دلّوع قلبي!

[رضا الهاشمي]

سلامي على رمش ٍ ليا رفّ رفّتْ لهْ

طيور الهوى و أهدتْ لهْ أحلى التّغاريدي




أنا لي ضيا إليا لفى الخلّ يخفتْ لهْ

وأنا سيّد ٍ وإنْ جا حبيبي غدا سيدي




عريض الحوايبْ ما يحفْها تحفّتْ لهْ

عيون العرَبْ منْ داني الأرْض وابْعيدي




خفَقْ لهْ فوادي عقْب ما الرّوح زفّتْ لهْ

معيريس نبض ٍ صار لهْ عرْس بـ وْريدي




تلبّدت غيم أشْواق و العين نفّتْ لهْ

هتون الحنين إليا فقدْته وأنا افْقيدي




يا بعد الغريب المُحْزن اللّي تخفّتْ لهْ

ليالي الوصال و قابلتْه المَبَاعيدي




خفوقي اليتيم اللّي له أمّ ٍ توفّتْ لهْ

قبِلْ تزْقرهْ بين المَخاليق يا اوْليدي




أجابلْك حيّ ٍ مير مقْلتك صفّتْ لهْ

منايا الدّعاج اللّي لها لحْظ منْ قيدي




تنابع لكْ افْتون ٍ ليا الغير جفّتْ لهْ

يا حسْن ٍ عليه أحلا الكواعب مواريدي




مواعيدي اضْلوعي شموع ٍ تطفّتْ لهْ

لجِلْ تضْوي بنور الوَجاين مواعيدي




تشيد بْخصِرْ أهيَفْ غصون اتّهفّتْ لهْ

تماري نضُود النّخْل بهْ دوم واتْشيدي




ليا منْ تمايل شجْرة المُوز لفّتْ لهْ

وتثنّى شبيه البان بالعُود بـ عْويدي




ألا يا بَرى قلْبي إذا الظعْن قفّت له

وسرَتْ بنْت قلبي و ظعْنها منْ تناهيدي




ألا واعزا محْل اللّقا يوم نشْفَتْ لهْ

مزون المُواعدْ رغْم أنْها رَواعيدي




ألا في غيابك صاح حتّى تلفّتْ لهْ

فُؤاد ٍ كئيب الحال صمّ الصّلاخيدي




فلا ايْخون نفْس بْكلّ الأنْفاس وفّتْ لهْ

إذا خان حبّي ضاع كلْ شيّ منْ إيدي




على ذكْر عيد الفطْر حبّيت ألْفِتْ لهْ

هجُوسهْ وأنا إنْ قلْت لي شيّ ما عيدي




يعَيْدُون ربْعي وآنا لعْيون ذرْفتْ لهْ

وتقول العَرَبْ عيّد وأنا أقول هو عيدي




إذا كان روحي باللّواعجْ مَ كفّتْ لهْ

ألا اتّخبّروا دلّوع قلْبي وشْ ايْريدي