الفية ابن بطي

[عبدالله البطي]

(أسير الياسمين)


الفين من بعد الثمان الحزينه
كم دار جيته كم مكان ومدينه
وكم ليلتن بالشوق غني حنينه
وكم لي علي الميعاد والعهد قلي
الفين اولفها من اصدق شعوري
تقراه الا منها بدت لك سطوري
مثل الضما والشمس بارق حضوري
يلي بعيني عن غلا كل ملي
والبا بدا برق الجفا في عيوني
بليت به يوم القدر صار دوني
يوم الحضوض امخالفات لظنوني
ماعاد باقي شي بعدك يسلي
براقها ليته خذا الحب عني
او انه بكثر الرجا ما ظلمني
خلاني انسي قبل هقوات ظني
مثل الشعاع الي محي شكل ظلي
والتاء تبين لي مكانك وشفته
بالحلم من وصفه وشكله عرفته
انا اعرفه لو كان مايوم زرته
لو ما بدا بالحلم يوم امتثلي
تمايلت بالحلم كالخيزرانه
واليا حكت عذب القراح بلسانه
معذور لاغنيت يا ليل دانه
خنجره بين اضلوع صدري يسلي
والثا ثمان سنين غابت ولا ادري
مرت ثمان سنين والدمع يجري
الجمر في صدري لو العذر عذري
ما انتي بقابل عذر في قطع وصلي
والجيم جريت اللحون القديمه
بالصوت في نبره حزينه اليمه
نديم يشكي بالغرام لنديمه
عن لغزها يازين جاوب لحلي
جاوب بريد المهملات الكثيره
لاتقول خيره عنك ماهيب خيره
حالي بعد ماغبت حاله خطيره
ماعدت اميز بعد ماغبت حالي
الحا حبيبي لذة العين شوفه
نادر جميل وكل حسن بوصوفه
من لامني جعله يذوق الحسوفه
ريقه شهد حالي به الحلو حالي
والخا خدعني حلمي الي بنيته
علي الرجا ياليتني ماهويته
او ليتني ماجيت من جمب بيته
ساكن بروحي يسكن اعماق بالي
والدا دواي وعلتي ياوجودي
تبري مواجع قصرت طول عودي
مايبري اجروحي سوي انك تعودي
حاولت وصلك يالغضي ماحصلي
والذا ذبيح الحب لاينكرونه
ذبل من اللوعات شوفي عيونه
ناحل هزيل وعرف همه بلونه
متخالفن من جمر الاشواق صالي
والرا رحيل العمر ماهو خساره
للي بقلبي صار مثل المناره
اليا طرا دف الغلا دق طاره
وغنيت غالي ينشد اخبار غالي
ينشد عن اسبابه يبي علم عنه
مابه خطا حبه ولا فيه منه
الي بقلبي ياعرب صار كنه
النفس والدنيا وحيي ومالي
والزا زرا زاوي من الهم مفجوع
مفجوع يومه حال عنه وممنوع
ممنوع من وصله وطايع بلا طوع
طوع الذي ماسور ماله مجالي
والسين ساجع صوتها مثل الامطار
حمامتن كنها تعرف الذي صار
غنت تقول العاشق المغرم بنار
مافيه مثلك عن عنا الحب سالي
قلت العنا مقسوم والحب قسمه
خريطة الدنيا من الله رسمه
هو كاتب اغيابه وقادر يحسمه
غيابه الي منه بين زوالي
والشين شر الحاسدين استعيذه
بالله من عاذل غدي اليوم خيذه
كشر بنابه غدر من هو يحيذه
عن فجنا يسلي ويصبح موالي
بالطيب حنا له قريبين وايمان
يصبح محل اهدابنا بعز له شان
واذا اعتدي نمليه صكات الاكوان
القاسيات السود ماهن هزالي
سود الجراب اغبش مساهن دماسي
بهن نبا يذكر لهن كل ناسي
شطرآ حداد اشداد والحد قاسي
عن داعيه ماهن بخمدن عزالي
والصاد صروا عينها وابعدوها
شاروا عليها بالخطا وامنعوها
لو يحرموني شوفها مامحوها
بعطيك عن حبي كبير المثالي
حبه سحاب وصعب حين يطوله
تنبت ورود الارض حزت هطوله
تباشر القيعان لاجاء نزوله
تفداه روحي وغالي اغلي حلالي
والضاد ضامي لو علي المي مكاني
يرويه قرطوعن وسكر عماني
مثل العسل واحس به في لساني
معذور من شانه يطول ارتحالي
والطاء طنب الود بالصدر مغروس
يسن قلبي مثل ما يقطع الموس
كني مكبل بالغلا منه ممسوس
حسيت من صفعات بقعا هبالي
والظاد ظالم ياهوي كيف تبلاه
بالحق ماتسمع كلامه وفحواه
ماعاد نفس الامس حاله وممشاه
لوما تبعت الهم جورك سعالي
والعين عينه كل الاسباب عينه
يوم اقبلت بالدمع وارت حزينه
قالت اخاف العمر تقفي سنينه
وقفت واحس اخطا قدمها شكالي
والغين غفوه غبت فيها للحظات
رجعت فيها وقت حول البدايات
ماهي بدايه تشبه اقسي النهايات
عندي سؤال ارجوك جاوب سؤالي
اذا النهايه مثل شكل البدايه
وشلون نقري سلسلة هالروايه
مافيه لافكرة ولافيه غايه
وشلون اعوض عمري الي مضالي
والفا فحسب ك ياشعوري ويكفي
اخاف لو كملت توصل لحتفي
مدام هذا الحب مايوم يصفي
عش التشائم دام معقور فالي
والقا قوافلنا علي اخر محطه
شلنا معانا دمع والليل حطه
بكتوفنا شلنا المدامع بشنطه
بها حروف اوداع وحبآ غدالي
والكا كلامي جاك بالحب مصفوف
متخالفن قافه مبعثر وبه خوف
احيان اشوف الدرب واحيان ماشوف
كفي تلوح يالبعيده تعالي
قبل اني اواري عن الناس واموت
ثم بعدها يابنت ماينفع الصوت
يلي غلاك بخافقي صار منحوت
جاك الكتاب الي بوسطه مقالي
الام لاتنسين عهد المحبين
عهدآ علي وضح النقا بين قلبين
لو ما اشوفك ساكنه داخل العين
لو ما اعني لك طيفك الي عنالي
النون نوفي عهدنا مانخونك
يامعك نبقي او نموت لعيونك
يابو هدب يالزين لايخدعونك
عذال ..وانتي غايتي واحتمالي
والهاء همال المزون انسكابه
يشبه ليا منه انحدر من سحابه
علي الغصن لاقطر الما يشابه
اعيوني بهمال منها يسالي
الواو وردة ياسمين ازرعتها
خطواتها كل ماتمر انبتتها
كنك تقول اقدامها اوجدتها
اوصاف عنها غيرها ما زهالي
والياء ياسارق خفوق المعنا
هذي قصيدة قالها لك وغنا
الحانها بالشوق تنبيك عنا
من الالف للياء ياهملالي .

 

[رشا عرابي]

لله أنت!
أيُّ أبجديّةٍ تلكَ بِحروفِ الهِجاء أيْنّعَت شِعرا
وحاكَت من القصيدِ حُلّة فاخرةَ الرّتم
صَداها آسر

الواو وردة ياسمين ازرعتها
خطواتها كل ماتمر انبتتها
كنك تقول اقدامها اوجدتها
اوصاف عنها غيرها ما زهالي

للواو هنا سحرٌ آخر
وصورةً أطّرَت ببديع التوصيف !

الرائِع عبدالله البطي
لا أُلجِمَ في يَراعِكَ المِدادُ شِعرا

 

[بلقيس الرشيدي]

كُل شيءٍ هُنا يأسرُهُ الجَمال ناهِيكَ عن سِر عطر اليَاسمِين !
أبدعت وأمتعت وأبهجت أبعاد بهذِهِ الصُورة الشعريَّة الأنيقة . أسعدك الله

 

[عبدالإله المالك]

ملحمة فارهة
متألقة
نفس شعري طويل وعميق


سلمت يا عبد الله

 

[نادرة عبدالحي]

قصيدة مُشوقة مكتنزة بالمعاني الجميلة ما على القارئ الا ان يُبحر فيها
ويغذي فكره والروح

والكا كلامي جاك بالحب مصفوف
متخالفن قافه مبعثر وبه خوف
احيان اشوف الدرب واحيان ماشوف