حـديـث الـنـفـس

[أمجاد محمد]

قلب توكا على عكازة الذكرى

وراح يبحث في أنقاض

ما مرا

عن صورة أهملت في قبو أيامي

يا قلب …

دعك من الماضي

وأشلائه

كف السنين أبادت كل لالائه

ولن ترى

غير أشباحي وأوهامي

ظللت أرقصها بالكذب

أياما

حتى استحالت بمر الدهر

أنغاما

أروي بتضليلها قلب الصبا الظامي

إن كنت تبحث

عن حبي

وعن أملي

فالحب أغفى

وماتت همسة القبل

من بعد ما ملأت

صاب الأسى … جامي

أو كنت تسأل عن آمالي الغر

فتلك كومة وهم

أغرقت فجرى

يوما

ولم تبق إلا يأسك الدامي

كما نسيت الصبا …

دعه لدنياه

فلن ترّجع لي شيئا

بذكراه

ألا تفجّر أحزاني

وآلامي

يكفيك ما في كؤوسي اليوم

من ألم

وصبوة تتلوى في يد العدم

حيرى

تقلص فيها نبع أحلامي

أراك تمعن في نسيان صورتها

ما صبوتي

غير أحلامي وشقوتها

تلك التي حملت أعباء أعوامي

اليوم تغفو وراء الغيب في كلل

كأنها سئمت

وعدا بلا أمل

يهفو على وتر دام وأنغام

ومثلها فلتنم ..

أيام دنياكا

فالشؤوم يرقص في دربي ومسراكا

(( وقد تمنيت

ألفا …

دورة العام ))

 

[أمجاد محمد]

أهواك



أنا أهواك ولكن

غير ما تهوين أهوى

أنا أهواك جراحا في حياتي تتلوى

كلما هدهدتها

أهدت إلى العالم نجوى

*

أنا أهواك نشيدا

أزليا

يتغنى

فيه ذوبت شبابي الرائع الألحان لحنا

ولنفن بعده

فالحب عمر ليس يفنى

بلند الحيدري

 

[أمجاد محمد]

شاعر كله احساس ومشاعر

مسفر الدوسري

(مرت سنة)


مرت سنة
كم فيها كان ..
حضن البنفس دارنا
وكم كانت حدود الزعل
أقرب سما لديارنا
ويا ما يواعدنا البحر بعيوننا
وكم زارنا
وكم مرة كان وجه القمر
أليل كثير .. من ليلنا
وابعد كثير
من الدرايش اللي نفتحها المسا بجدارنا
وكم مرة تطرين الفراق
وكم مرة يطريني الفراق
ويجرحنا عشب أعذارنا
وتبكي عصافير الدفا ..
برد السهر ف أشجارنا
مرت سنة
لا أنا كنت .. فيها أنا
ولا أنتي ..إنتي
والنهار ما كان أبد نهارنا
عيت تلاقي خطوتك مع خطوتي .
أغلب عمر مشوارنا
ويوم الخطاوي تلتقي
كل الورود اللي جمعناها تصير ..
ذكرى عطر
وبيديننا
ينبت زهر صبارنا
مرت سنة
خلتني أعرف وشكثر
خلتني أعرف وشكثر
حلو كثير اصرارنا
نبقى سوى طول العمر
لو البنفسج دارنا
ولو البحر
كل ليله
واعدنا على حد العيون ..
وزارنا .









(سراب وطيـن)



مثل ماتنادى "النهمه"
حنين بحار
على شاطى الزمن عاجز
يعدّ الباقى من عمره
يردّ حبك ينادينى
بعد سنتين من هجرك
بعد سنتين من حزنى
بعد ماجفّت دموعى
وسط عينى
يرد حبك ينادينى
بعد ماصارت احلامى
سراب وطين
بعد ماشابت آمالى
وصرت عاجز
وقلبى صار مركب حب
على يال البحر منسى
شهور وسنين
وصارت ريشة حروفى
تبكى لحظة التلوين
لاتنادين
لاتنادين
صرت عاجز
صارت حتى أوتارى
غريبه عن سما التلحين
تركتينى..
شاعر حب
على صدر الحزن رسمه
ومثل مايرسم المجداف
على وجه البحر اسمه
رسم حبك مواويلى
بكت كلمه..
شكت كلمه..
وقلبى ياما فى ليلى
ضيّع فى الاسى حلمه
تركتينى قمر مجروح
تاكل عمره الظلمه
وبعد سنتين
يرد حبك ينادينى
مثل ماتنادى " النهمه"
حنين بحار
على شاطى الزمن عاجز
يعدّ الباقى من عمره
يعدّ وقلبه فى حسره






(معقوله تحبينى؟؟ )



تحبينى؟
معقوله تحبينى..؟
ومعقوله سهرت عينك
مثل عينى
وفينى ليله فكرتى!
ورددتى حروف إسمى!
فى لحظة شوق تنادينى؟؟


معقوله تحبينى؟؟
ويهدينى الزمن حبك
بعد ماكان ناسينى
وياخذنى من احزانى
وينسانى بدفا قلبك
افرح باقى سنينى


مو معقوول..
مااصدق
اكيد انتى تدارينى!
ولو حتى تحبينى
شأقدر فى الهوى اهديك
وماعندى غير حزنى..
وقلم..
وأوراق تتألم
بقايا حروف تطوينى


معقوله تحبينى؟
أبى كلمه بالتحديد
قوليها وريحينى!
ولاّ ..بس...لا تقولين
أخاف الرد يضنينى...
أخاف انتى تدارينى...
خلينى اعيش احلم...
لو لحظه ...
من عمر الزمن احلم تحبينى
حبك حبم ماينطال
لو اجمع نجوم الليل
واشبّكها بشرايينى
حبك حلم ما ينطال...
ولو حتى فى احلامى
حبك فوق مااتمنى
وفوق ماتطلبه يدينى
خلينى اعيش احلم
لو لحظه...
من عمر الزمن ..احلم تحبينى









(انتي غير)


وشلون أقول إن أنتى غير؟!


وشلون أقول..


إن انتى تغرين النوارس بالغرق


فــالازرق الفاتح


وشلون تغرين الرصاص..


يحب ويصافح.


وشلون تغرين الشتا..


يدفّى ريشة طير.


وشلون بعيونك مساى


دايم مسا خير


شلون أقول إن انتى غير


شلون أقول إن انتى غير


غير البنات


وشلون أخلّى للحكى عنّك


طعم سكّر نبات


شلون أقول إسمك ولا..


يصير لسانى ..نعناع


وتصير..


حروفى غزلان


ويصير ..


قمر صوتى صلاة!


شلون أعنّيك وماتصحى عصافير الفجر


ولا يطول عشب البحر


أو تزهر بدربى حصاة!


وشلون أقول إن انتى غير كل البنات


وشلون أقول إن انتى غير..


غير البشر


ياللى إذا تبسّمتى ..


يفزّ


من سدرة الليل.. النهار..


وتقرب سما


ويكبر قمر


وإن قلتى للدنيا مسا الخير إنولد..


من شفّتك


مليون نجمه


وإنتشى فيك السهر..


شلون أقول إن انتى غير..


كل البشر؟!

 

[أمجاد محمد]

ينتمي للغة الإبداع النادر

(إنتظار )

لاتجرح عيون الثواني بالصبر

لا .. لا تواعدني تجيني .. وماتمر

وتخلي أيام العمر

وردة فرح من غير عطر

وأصير أنا .. بعدك سطر

هارب من احضان الكتاب

وتنساني في بحر العذاب

موجة حزن

على السواحل تنتظر

لاتجرح عيون الثواني بالصبر

لا .. لا تواعدني تجيني .. وما تمر

قلنا وعدنا بالثمان

صارت تسع

! تسع وعشر

عشر وتسع

! عشر وعمر

عشر وعذاب

!! عشر وأماني تحتضر

حتى عقارب ساعتي

صارت تحاشى نظرتي

ملت تفّر

لا تجرح عيون الثواني

بالصبر
لا ..
لا تواعدني تجيني .. وما تمر

(اشتقت لك)
تصدقين

.. البارحه أشتقت لك

.... البارحه

... كلّى شجر وأورقت لك ؟!!

... البارحه

.. أنا امتليت من شمس وجهك والحنين

... وأشرقت لك ؟!!

... البارحه

... كنتي السوالف كلها وكنتي ألبها

.... وعيونك الليل الطويل

.... وكل ما أشتهي !!

.... وكنتي الحديث العذب

.... اللي أعيده .. وأبتديه

...... كل ما أنتهي

.. البارحه

... مليتي روحي بالحياه

.. كانت عيونك دنيتي

... كل الجهات

... كنتي إختصار احلا الاغاني كلها

.. وكل البنات

.. وأشتقت لك

... صرت أنا ظلك شجر .. وأورقت لك

.... حبيبتي ...!!

.. ليتك تجين ..

.. كل ليله حلم

... مثل ماجيتي البارحه

... مثل ماكنتي البارحه

... البارحه

... كنتي فيني

... أحتضان الأزرق لكل السواحل والطيور

.. كنتي أعشاب البحر

... كنتي المراكب

... والمينا

... المناديل اللى تلّوح فـ الغياب .. و فـ الحضور

.. وكان في حضنك نوارس

.. وكان فعيوني غرق ؟؟

.. كنت أمد حبال لشراع بيدينك وأموّل

.. القى كل الماي في صدري شعور

.. البارحه

.. كنتي في بالي بخور

.. كنتي في عيني أماني

.. وكنتي أنتي فـ الشفاه الذابله فـ الصمت

.. عرس .. ويّباب وأغاني

.. الله يالبارح كثير أشتقت لك

.. وصرت بغيابك شجر

.. وأورقت لك

.. وأمتلت روحي سوى

.. وأشرقت لك

(يستاهلك ..هالجو )

الجو جميل.. اليوم..
يستاهل احساسك
غيم ورذاذ ناعم
صبّي الندى بكاسك !
خلّي ربيع الأرض
رجلينك البيضا
وشال السما... راسك!
إمتدي طول الكون..
إمتدّي عرض الكون
توزّعي..صيري..
في كل شي حولك..
نبض ..
وصفا..
وعيون
خلّي قُزح..ريشه..
والدنيا كراسك!
اليوم بامكانك..تعيدين رسم الكون..
على هوى جنونك..
وفوضاك..
وهوجاسك!
خلّي خيوط الشمس..
واللي انفذت غفله
من بين هذا الغيم
خلّيها لون أزرق
وخلّي السحاب أخضر
ولون المطر "أورانج"
وثوب الشجر وردي
وبنفسجي فاتح لون الغصون، والناس..
ممكن تكون حمرا..
ممكن تكون صفرا..
ممكن تكون أي لون
أختاري لون ناسك!
اليوم إنتي الكلّ..
والكل فيك إنتي..
اليوم كنّه جاي.. قدّك..
على قياسك
خلّي الجنون اللي
في داخلك ينطق
صبي البحر فـ البر
وسمّي المواني ..شيح
خلّي نجوم الليل..
على الدروب اتطيح..
وتنبت على الأسفلت!
وفوق فـ السما رشي..
ياقوتك وماسك!
ولمّي اللي مِتْبعثر..
أو بعثريه اللي.. تْشوفينه متماسك!
عيدي الحياه للموت
واغريه بانفاسك
ولاّ أقول لك شي؟!
ليش ماتجين يمّي..
نحضن سوى غيمه
نبلّل عواطفنا
وننثر ورود حمرا..على شفايفنا
وقلبي يبوس قلبك..
كل ما الرذاذ باسك!
تعالي ونعتّق...
جمال هذا الصبح
في كاسي وبكاسك
ونشرب طوال اليوم..
من ماي نشوتنا..
مع هالمطر ..
..والغيم..
...واحســاسي..
....واحســـاسك !!!

(يامودعه)

يامودعه..
ليتك عرفتي من قبل لاتودعين..
إن الجهات .. مو أربعه!
والوقت.. مرسى للحزن
مركب ولا له أشرعه
ليتك عرفتي من قبل لاتودعين..
إن الفرح..بعدك يطيح..
وايديني تعجز ترفعه
وإن الأمل..
بعدك رحل..
مدري زعل..
ولاّ سؤالي لوّعه
وإن الزمن..
من عمري ..في عمري انتثر..
وعيّت سنيني تجمعه
وليتك عرفتي من قبل لاتودعين..
بصير حزين..
بعدك حزين..
وعيوني يشربها التعب
قلبي مدينه للحنين
والناس صارت أقنعه
وإن العذاب
كشف لي بعدك برقعه.
وليتك عرفتي من قبل لاتودعين
إن الثواني بغيبتك..
ناس ..بزحام..
وإن الكلام..شارع غريب..
ترفض حروفي تقطعه.
يامودّعه..
ليتك أخذتي من قبل لاتودعين:
طيفك..
وشالك..
والعطر..
واشتات ذكرى موزعه
علشان تصير..
بعدك جهاتي.. أربعه !!!

 

[أمجاد محمد]

(الكلام ... كرسي خشب )

إجلسي فـ الكرسي هذا
أو هذا
ولاّ اقول لك..
يمكن افضل ..
لو عطيتي الشمس ظهرك !
إنتي دايم عادتك..
كل مابديت وياك حديث
عطيتي للشمس ظهرك
واختفى صوتي بظلامك !
وشتبين أطلب لك: عصير..
ولاّ قهوه..
ولاّ يكفي دمعتي.. ومالح ملامك ؟!
لا..قهوه..
قهوه أحسن
عندهم قهوه لذيذه
تشبه البُّن بعيونك
وفيها من ريحة كلامك
قهوه وسط
توقظ احساس الصباح بمهجتك
وتصحّي في صدرك غمامك
جربيها.
لوسمحت: إثنين قهوه .
وين كنّا؟!
وين وصلنا بالسوالف ؟!
إيه.. ذكرت..
كنت اقول لك ليش ذبلنا ..
ليش صارت.. يابسه فينا العواطف؟!
ليش قلبك منطفي..؟!
وليش قلبي..
صار مدينه موحشه..
ليل.. وعواصف ؟!
ليش ايدينك بارده
وصبحي بين ايديني خايف ؟!
ليش صرتي ..وانا يمك..
ماتشوفيني بقربك
وانا في حضرة نهارك..ماني شايف ؟!
ليش..........
أنا أسف،إشربي القهوه قبل تبرد..
ويطغى.. مُرّها فوق الشفايف..
........
...........
وين كنا؟!
إيه..ذكرت ..
كنت اقول.....
ولاّ .. خلّك من كلامي .
الكلام كرسي خشب !!
مايحضْنِك في حنان
أو ينسّيك التعب.
الكلام في أوّله .. بس أوّله..
عِشْب
وفـ الآخر لهب.
الكلام في أوّله..موال يطرِب
ومن قبل ماتحس.. تنـزف..
وينتشي جرحك طرَب
الكلام.. كرسي خشب !
وش فايدة كثر الكلام ..
قهوه أحسن
إشربي القهوه..بْرِدَت..
ولهفة الحب بردت..
واللقا.. وباقي العتب
إشربي القهوه..
أظن
موعد الفرقا قرَب !





(ولا هنا ...ولا هناك )

ولا هنا..
ولاهناك..
معلّقه ..بين كل شي وضده..
في هواك !
بين الشموع اللي تضوّي الذاكره
وبين : كل شي فيني نساك!
بين النهار اللي يقود..
كفوفي العميا لنهار
وبين الظلام اللي يودّي خطوتي
لعتمة سماك.
كل مابديت ..
ألمس طرف جمرك.. لقيت..
كفّك رماد
بردك خذاك
وانتي هناك .. معلّقه..
بين المطر
وجروح ظماك
بين صوتك المليان عشب..
وبين العطش..
بحروف صداك
لاانتي هنا
ولاهناك !
أفتح درايش أشواقي عليك
ألقاك دخلتي . .ومادريت..
من وين يجيبك الهوا ..
ورده ..
و ينسى لايجيب.. معاك..
شذاك !!
أحسّ بانفاسك ..ولا..
أشوف ملامح صورتك .. ولا..
دفاك !
أحاول أتذكر عيونك..
لونها..
ولااذكر إلا مابقى ..
من كحلها..
وليلٍ قبل تسرين .. سراك!
مرّات أحس مشتاقلك
وأدوّرك..
مره بدفا حضن الوصل
ومرّات.. أروح برد الجفا
مالك أثر
مدري جفيتي الأمكنه
ولاّ المكان اللي جفاك؟!
لاانتي هنا..
ولا هناك !
من يوم تفارقنا أخذتي كل شي..
أخضر معاك
ولاتركتي لي وراك ..
إلا التفاصيل النحيله في يدي..
وبعض حكي.. أصفر ..
..ولايشبه رضاك !
كل مانسيتك ..أذكره
كل ما غفيتك.. أسهره
وانتي بقيتي معلّقه
مابين صباح الذاكره
ومابين مساك !
بعضك معي..
وبعضك معاك
لاانتي هنا ..
ولا.. هناك !




(طمّنيني)
طمّنيني
من يوم ماتفارقنا
رحْت وضحكتي عندك
عساك مثلي
نسيتي ضحكتك ..عندي!
عساك مثلي
تغبّيتي وسط صدرك
تلحّفتي بهدب عينك
صكّيتي الستاير زين
وحبستي أدفى أنفاسك
لاتاخذ آه..ولا تودّي.
طمنيني ..
عساك مثلي
كل ماجابوا لي طرياك..
يصحى عرس في صدري
وندا سامر
وغيمه لونها وردي
وكل ما أسمع أغنيتك
أغيب بعيد
وأعيد أيام عشناها
يوم .. بيوم
وتموّل قصايد من دفا وجدي
عسى باقي
من ذاك العمر وياك
لو لحظه
عندك..ترفض تعدّي
عساك مثلي
كل ما قلت راح أنساك
كل وردة وَلَه فيني
تعطّر فيك.. وتندّي
طمنيني..
عسى كل العمر ..ماضي
عسى كل الفرح ..ودّع
عسى كل السما ..شبرين
وعسى كل الشعر عندك
ما يظلل أصابع لهفتك..بعدي
عساك مثلي
كل ما أسأل عيوني عن عيونك
وليلي.. عن ضوا صوتك
أو خوفي ..عن إيدينك
أبكي من حزن ردّي!!





(قبل أسبوع)


مثل هاللحظه ..
قبل اسبوع
كان قلب الفرح يوقد..
لقلبي.. شموع!
وانتي كنتي .. في حضني
وكان يحضن مِزِن وصلك..
ظامي لهفتي ..وضلوع
ونورك كان..
يمسح عن سما عمري..
كل ما شافته قبلك
من ليل..
وشتا..
ودموع
وايدينك مثل نهرين
وانا كنت..بين نهرين..
مثل نبتة عَطَش خرسا
كان حبل الرجا
ما بينها .. وبين الحياه..
مقطوع
مثل هاللحظه ..
قبل اسبوع!
كان عطرك..
يسافر في شراييني
واشجار الحكي تورق
وتتناسل لغه خضرا ..
وتسري في عروق الليل
نجمة حب..
وفي برّ الوَنَس.. ينبوع!
عطرك كان..
غريب ويشبهك بالحيل..
فاتن..
حالم..
ودافي..
وصوته هادي ومسموع
و انفاسك..
كانت لاهيه تعلّم
فاتحْة الشذى.. للورد!
وتعلّم زهرة الليمون..
تتهجا كلام الحب
وكيف تحاور الممنوع!
وكانت بسمتك تهدي
لعيون القمر.. شباك
ولموج التعب.. مينا
وعيديات للأطفال
وسنابل من رضا.. للجوع!
مثل هاللحظه..
قبل اسبوع!
قبل ماتجين..
كنت اذبل..
ويشربني الجفاف..وكان..
في قلبي الفرح موجوع
وجيتيني
معاك الصبح..
مليتي دنيتي بالنور
غسلتيني مثل هتان
فتحتي للأمل بيبان
وطمّنتي..
حمامٍ في ذرى قلبي
حزين
وخايف..
ومفجوع!
غمرتيني بحنانك ليْن..
خليتي الفرح يشعل
لقلبي شموع
مثل هاللحظه..
قبل اسبوع.

 

[أمجاد محمد]

(طريق مسدود!!)

شنهو آخر هالمشاعر ؟!
فـ النهايه..
كل واحد فينا بيروح بطريق
ويبدا ليل وماله آخر
بينكسر فيك النهار
وينذبح في قلبي .. شاعر
فـ النهايه..
بفتح عيوني في يوم..
وما القا بعيوني .. عيونك
لا حنينك..
لادفا ايدينك.. ولا..
وجهك..
ولا حتى بيبقى فيني ..شي منك
إلا ذكرى..
تشعل الثلج وتكابر
مافيه شي بيبقى فينا من هوانا..
لازعلنا
لاعتبنا
لاسهرنا
لا فرحنا..
لا..ولا ورد الجروح
كله ياعمري بيروح
كنه ماكان عمره حاضر !
شنهو آخر هالمشاعر ؟!
شنهو آخر فرحتي..
شنهو آخر دمعتك..
شنهو آخر شوقي لك..
شنهو آخر لهفتك..
شنهو آخر هالقصيد..
اللي في صدر الدفاتر ؟!
أنا أدري ..
إنك أجمل من فتنّي
وانك اغلى ..حب سكنّي
إنتي خليتي غصوني الصفرا.. تشرب..
من حلى ماك .. وتغنّي
وانا أدري..
إنك انتي.. شي مني..
شي يسوى الروح.. طاهر
بس قولي..
شنهو آخر هالمشاعر ؟!
لا أمل عايش معانا..
لا رجاوي..
لاصبر .. والياس صابر !
أنا وانتي نجمتين
مهما تجمعنا سما..
وليل ساهر
لكن الصبح بيجي..
وبيفرقنا أكيد
ويمحي اللي كان ظاهر!
أنا وانتي وردتين..
لو تسامينا .. عطر..
لكن المجد للخناجر !
أنا وانتي موجتين
ضد تيار القبيله
ضد ابوجهل وقريش
ضد دمعه فـ المحاجر
أنا وانتي .. شراع سفينه
والرياح.. تنهى وتامر
أنا وانتي..
نؤمن إن الحب صلاه
في زمن بالحب ..كافر
أنا وانتي..
ندري لازم نفترق
كان مهو اليوم.. باكر
حنا ندري ..
بتنجرح فينا الخواطر
وفـ النهايه..
بينكسر فيك النهار..
وينذبح في قلبي.. شاعر.





(صوتي ذابل )

البارحه يوم اتصلتي ..
قلت لك:أنا أحبك؟!
أو نسيت..
مثل ماإنتي نسيتي؟!
أو تركت البارحه صوتي ينام
وينطفي برمل السواحل؟!
لو صحيح قلت أنا احبك..
ليش احس أن صوتي ذابل !
ليش اصابع فرحتي
مالوّنت وجه النهار
وخلت عيونه كواحل؟!
ليش ماانشقّت ضلوعي
وطار من بين الحنايا
برق وردي
وامطرت هتان
وغرّق الصبح الأنامل؟!
ليش ماانولدت نجوم بليل قلبي ؟!
وليش ماسال الورق..
عشب وجداول ؟!
وليش ماذابت رسايل؟!
ليش ماصار الغرام
ينبت بكل القلوب
عشب برّي
ومات عاذل؟!
لو صحيح قلت : أنا احبك
ليش ماصارت ثيابي ياسمين؟!
وصاروا ربعي طيبين ..
وصرت أنا أشبه مناديل الوداع..
وصاروا احبابي ..منازل؟!
بذمتك قلت : أنا احبك؟!
البارحه يوم اتصلتي..
قلت لك:أنا احبك ؟!
شي غريب..!!
شاللي حاصل ؟!
أنا لما اقول احبك
فـ العاده
يملاني السحاب
ويسكن بصوتي نسيم
ونجمة سهيل ..وبلابل !
يحتفل فيني الندى
ويغسلني
تصير كلماتي..مشاعل!
أنا لما اقول أحبك
تصير حارتنا خزامى
وتزهر احلام البنات
والأغاني تصير رومانس.. ..
والرغبه قارورة عطر
تحت الجدايل
أنا لما اقول احبك
أدري إني بخير وطيب
وروحي تشبه للسنابل!
البارحه ماظنّتي..
قلت لك: أنا احبك.
إتصلي الليله ياعمري
إتصلي الليله..
بحاول!






(المجد لطين)
تبكين؟!
يعني انتي مثلنا..
من طين!!
يعني انتي ..
ماانتي نجمه
لا ولا انتي ظل غيمه
ولازهرة ياسمين!!
يعني ماانتي
شي يشبه للشجن
أو تشبهين اللي تعتّق
في عيون الليل من خمر القصايد
والحنين!
كنت أظنك طول عمري
شي غامض
شي موحي
شي يشبه للخيال
يشبه الضي لا تكسّر
من حنايا كريستال
وسال ..لونه
في غصون البال .. وشجّر..
فالأصابع..تين !!
كنت اظن انتي خرافه
كل ما زاد الظلام..
ومرّنا عجف السنين..
أمطرت صبح وسنابل
بأمر رب العالمين!
كنت أظن..
إن انتي معنى
يلهم قلوب الحزانى
والغلابى ..الطيبين
كنت أظنك مثل قولة:
"وش أبشّركم؟!"
لناسٍ صابرين!!
كنت أظنك غير عنّا
كنت أطنك تفرقين!
مدري هو ورق توتك تساقط
ولاّ هو فعل السنين.
المهم إن انتي بنت عاديه يصيبك..
مايصيب الآخرين!
يعني ممكن تحزنين
يعني ممكن تتعبين
يعني ممكن مرّه تحتاجين ..
لجروحك ضماد
وكحلة عيونك تسيل
وتزهر كفوفك سواد
يعني لك قلب ايتمرجح
بين قسوه ..وبين لين !!
يعني ماانتي مستحيله
يعني ممكن تكرهين
يعني ممكن تعشقين
وممكن بلحظة جنون
يوم.. تحبيني أنا..
يعني ممكن ألمسك
واحس نبضك
وممكن ايديني تحس..
برد غصنك
وممكن يخضّر دفاك..
في ايديني
وتمطرين!
وممكن انتي تضعفين
وممكن بعتمة جروحك..والشقا..
تبكين!
دامك إنتي مثلنا
أشهد أن المجد كله
للثرى..
والطين!!





(جرح العفو...)


إجرحيني..
بس عشان.. ماتجرحيني!
صدقيني..
لوغفرتي..
تجرحيني .. مرتين!
إجرحيني..
إخذي ثارك..
خلّي ضلوعي حطب
تحترق في وسط نارك
إهجريني..
عذبيني..
ومهما سوّيتي بعد..
أنا راضي في قرارك.
أعترف ..كلّي ندم..
أنا بادي بالأسيّه..
أنا أهديتك .. ألم..
شمس سودا..
جرح حق قلبك هديه
أنا أهديتك بعد..
كل عنادي..
كل رمادي..
كل سوادي..
كل زهوري اليابسه.. وانتي طريه
أنا بادي بالأسيه.
رحمتك ؟! لاترحميني..
مهما يترجى القلم
ما اتحمّل جرح عفوك..
فوق تجريح الندم.
إجرحيني..
لوغفرتي..
تجرحيني.. مرتين.

 

[أمجاد محمد]

(جذع أثل)
ماتدرين .
كنتي ماتدرين..
إني كنت .. لحظتها حزين!!
يوم جيتي..
بكل بياض حرّيتك..
أنا..
كنت في قلب أحزاني.. سجين!
ويوم جيتي .. بكل طاهر مزونك
أنا كنت لحظتها..أخونك..
مع جفافي..
وجرح في صمتي دفين!
وانتي كنتي..
تسولفين..
وتسولفين..
كنتي مليانه بهى
وانا فارغ..
إلا من أوراق صفرا..
وجِذْع "أثل"..مرمي..
وحس ليل
وآهةٍ سكين!
وانتي ماتدرين.
كنتي ماتدرين..
كان عطرك..يشعل الدنيا حرايق
يعيد تجمير الكلام
كان يغزل
من تفاصيل الرغبه..آهات وحمام
وكنت أنا..
بارد
وشارد
مرّ عطرك
في يدي.. برد وسلام!
ماولّع ثيابي..
ماعلّق أهدابي..
وأحْرَمها المنام!
ماطيّر ايديني فَراش
وما صلبني
بين حلاله ..والحرام!
تتخيلين..؟
مر عطرك..
في يدي..برد وسلام!
كنت لحظتها هجين..
من سراب ..وطين.
وانتي ماتدرين.
كنتي ماتدرين..
ليلتها كانت ضحكتك..
مينا.. وشْراع .. ونوارس..
كانت أحلى من أغاني عرس
ومن نسيم يمر هامس
ضحكتك كانت مثل..
وجه شمس بليل دامس
كان لها..
فيّ..
وعصافير ..
وعبير..
ومع هذا.. ما اسْحَرتني..!
عيّت بقلبي تلامس..
أي أحساس وشعور
أو تدوزن فيني..هاجس!
كنت لما أبتسم.. واجاملك
كان وجهي بداخلي..
قطعه من حنظل..
ويابس!
كان عابس!
وانا حابس..
في كفوف الصبر حزني
ماأبي تدرين إني..
كنت ذيك اللحظه..مُحبط..
منكسر..
مسكين.
وانتي ماتدرين.
ياعيوني..
أنا آسف
كنت ذيك الليله
جاحد..نعمة الوصل وحنانك
وماتيسّر.. من رضاك..
وماك ..
وسحر الياسمين.
أنا آسف..
أعتذرلك..
أعتذر لاحساس شوقك..
صبح قلبك..
والعطر..
والجمر..
والتين!
أنا آسف..
كثر
مافاتني ذاك المسا ..
من حنانك والحنين
كثر ماعمري نقص ذاك المسا
نور.. وسنين.
كثر ماأخطي عليك..
وانتي دايم تغفرين !
كثر ماأبقى غروب بلحظتك..
وانتي دوم بلحظتي..
ياالحبيبه..تشرقين.
(بيجامتك)
ودّي بصبحٍ مبتهج
وردي..
ندي..
يليق بلون (بيجامتك)!!
صبحٍ مورّس بالعطر
من الحمام بخطوتك..
ليْن النجوم بهامتك
يغطّي جيدك بـ ..البها..
ويطرّز بشمسه مفاتن قامتك
يعرّي ليلك لانسى..
يستر غوى يمامتك..
الساكنه فوق الغصن..
الراوي من ماك وشهَد غمامتك.
من وين أجيب..
صبحٍ يليق فعلاً..
بسحر (بيجامتك)..؟!
فيه من (هالبيجامه).. عطرها..
حريرها..
واللي ملا قلب المسا..
من نورها وعبيرها.
من وين اجيب ..صبحٍ صبوح..
طاهر سموح..
يعْتِق مساي من سحرها
ويفك قيود أسيرها ؟!
صبحٍ إلى منّه ورد ماها..
يعِلّ..
ولايموت في بيرها..!
ولا سولف بنشوه..فضح..
سكّر عناقيد العنب
قليلها ..وكثيرها.
صبحٍ يخلّي (بيجامتك)
أميرة الليل الحرير..
ويصير هو.. أميرها!
قوليلي بسّ..
من وين أجيب ..
صبحٍ بهيّ..
يليق بليل (بيجامتك)؟!
(بطاقة خاصة )
إنتي أجمل ماحصللي العام
والعام اللي قبله
واللي قبله
واللي قبله
إنتي أجمل ماحصل في عمري كله
وانتي أجمل من نثر في عيني نوره
وانتشت روحي في ظله
واجمل أجمل من خذا قلبي معاه
وصرتي في صدري محله
فالسنه هذي اللي راحت..
إنتي أحلى ماكتبت
وانتي أروع ماقريت
وانتي أورق ماحلمت
وانتي أشرق مارأيت
وانتي أروى ماعطشت
وانتي أعطش مارويت
وانتي أخطائي الصغيره
وانتي أخطائي الكبيره
وانتي اللي كنت بحزن
لو عقلت وماخطيت!!
فالسنه هذي اللي راحت..
ماملا روحي سلام
غيرك انتي
وما ملا صدري حمام
غيرك انتي
وما مسح عني الظلام
ولا لوّن..
فوق شفايف صمتي المر الكلام
غيرك انتي
ولا خلى الصبح يملى كفي الظلما..غرام
غيرك انتي
فالسنه هذي اللي راحت
إنتي أجمل ماحصل
وانتي أعذب من وصل ..
للقلب
من ماي الغمام.
كل عام وانتي بخير..
كل عام وانتي الحبيبه
وانا فيك المستهام!
(صباح أخضر)
توّ صار الصباح أخضر
توّ صار الحكي..سكّر
توّ صار النهار أجمل
وعمري بعمره.. صار أكثر،
يوم ما طلّ ..وجهك شمس..
دفيت..
وأصبعي شجّر
رجع لعيوني كل عصفور
كان فـ ليلتي مهجّر
وصار لون الصباح أخضر.
يا ألله...
شلونها ليلة البارح؟!
شلون مرّت؟!
قدرت شْلون..
أعيش هالليله من دونك
حزين وقلبي مْبعثر ؟!
قبل ماشوفك وأدفى..
شلون ما متّ ؟!
عشت شْلون كل هالبرد
والوحشه
كل هالغربه في ليله..
وشمعه تصغر ..وتصغر؟!!
شلون ما متّ ؟!!
طول البارحه..بردان
كل البارحه ..بردان
وكنت اتمنى لوهو كان..
عمر البارحه أقصر !!
يا ألله..
قدرت شلون أعيش ليله..
وانتي بعيد
مسافة شوق
وعمر أصفر
لحدّ ما طلّ وجهك شمس..
ودفيت..وأصبعي شجّر !!

 

[أمجاد محمد]

التايه اللي جاب بصري يقنه=جدد جروح العود والعود قاضي
جينا نحب ونطلب الله جنه= جنة نعيم ويوم يابس لحاضي
ياليت كانت حبتي في معنه= يوم العيون عن الخوامل غواضي
يامن يعاوني على وصف كنه= اشقح شقاح ولاهق بالبياضي
لاريحة قشرا ولاهي مصنه= ريح النفل بطمطمات الفياضي
ونهودها للثوب الحمر شولعنه= حمر ثمرهن واقفات غضاضي
والخد ذابح القلوب المرنه= براق مزن لاعج اللون ياضي
ياليت سني على وقم سنه= بايام مابيني وبينه بغاضي
ايام جلد الذيب عندي محنه=نصبح وزرق الريش لهن انتفاضي
وا جرح قلبي جرح واد وطنه= غر المزون اللي وطنه وفاضي
والبيض قبلي محسن عذبنه= ونمر على وضحى جرى له عراضي
والبيض كم واحد يبسنه= يبسة شماشيل العذوق النفاضي
عزي لمن غر الثنايا كونه= واركن على كبده كوي عراضي
شوفي بعيني والخدم يركبنه= بنت الشيوخ مخدمين الفياضي
على اشقح من زمل ابوها مظنه= ركبت عليه اتشنطح باعتراضي
بمشجر من سوق هجر مغنه= على خياطه ناب الارداف راضي
وين انت يامشفي على طردهنه= انا طويت رشاي واقفيت قاضي
احد يطيح بنار واحد بجنه= وترى الحضيض اللي له الرب راضي
بصري الوضيحي الشمري شاعر غزل
هذه الابيات التي اصبحت مثلا يضرب الى وقتنا الحاضر

ياليتنـا مـن حجنـا سالمينـا
كان الذنوب اللي علينا خفيفـات
رحنا نبي نخفف ذنـوب علينـا
وجينا وعليها كثرها عشر مرات