[poem=font=",5,blue,bold,normal" bkcolor="transparent" bkimage="" border="none,4," type=2 line=0 align=center use=ex num="0,black""]
ياطاغي الحسن معلوق الصدر نشته=عزالله إنّ الهدف حوّل به الرامي
عرّضت له بالطريق وجاك وادهشته=ورحت وتركت الجفاف لجرحه الدامي
الواجب إنك بعد ما صبته انعشته=ما تتركه للزمان وبرد الأحلامي
بس أنت بالصد غطّيته وفرّشته=وعرضته القيظ والكنّه وهو ظامي
لو الجفا شخص واجهته وهاوشته=إن تاب وإلا ينفّذ فيه الإعدامي
ولو الوفا شخص قابلته وناقشته=عن حكم قطع الوصل بالدين الاسلامي
طفل الوله منعزل من يوم همّشته=صابه توحّــد وعاثت فيه الأوهامي
لا مرّ فـالذاكره طاريك واجهشته=ارويت خد الورق من وابل إلهامي
شعر ٍ بالالماس رصّعته ونقّـشته=في كل مايظهره للمجتمع سامي
وجرحي من الصبر والنسيان نوّشته=حتى اتجنّب شماتة كل لوّامي
والقلب من يوم في سهم الجفا حشته=عوّد عليّه معيف وورده حيامي
من بعد فرقاك وضيته وروشته=عن كل طاري يهبّ وينّقض الآمي
خلاص يكفيه ماشفته وماعشته=محتاج نبضه يمشّي باقي ايامي
حلمٍ تبخر بعد ماكنت عايشته=ياقلب ريّح وياعين الشقى نامي
وان التفت شوق صديته وطنّشته=تأبى الكرامه تنزّل روس الاكرامي
الشيخ في داخلي قام ونفض بشته=وكبيره إنه يعوّد بعد ماقامي[/poem]
شعر/ نهار بن ممدوح