الصُّبح تشبه طلّتك يا ملاذ
.. والعصافير لا من غرّدت: " ضحكتك ".

جيت أقول المطر أنتِ وصرتي رذاذ
.. جيت أقول العطر أنتِ .. وجت لكنتك:

لكنةٍ من شياطين الأوادم : تُعاذ ..
.. نغمةٍ ؛ ما تليق إلا بطرف .. " شفّتك ".

جعل يومي قبل يومك - وبآقول هاذ
.. موقنٍ أني أصدق مني : بـ "حضرتك "!

🌹

 

[خالد صالح الحربي]

:
"حبّي" اللي كثر ما طوّقك ..
.. في عيوني أشوف اللي أبيه.
آيسكريمك / هو اللي اتذوّقك
.. قبل يا " ملّو " لا تتذوّقيه !
🌹

 

[خالد صالح الحربي]

:
يا بنيّتي وأنتِ بعيدة عن العين
.. العين ماهي في " غيابك " هنيّا!

يا قطعةٍ من روح بَيّك .. تروحين
.. وتروح روحه لينك تجين .. ليّا.
🌹

 

[خالد صالح الحربي]

:

الأصفر اللي تلبسينه ياملاذ بذمّتي
.. . يخلّي " الأصفر" لو أنّي ما أحبه " لون غير ".

تتحكمين بروحي ومائي ومنبع جمّتي
.. . يابلسم جروحي .. بدونك لا ورود ولاش طير .

مقدار ما تبعثرني الدنيا بكفّك لمّتي
.. . وبحجم ما تِعْثِرني ؛ إن شفتك أقول: أني بخير .
🌹

 

[خالد صالح الحربي]

:
حبيبتي غايبة ؛ حبيبتي غايبة
.. . وغيابها يعلّم الغيّاب " كيف الغياب "!
" بنيّتي " رحمةٍ في رحمةٍ ذايبة ..
.. . ودام المطر رحمة .. المخطي تراه السحاب!
🌹

 

[خالد صالح الحربي]

:
ملاذ وينتهي كل الحكي
.. .. ملاذ ويبتدي كل الحلا .
اذا بترقص على " طِلْع البكي "
.. .. وإذا بتبكي على كل الغلا .
🌹

 

[خالد صالح الحربي]

:
غنّيت ياوردتي لك .. ؛ وأنتِ بحضني.
.. . وشلون في غيبتك عنّي : ما اغنّي لك؟!
ياشمعة العُمر .. يوم الموت يلحظني ..
.. . ياجعلني " مَسحةٍ " بأطراف منديلك ..
🌹