[ قَصيْدَة رمَضَان ]

[سعيد الموسى]

الساعة الخامسة صباحاً بإذن الله سيتم أقفال هذه الفعالية ..
لنرى نتاجكم ونقطف ثماركم بعد ذلك ..
نداء أخير ياأحبة : )

 

[الشعر الشعبي]

[ 1 ]

بعد رؤية هلال الشهر ، باقي رؤية احوالك ..
ـــــــــ تعدّلها وتبدّلها إلى ما يُرضي الرحمن
إذا افعالك هي اقوالك ، واذا اقوالك هي افعالك
ـــــــــــ تأكد بعْدها أقدر أسمي حضرتك إنساااان
تقندِل أمنياتك في عتيم الحالك : لحالك
ــــــــ وترسملك مسافاتك : مسا .. فاتك بدون الوان
تعال اعزف على غيابك بقايا نغمة وصالك
ــــــــــ و دندنها كذا.. مابينك وبينك بلا عنوان
قل الشعر : انعتاقك منك ، قل هو : عُقدة حبالك
ـــــــ قل انّه : موطن اللعنه ، قل انّه : لعنة الأوطان
ترى اللي ماكتب إسمك ، هو اللي دوم يقرالك
ـــــــ فلَا تحسد (حرامي الحرف) واعتبره كما الإعلان
أحاول بالـ"ميلاتونين"* اكون اقرب لآمالك
ـــــــ واحرث النوم لـ اجل احلم بشيٍ يشبه الإيمان !
أبجمع ما تساقط من كمثرى صوت موالك
ــــــ وابهدي بحّة الجرح الأليم : (الذنْب والغفران)
تهجى الفقر واقرى للفقير حروف أ م و ا ل ك
ـــــ ولا تكتب سوى "أعطى" ولا تمحى سوى "حرمان"
لَعَمْرِي لو حسبت العمْر بالضحكات يصفالك ..
ــــــــ سنينك بالطفوله ، والبقيّة تُعتبر نقصان
كذا غابوا .. كذا ملّوا .. كذا ماعاد يبقالك
ـــــــ سواك ولا سواك اللي كتب من أمس حتى الآن
بـ اسمّي مايلي المعنى : (قصيدة) وانت يهنالك ..
ـــــ تسمّي مايجي قبله : بحَر ، واللي غرق : أوزان
أنا في مثل هذا اليوم قالوا "زادوا عيالك"
ـــــ وسلّمني أبويَه للحياة ، و مت بالأحضان
إذا مرّه لقيت بقلب من حبوك مدهالك ،
ــــــ تمسّك بالمعاليق و تجوًد قبل ماتنهان
رقيت وما لقيت الا من الضيقات ما نالك
ـــــ ترا كل اللي راحوا للسما ضاقوا من الجنحان
هنا أقدر أقول ان الأماني ماهي اشوالك
ـــــ لـ صار الحلم سقفه فوق سقف الحلم والإمكان
أبكتب طالما عندي نَفَس من غير ما القالك ..
ــــ عِذِر يالشعر .. ياوافي .. -تخيّل لو حدينا خان
أنا المرهون بالكلمة واقول : اقواله اقوى لك ،
ـــــ على الفعل العظيم اللي تسوّي بخَتْمَة القرآن
أحس انّ القصيدة شمس والمعنى هو ظلالك
ـــــ فـ لا تحرق قوافيك بوضوحٍ يقتل الأذهان
تحب الطيش لكنّك تلاقي الشيب عذالك
ـــــ تلعثم بالمراجيح / الـ م ج ا ر ي ح ويزل لسان
من اللي علّم احساسي يمنّي طيني الهالك ..
ـــ بـ قولة : "إضحك و تضحك لك الدنيا" ولا قد كان
أنا الماثل أمامك يا أساي وعطني اقوالك :
ــــ عن الحرمان من (دمعِه) عن (الدمعَه) من الحرمان
يمرّ الليل، طقّة إصبعين ،وينطفي بالك
ـــــ وتلقى بين راسك والوساده إنسها والجان
إذا (هذا) هو الأقرب ، أجل نبضي يجي (ذلك)
ـــــ لأني عشت هذا البُعْد من كان اسمه الهجران
قبل ما تطلع بخطوة ، تأكد وين منزالك
ــــ ترى ضحك السراب اقوى من انك تاصله عطشان
أحس اليوم مِن طُهْره كأن الما يتوضى لك
ـــــ وتسجد فيك نبضة ويْخَشَع من آيته شريان
"و في ليله مثل ذا الليله" أشوالك تجي لحالك
ـــــــــ و تقرا ما تيسر من معاني صاغها القرآن
وخِفّة روحك بْهذا الشهر ، كن الشهر شالك ..
ــــ على غيمة مابين "الراء" و "النون" بسما الرحمن
كذا مابين ترجيح اليقين وشك إكمالك
ـــــ أبختم ماسبق بـ الشكر للأعضاء والعرفان

[ قايد الحربي ]

 

[الشعر الشعبي]

[ 2 ]

أوّل الخير قطرة فوق عود الثمام
.. . غيمة الرحمة اللي خيرها : ساقته
بذرة الروح تستسقي نديّ الغمام
.. . كلّل الله " مسعاها " بما : لاقته
تبّت ظلوع صدرٍ ما تطاير حمام
.. . مع دخول الشهر والخير بـ اشراقته
ثالث أيّامه يفصّل على الكون خام
.. . أبيضٍ كنّه : البرزخ لـ ذوّاقته !
جود ربّي قِصَر عنه الشعر والكلام
.. . قالها شاعرٍ مغرور بـ : لياقته
حاله أحلى وأمَرّ من العتب والملام
.. . ورغم ذلك شعَب شِعره بأثر : ناقته
خيرٍ أضفى علينا من " بلوغ المرام "
.. رجّع اللي " قساوة قلبنا " : باقته
دلّني للرضا ياخالقي والسلام
.. عبدك المغتني هذي ترى ( فاقته )
ذنبه أنّه ولد آدم " سليل الملام "
.. . من تَحَت رِجْله .. لما فوق " بغّاقته "
رحلته مرجحة بين البِنا والهدام
.. . تدفعه نفسه اللي نفسها عاقته
زَمزم الدمع يشعِل شمعةٍ بالظلام
.. . " آيةٍ " ردّت العاشق لـ عشّاقته
سـ .................................. ام
.................................... اقته
شرّ الإنسان وش يطفيه غير الصيام؟!
.. إنشد اللي قطع مع نفسه : علاقته
صام عن " ما أحلّ الله " صيام الحرام !
.. . رغم تقصير روحه .. جنّته " شاقته "
ضمّ قرآنه وصلّى صلاة القيام
.. . في شهر ما ربح به غير عتّاقته.
طُهرٍ يفيض قبل يغيض حاذر تنام
.. . كنّك بـ " سجن " ذا بابه وذي طاقته.
ظهرك اللي تنعّم فوق ريش النعام
.. إصلبه كنّك المشفي من " إِإعاقته "!

[ خالد صالح الحربي ]

 

[الشعر الشعبي]

[3]

وقفوا نبكي وانا الفرحان بحضوره
مقبل وحامل متاعه عننا راحل
خطوته فينا عجوله سابقه نوره
تعصف الأيام باللي عاشها غافل
العمر صفحات - من اعمال - منشوره
وكلنا مسؤل يستجدي رضا السائل
الشمال يقول ( ليت ).. وتوقف بزوره
واليمين يقول ( هآؤم) .. والخبر عاجل
شد مئزرك وتغانم عيشها ثوره
كان ودك تنعم بريحانها ناضل
باكيه عين الثواني فيك مهدوره
راجيه منّك ترمم عمرها الناحل
كل امّاره .......اذا ما جات مأموره
عاش صاحبها فقير الحظ متخاذل
كم تشوقنا حضوره وبهجة سروره
هل تغانمنا كنوزه وخيره النازل
من تدارك عيّد بصفحات مغفوره
كلنا محتاج والمثمون يستاهل
بالدعا ارفع كفوف القلب و جذوره
ارفع الأطماع والخذلان والحاصل
رتل وغني كلامه وانقل الصوره
عن نعيم الروح لا،لا يشغلك شاغل
فك جودك لا تعيش بكف مبتوره
أصلح النيه وابشر عاجل وآجل
نيتك لا قامت بأعمال ميسوره
وزنها في الآخره ترجح وتتثاقل
انتصف يوم اكتمل متناغم ودوره
في منازل ( قُدِّرَتْ ) يحيا بها نازل
وقفوا نبكي على الإحساس وشعوره
وناظروا عرجون قرّب يوصل الساحل


[ سليمان عباس ]

 

[الشعر الشعبي]

[ 4 ]

وجهك الصبح ؟! ولاّ شعرك الليل ؟!
أسئلة ما تبي منّك إجابه
أسئلة، تفتح أبواب المراسيل
بيننا، وتكسر جبال الرتابة
ينفتح باب وتزيد التفاصيل
والشبابيك تهدينا الرحابة
مرحبا، قالها الظميان للسيل
صوت فلّاح يستجدي سحابة
تاه ياما، وياما خانه الحيل
والسنين العجاف تدق بابه
كم جرح أرض، وأهدت له محاصيل ؟!
كم سقاها عرق حب وصلابه ؟!
كم رعاها وخطواته مواويل ؟!
عطر نوّارها روح الكتابه
لبست اللي عليه العادل يْميل
وأعوج القلب، من قلب اهتدا به
وإنتِ الليلة أحلام المقابيل
ضحكة العمر في وجه الكآبة
اجلسي بين حدّ العدْل والميل
وامطري مثل دعوة مستجابه


[ وديع الأحمدي ]

 

[الشعر الشعبي]

[ 5 ]

هبت نسايم ..جنة ..الخلد..والخير

جنه. عريضه.. كا لسموات والارض
اقبل على الطاعات من دون تاخير

حافظ على السّنه ولا تترك الفرض
بيني ..وبينك ..لو ..تحول ..المقادير

اضحك بوجه الوقت ياسيدي وارض
أقرأ ملامح ..صورتك .والتعابير

بالذاكره صوره قديمه مع العرض
تساقطت أوراق حبك مخاسير

اعرضت كلي ليتك اليوم تعرض
اقفت سنين الحب منا مقاطير

أنتَ وانا عن بعضنا اليوم نعرض

[ محمد الثوعي ]

 

[الشعر الشعبي]

[ 6 ]

مِن أوّلَهْ.. خيره .. وْبدايات الكَلام
فَزّة سطِر..وِتْبخَّرَت طيب وصلاه ...
سِبحة ودعاء وعيد [يا] مسك الختام
نِمسح هموم الروح في قُبلة جباه .

[ رشا عرابي ]

 

[الشعر الشعبي]

[ 7 ]

أحدب الطلة فـ بدايات الظهور
ترصدك عين المحبة من غلا

[ خليفه الصائغ ]