في الهامش تسكن قصيدة [ نور سالم ] a r c h i v e

[نور سالم]

نور سالم ولـ قصيدتي هامش
يتكوّر كالحزن ، يتمدد كالبُكاء ، يقسـو كالصبر.



الشِعار ضمن مجموعة رائعـة / تصميم فوتوصوت المبدع : فيصل العبدالله @Faisal_Allah

 

[نور سالم]

 

[نور سالم]

 

[نور سالم]

 

[نور سالم]

 

[نور سالم]

ستـــــرة الحب

خياطة : نور سالم

اسمك كذا لا مـَر بي كنـّـه [ ابره ]
والقى بأثر مرورك بصدري [ ثقوب ]
احس قلبي [ يشبكـه ] عرق جـره_
_عن الهوى واحس به [ ينشبن ] نوب
بين الألم والوجد يخيط صبره
ويعيش [ يرقع ] في الأمل حلم [ مشذوب ]

والذاكرة [ تغزل ] من الشوق [ مكره ]
اشعر بعقلي [ خيط ] واهن ومسحوب
أن جيت [ اشّده ] يقطعه حد فكره
ولا ارخيت شدّه للوجع دمع مصلوب
يا ليتني [ طرّيت ] للجرح صدره
يمكن [ اشقق ] سيرة [ الوخز ] واتوب

مليت و [ اخرز ] في المواعيد بكره
و [ ازر ] في حلق المعاذير مطلوب
ليتك [ تخيّط ] [ ستـــــرة ] الوصل مره
او ليتني [ صوف ] الجفا [ اقرضه] [ ثوب ]
ولو كان من شق الوفا فض سره
هالقلب عذره بالوفا كان [ مرتوب ]

 

[نور سالم]

نص : [ ركض ] / نقلا ًعن : تذكرة حـِلم مؤجّل
بإلم : نور سالم



صوت الظُهر كنه هَدير القِطارات
اللّي خذت في رَحلها ناس وعيون
فـ بلادي اللي تعتصر هالمسارات
امشي واوجاعي معي عمر يمشون

كم هي وجيه الناس تروي ازدراءات
وحديثهم صوت الضجر فيه مشحون
كم هي سوالفهم تشيل الممرات
تركض بها في كل معنى يقولون

وأنا مثل باقي القلق في المحطات
اجلس اعد اللّي مشوا واللّي يجون!
مؤجله احلامي ف كل « رحلات-
-عمري » وكانت وجهتي ناقصه : كون

كنت احلم أني في الوطن اخلع الذات
ويصير هو من ينتمي للي : بدون
وكنت احلم اني انتشل هالمعاناة(ت)
عن شعبي. وقالت: بلادي ( بلا جنون )

 

[نور سالم]

هَلوسـة مُعتـادة
بـ ألم : نور سالم

/

في موسم الصمت بذر البرد لو يزرع :
سنابله شمس ، ما ندفا ونحكيها
نوشك على الإقتطاف ولو كذا نهرع :
لحقولنا نكتشف أن موتنا فيها

نقتات خبز الكلام ونكتب ونذرع
سطور شوق ٍ تفرّغ للهوى فــِيها
احلامنا وامنيات القلب لو تطلع :
في ليل نعسـان ياخذنا ويخليها ..

يا آخر الشمع لا يتنفسك اسرع
الصبح لا اجتاح اضواءك يطفيهـا
مثل الحزن لا هجد عين ٍ تبي تهجع
ما يمسي الاّ من الراحـــة معريهــا

يا حكايتي يا كذا .. مقطع : بأثر مقطع : //
يا هامش يلمّــها ويتيـــــــــــــه يرويهـا
لو قلت صوت الوجع لـجدارهـا مَرجِع :
ضاعت وهي من سمعها راح ينسيهـا

/.