مُـذَاكِــراتْ 24 سبتمبر ...

[تهاني سلطان]

.










خمس أسابيع .. تصدق أنها خمس أسابيع مرت على وجودك بينا .. و تصدق أن هذي الخمس أسابيع أسرع فترة من السنه مشت عليّ .. خمس أسابيع أيام و أيام .. خمس أسابيع 37 يوم .. خمس أسابيع تصدق توقعتها بس يومين ..
قبل خمس أسابيع وقبل ما ألتقيك .. كنت أحب أجيب طاريك .. بأي مكان .. أبي تكون عايش فيني .. أبيك تكون قدام عيني .. كنت لمن أجيب طاريك و تقرب السالفه على النهاية .. تملا عيوني الدموع ..و أحس ضيقة بالصدر .. قررت أتجنبك .. بس ماأقدر .. تعرف الوالدهـ تتلهف لك دايم و تسأل عنك دايم .. قابلتي أخوك بالماسن .. أرسلك أخوك الإيميل .. رسلي لأخوك هالشيء .. صوريّ لأخوك هالشيء .. إلى درجة ياخوي صرت أكتب أهم أيامي لك عشان تقراهـ .. وياليتك ماتقرأ هذي .. ليتك تتجنبها .. أو تتخيل أنها ماأنكتبت من الأصل ..


تعرف أنت أنك أكثر واحد من خواني وخواتي عشت معه .. و ربيّت وياهـ .. بيوم اتصلت عليّ ومارديت .. صدقني مو عشان شيء .. بس والله ما أقدر .. قلبي مايطاوعنيّ أسمع صوتك و أنت بعيد عنيّ .. كنت أتجاهل اتصالاتك .. وكنت تتصل على الوالدهـ تطلبني .. تجي هي يميّ وتقولي ورا ماأرد عليك .. أقولها إن شاء الله أول ما أفضى أكلمه .. تروح زعلانه عليّ أدري فيها .. يمكن أنا من النوع اللي إذا أشتاق لأحد ومن كثر الشوق ما أبي يحس بألميّ بفقدهـ .. عشان كذا أفضل البُعد .. و أقول يمكن أنيّ هيك : ) ..
عاد بيوم بعدها رديت على تليفون البيت و أنا مستعجلة .. وقلتلي وينك ماعاد لك صوت .. سولفت معاك ببرود و أن الوضع وياي عادي .. استغربت أنك بوقتها و قلتلي أنو أطمنك علّ من فترة لفترة .. قفلت منك ..بكيت .. انقهرت ليه أرد عليك .. و أنا ما أبي : ) ..


وصلت من السَفر ..كان الوقت المغرب .. وكنت بجي أنزل أسلم عليك بس ماأدري شلون ولا أدري بأي طريقة .. مريت على أختي الكبيرهـ .. زين كانت عندنا بذاك اليوم .. قلتلها أنك جيت ومتشققه أنا من الابتسامة ..قالت خليّه شوي .. خلي الوالدهـ تشبع منه .. أنا فوق أسمعك تسولف معاها وتضحك و تمنيت أنيّ مامريت على أختي وقالت لي هالكلام .. يالله تعرف شعور اللي من زمان عنه وودك تخمه تبتسم له ..تضحك معاه.. تقله كل اللي بخاطرك تخليه يحس باللي ورا الخاطر .. كنت بوقتها مشاعر ومشاعر بس ..
جيت نازلة لك و أنت طالع ألتقينا ببوسط الدرج .. صح بكيت بوقتها و أول مره تشوف دموعي و أنت اللي تعرف دموعي ما أحب أستخدمها وسيلة تعبير بس يالله حظك شفتها : ) .. أمانه حلوهـ أو لا p : ...!


خمس أسابيع .. طلعاتنا روحاتنا جياتنا .. ضحك و استهبال .. صراحة ماتطلع إلا بقعدات مقاهي الرياض .. هذرة طفش وملل .. الأجمل أنك عرفت أن أختك الصغيرة كبرت .. و صارت توازيك بكل شيء .. تدري أستانست لمن تقول والله و كبرتيّ .. أحب أشوف نظرتك و ابتسامتك لمن أحس فيها كلمه والله صرنا نعرف الأشياءات : ) ...
أحب لمن أمر على الأماكن اللي هنا و الكل كان يسأل عنك .. و أقولهم جاي أهو من السفر يمكن على عيد الحج أو بعدهـ .. كانوا دايماً يبلغونك سلامهم .. وكانوا دايماً يدعون أن الله يردك سالم .. و حبيت فرحتهم بشوفتك ..


خمس أسابيع .. و حركات المشي بشارع التحليّة آخر الليل .. و الشباب اللي يطالعون شنو هاللي بايعينها وجايين هنا قلة الأماكن ..
خمس أسابيع .. و اللي أنت ماشبعت من بر الرياض .. حتى أنك خذيت حفنة رمل تبي تتذكرهـ .. تبي تشمه فيه ..
خمس أسابيع و أنا أحاول أقنعك إذا خلصت دراستك أبقى هناك لا تجي يم السعودية .. و أنت تحاول تقنعني أنيّ ألين ماأجي يمك و أكمل الماستر نرد سوآ .. لأن حضن الوطن أجمل بكثير .. و لأن حياة الوطن أشرف بكثير .. و أقنعتني ..


خمس أسابيع انتهت أمس و أنت تجهز شنطتك .. تودع بقايا ساعات تتنفسك .. تطلب الوالدهـ أساعدك و أنا أرد أطلبها تعفيني لأن ماأتحمل .. قبل لا تسافر رحت لغرفتي .. قفلت بابها .. وحاولت أغطي التفكير بمذاكرتي .. تتصل علي تطلبني أوادعك .. تبي تخمني و أنا أقولك ماله داعي هالموادع و أنا راح أشوفك السنه الجاية يمكن راح تتأخر بعدها شهرين أو ثلاثة بس أكيد بشوفك .. ما أبي تكون بينا لحظة وداع .. ما أبي أودع شنطتك و أنت تسحبها على الأرض .. أجبرتني و جيتك بعيد عن أرادتي .. أشوف الدمع بعيون أميّ وصمتها .. و أنا أحاول أكتم العبرة و أدعي لك .. الله يحفظك و انتبه لنفسك و أي شيء تبيه اتصل علي .. ترد عليّ طيب رديّ علي أليّا اتصلتلك ..

المهم ما أوصيك أليّا وصلت طمنيّ عليك ..!
أختك الصغنونة على قولتك : ) ..






صباح كئيب بدونك
الأحد 01-02-2009 م




.

[تهاني سلطان]

.






الساعة 9:20م



لا لا الساعة 9:27م ..بعد القرقرة مع دنو و توقعاتها لأختبار بكرهـ بمنهج تاريخ الأدب ..
الليله هذي أسمها ليلة الأختبار .. وبالليلة هذي كل الطلاب و الطالبات يعرفون شيء أسمه بوكليت و كتاب و قلم .. وهات يادفش بالكلمات والأسئلة و الأوراق الخارجية بهالرأس الصغيرون .. إلى درجة أن الشخص فيهم يقعد يحفظ ولا يدري شنو أساسه أو شنو آخر .. المهم يحفظ .. و يقرب وقت الأختبار و أهو مازال يذاكر .. وسبحان الله على كثر مايذاكر .. تطلع له أسئلة وشغلات قبل مايدش قاعة الأختبار عمرها مامرت عليه و أهي اللي تجيه بالأختبار .. وكل قعدته هالمسكين لمدة 12 ساعة مافادته إلا إذا بصح وخطأ أو أختياري إذا باقي يذكرهم ..



أنا لي بهالمادة أربع أيام تقريباً و أنا أذاكرها .. وأقوم أقعد مع أهلي .. وقهوهـ و شاي و قت الحلى وعشاء و غداء بحديقة البيت و الجو يزين و الأهل تتغير نفسياتهم يصيرون يحبونن أكثر و يلبون طلباتنا أسرع : ) .. المهم هالمادة موب راضية تخلص مادري السبب تهرب مني مادري لأن العرق الخليجي مأثر فيني ولازم أختم المادة بسؤالين اللي قبل القاعة و أدخل مبعثره باللي قريته و اللي ماقريته ..


اليوم من الظهر ضيعت قلمي الأحمر لأن مذاكرتي و حفظي يعتمدون عليهِ ..و عاد ضاع يعني مافيه مذاكرة أو تثبيت معلومات قلت يالله عاد هذا حظي و خذيت قلم أخضر وجلست أذاكر .. بس والله مافيه فايدهـ قعدت ساعتين على هالحال وأنا أكتب و أقعد أقرأ اللي أكتبه حتى أن جيرانا متصلين على أهلي يقولون حفظنا من بنتكم دروسها أهي باقي ماحفظت << ماتجوز الطنازهـ :p ..


الساعة 3 العصر والله اللي ماعاد أشوف شيء من التعب قلت بريّح لي شوي و أروح أدور لي على بقايا أكل ..
بعيد عن سالفة المذاكرة .. شفتوا جو اليوم كيف أهو ممطر ورايق بالحيل .. أنا ماكنت أدري كنت محبوسة بغرفتي ماعرفت إلا من اتصال انقال لي أن في أشياءات ومطرات برا ..على المغرب خذيت جاكيت ضد الماي و كتابي وكوب القهوهـ ورحت يم حديقة البيت وذاكرت بس شيء بجد رهيب.... نرجع لسافة الغداء لأن باقي مقهورة من هالسالفة : ) شوفوا يوم نزلت تحت أدور أهلي وين ماما و ين بابا مافيش حد .. أتصلت على ماما أقولها وينك قالت والله بابتك شاف الجو حلو أتصل على أخوك و عزمه ورحنا بقرب الجنادرية يقولون البر هنا حلو .. والله ماتصدقون أش كثر أترجاهم أبي أطلع يم البر ولا حياة لمن تنادي ..يوم علي أختبار زانت لهم سالفة البر وراحو : ( .. يعني ليه هالحركة مادري .. أقول لماما طيب أنا كم مره قلت لكم نطلع يمه وماترضون قالت شنو يخصني قولي لبابتك ليه ..أهي تعرف أنيّ ماأقدر أناقشه بأي شيء سو قلت لها الله يحفظكم وتهنوا هاه تهنوا : ) ...


قعدت راجعت المادة ودوبني خلصت منها .. بس باقي مراجعة التثبيت اللي هي تكون الأخيرة و الأساسية بالموضوع بس راح تكون على ثلاث الصًبح ماأبي أستعجل فيها ..
هالأسبوع راح يكون حافل بالخوف و الرهبة و المذاكرة و الإجتهاد .. ربما يكون حافل من قبل المُصحيين بالعدل أو الظُلم .. ربما يكون حافل بالتعب النفسي و الدموع ... وربما يكون حافل بالفرح و الأرتياح والصدمة بالنتيجه : ) .. يعني الله كريم ..



أي على الطاري بيشو جربت سالفة الشايّ و تاريخ الأدب بجد شيء أبداعي : ) .. شكراً على النصيحه ..

هنوف أنتظرك على سالفة مراجعة تاريخ الأدب إذا مطولهـ رسلي مسج على موبايلي ..
و الباقين دعواتكم ليّ ولِـ بنات قسمي الأنجليزي و باقي الأقسام بالآداب عشان مايزعلون و اللي بالجامعة و دقيّ يامزيكا :p



برب أردد ياليل مطولك ...






الجمعة 06-02-2009 م ..







.

[تهاني سلطان]

.







وصلنَا لِـ الأثنين وياسرع هالوقت بالرغم إنَّا كنا مضغوطين شيء موب طبيعي .. أختبارات جامعتنا "كلية الأدآب" حفظها الله : ) ..
ضغط ورا بعض ..المواد ورا بعض .. الوحدهـ فينا مايمديها تنتهي من المادة وتفتح عيونها إلا تبدأ بمادة ثانية ألعن في دراستها و في أسئلتها ..



السبت ../
"English Literature"بالعربي"تاريخ الأدب أو الأدب الإنجليزي" ..كان من أجمل الإختبارات على أنو أنا مو شاطرة بحفظ الأسامي و التواريخ مره زين بس الحمدلله كنت أحل و أنا مستمتعة جداً حتى سلمت الورقة بنص الوقت من مجمل الوقت الكُليّ لِـ الإختبار .. <<لاتقولون لِـ ماما :p
ويوم طلعت البنات يقولون زين وماشي حاله يعني أهم حلو لِـ الشيء اللي يوصل للنجاح .. بكلا الحمدلله ضامنه الاجتياز منها :) ..



الأحد .. /
"السلم" .. كان ثقافة إسلامية و خمس ملازم ومواضيع متشتتة و أدله كثيرة كانت دراستها ممتعة بس اللي يقهر وينرفز أن هالمادة مانفتحها إلاّ بليلة الإختبار أهي مو هينة لكن عندنا مواد تكون ساعتها أكثر و تأثر على المعدل .. المصيبة و المصيبة .. يوم بندخل لِـ قاعة الإختبار كل الحفظ كان قراءة و بس ..يعني مضبطين وضعنا اجاباتنا بتكون على فراغات ..اختياري ..صح خطأ .. ولاتتعمق بالأسئلة المقالية لأنَّا راح نجيب لها العيد ..
أول سؤال كان صح وخطأ السؤال الثاني دليلي وكان فيه أربع أدله و عليه 15 درجة..يعني بالعقل 15درجة على أدلة ليه ..! .. طيب لنفرض أني حافظة الآية وغلطت فيها حتى لو غلط بسيط موب الله بيحاسبني على هالشيء .. عندي أنقص بدرجتها ولا أكسب إثم بنفسي و أتحاسب عليه .. وعلى هالرتم كانت أسئلتها ودرجاتها .. نسبة النجاح 60% و إن شاء الله ننجح فيه مانبي شيء إلا أنو ننجح ..



الأثنين .. /
"phonetics"بالعربي"علم الصوتيات" .. وما أدراك ماالفونتكس .. الفونتكس مادة محببة لي مررهـ إلى درجة أنو كل يوم أذاكرها لوووول .. الصراحة هالمادة تأسيسها لي كان خطأ ومابني على باطل فهو باطل عشان كذا ماراح أحط أي توقعات لها : ) ..
شيء يضحك يبكي .. السؤال اللي حالينه أغلب الطالبات ماحليته واللي ماحلوهـ أنا حالته وكامل : ) ..



الثلاثاء .. /
"essay"بالعربي "مقال" .. هذي المادة الكل طلع وماحد حل فيها .. شكراً مس "×××" على الأسئلة التعجيزية اللي تبين نحلها :) .. وصدقيني صدقيني موب زعلانه <<اللي درت عنك :p



الأربعاء .. /
"translation"بالعربي"الترجمة " .. لحسة مخ بس والله حليو .. بهالمادة تذكرت عائشة المعمري لأنها متوقعة أن اختصاصي ترجمة : ) ..



السبت .. /
"Drama"بالعربي"مسرحية" .. يالله ..يالله .. كل الفوكابلوري اللي أعرفهم بالأدب الإنجليزي كتبتهم وكل الإشتقاقات للكلمات شكيتهم .. يالله سبع صفحات و أنا كل ماأكتب برقراف أتحسب عليه موتنا هالمصري من كثرة الهرج ..المشكله أنهم يقولون يحب السواليف ..يحب يحس أن الوحده فاهمه ..و أنا ماقصرت جبت لها كل السواليف حتى بغيت أقوله بالويك أند شنو مسوية بس الوقت ماساعدني لأن الإختبار ساعتين بس ولا نويت :p ...



الأحد .. /
"Reading"بالعربي"قراءة واستيعاب" ياحبي له .. القطعة جايتنا عن أوباما .. وبما أن أوباما قريت كتابة فعندي معلومات مااحتجت أنو أقرأ القطعة واجد إلاّ إذا شكيت بشيء بس : ) ..



الأثنين .. /
"thinking skills" بالعربي "تنمية مهارات " .. يازينه بس يكفي أن التصحيح آلي بحد ذاتها نقلة قويّة تُحسب لِـ صالحنــا .. عسى كل الاختبارات هيك بجد راحة موب طبيعية ..




طبعاً خلاص اليوم الإثنين إجازة ..طلعنا للبيت متأخر على أن الإختبار خلصناهـ 9ص بس قعدهـ وسواليف يعني على الـ 12م رجعت للبيت إلى الحين من الفرحة موب جايني نوم و هم ماأدري وين أروح فيه خلاص حاسه بِـ"freedom".. حتى لو اليوم ماأحد بيطلعني على أنو الوالد باقي له رد عزيمة أولا وسالفة البر ثانياً مالي خصّ طالعة البر طالعة :p .. فياليت أي أحد يحس أنو لي كم أسبوع ملطوعة بين هالغرفة و الكتاب وقلة النوم يطلعني .. ولو مافيه أهم شيء شعور أنو ماورايّ شيء هذا بحد ذاته نعمة و الحمدلله اللي طلعت سالمة من هالإختبارات مافي عاهات مافي تعب نفسي هو فيه بس عاد أُصبت بتبلد بهالجامعة ..

أخيراً ..
ألف مبروك لِـ كل اللي أنتهوا من الإختبارات و عقبال ماتشوفون النتايج وتستانسون و يزول تعبكم .. اللي كان مو متأكد من حلوله أو شاك أنه بتطلع له هاه كم مادة مو مشكلة "قل لن يُصيبنا إلاّ ماكتب الله لنا" ..
الأهم أنو رئيسة القسم ماراح تطلع النتائج إلاّ بعد الأسبوع الذهبي أبو عشر أيام ريحوّا و خلّوا ملائكتكم ترتاح .. ومردكم للجامعة و الكرف وهم نكد أول أسبوع وصدمة النتائج .. الحين لاتفكرون إلاّ بِـ الإجازة وبس وبعدها يحلها ألف حلال ..

شنو شنو بعد ..!
أمممم ..
يب ذكرت .. الحين كرفنا بهالجامعة من 10-10 إلى 20-2...
يالله أربع شهور و عشر أيام والله عمر :s ..
دعواتكم ليّ بِـ النجاح والمادة اللي موب تمام عسى الدكتورة تعديها و أهي حاطتن ممتاز مرتفع :) ..


برايفت وبعيد عن كل شيء ../
هنوفتي يابعد هالدنيـا المواد اللي ذاكرتهم معها كانت جداً رائعه مذاكرة تاريخ الأدب الدين الفونتكس لا وحوست فيه الرايتنق الترانزليشن الدراما ومكالمات الجمعة بالصباح والتكمله بالماسن الريدنق و البلياردو مع فنو السكيلز و الطفش من المذاكرة يالله أيام أيام بجد ماراح أنساها .. الله يوفقك يارب ويسهل لكِ آختباراتك .. بجد مذاكرات الماسن معاكِ أجمل شيء : )

دنو و فنو أسوم ق و أسود د و حنون و منو و ألول و نوني الله يوفقكم يارب ويبلغكم النجاح وهم أنا وياكم : ) ...


آخر يوم دراسي للفصل الأول لعام 1429هـ -1430هـ <<حفظتها من كثر ماتشكه بعد أسمها في كل ورقة إختبار : ) ..

cheeeese
&
be smile


الأثنين 16-02-2009م








.

[تهاني سلطان]

.








مساء الخير ..


تَأجلت نتائجنا إلى يوم الثلاثاء و أنا أصبت بِـ احباط شديد لأني يوم رحت السبت مالقيت شيء .. وحسيتني بجد مالي هدف بالحياة .. كنت أبي أداوم بس مالها داعي ..يعني بالله شلون أبدأ سميستر جديد و السميستر اللي طاف ماأعرف شنو سويت فيه من مصائب .. يعني أنا فكرت فيها لو أنا حاملة مادة وحده من الدكتورات مايصلح أبتسم لها لازم أكشر لازم أكرهها أنو ليه خلتني أحمل الماده لازم لازم هالشيء : ) ..


كان بجد يوم لا أحسد عليه يوم السبت وزعلت مرهـ و ساكته طول الوقت اللي مالي نفس أتكلم و لا أسولف بأي موضوع .. أحباط عام في جميع أركاني .. و الله أرد البيت و على الظهر أنوم أليـن تقريباً الساعة 8 م .. ما أحب فيني هالشيء لمن شيء يجي موب على حسب تخطيطي .. أو على حسب اللي انقالي لي أستخدم هالنومات الطويلة و أجبر حالي بالخضوع لها ..


مارحت الجامعة اضراب هيك مابي ياتعطوني نتيجتي يا أنو ماراح أداوم .. عاد مر الأحد و قلت يالله نروح نشتري ملفات و خرابيط الجامعة وكم كتاب نتسلى بقرأته و هيك ..

اليوم كنت نايمه و بأمان الله ويدق جوالي المتصل "فنو" و الله و أطالعه وماقدرت أرد عرفت يا أنها بتقول تعالي خذي نتيجتك ياأنها بتقول حاملة مادهـ او مادتين والباقي نجحتي فيهم .. من الخوف مارديت ..فجأة تجيني رسالة منها أنو نجحت و أنو الحمدلله كل قروبيّ ناجحين ..


الشكر لله بهالنجاح أولاً و أخيراً .. و هالنجاح أهديه لِـ والداي بعد الله والله يكفيني خوفهم وسهرهم ودعواتهم .. الله لا يحرمني منكم و الله لايحرمني من فرحتكم و لا من سعادتكم .. خواتي خواتي اللي بس سواليفهم ترد الروح و هم يعطوني دافع معنوي عشان أسوي اللي أقدر عليه و أثبت وجودي .. صقيقاتي كلهم هنوفه و أسوم د و أسوم ق و فنو و حنانيّ و من من و دنو و ألول و نونيّ و جوجو .. الحمد لله أنو نجحنا و ألف شكر لكم على وجودكم معي ..


شفتي هنوفه سهر الليالي و مذاكر الماسن تفيد منو قال أنها مضيعة وقت وطق حنك بس .. ياآآهـ أش كثر راح اشتاق لها :) .. و الحمدلله أنو أفتكينا من هالسميستر و من د .××× .. والله يكتب الخير بالجايات : ) ...


أهداء للجميعنا : )

http://www.6rbtop.com/library/resources/A7lam/Collection/listen/3791_hi.ram

شنو بعد .. أيه رواية مَهل وصلتني اليوم على البريد وببدأ بقرأتها .. سعيدهـ أنها مكافأتي لِـ نجاحي .. شكراً بابا لأنك جبتها لي من البريد بهالجو العاصف : ) ...




فرحتي لا توصف بيوم الأثنين ..
02-03-2009م





.

[تهاني سلطان]

.



http://www.arb-up.com/files/arb-up-2008-6/lNT39677.jpg




و لأنيّ أحُب صباحات معرض الكتاب .. و أحُب أنيّ أكون من ضَمن من ذهبوا إليه في أيَامهِ الأولى أخترتُ أن يكون يوم صباح الخميس الماضي .. و لأني تونيّ أروق راح أتكلم عنه وفيه ..


معرض الكتاب من أحد أروع أسابيع السنة في الريَاض .. طبعاً مادري من الفرحة أني بروح يمّه و لا أهو لأني بقابل كُتب وكتاب ومثقفين خلانيّ هالشيء ماأنوم أبد إلاّ على الساعة ثنتين بالليل و قمت الصُبح الساعة ست وهم رديت أكمل نومتيّ ألين ماجاني اتصال من أخوي الكبير يسأل إذا باقي بروح أو لا .. طبعاً شلون ماأروح قلت له خلاص أوكي قمت .. قفلت منه و أطالع الجوال باقي الساعه تسع وعشرين دقيقة .. قمت أتصلت على "ارْوَى سُليمَان" -كاتبة و صديقة محببه إليّ جداً - وقلت لها يالله صحصحي عشان نروح .. هم أتصلت على بنات أختي وقلت لهم على العشر وربع راح أمر عليكم .. و بدأ مشوار التجهيزات النفسية ..


تحركنا من البيت الساعة عشر وعشر الصبح و مريت على كل البنوك اللي بالسعودية .. و ياأنها عطلانه أو أنها مخلصه فلوسها .. دايم هذي حركتها فيني كل صباح .. بالأخير لقيت بنك وسحبت منه لأني توقعت أن بالمعرض مافيه بنك و هذي من أحدى سيئاته ..


وصلنا و زحمة العالم عند الباب موب طبيعية .. بجد ماشاء الله كان الأقبال كبير له هالسنة عكس روحتي العام أحسهم كانوا أقل و صباح يعني غريب مرهـ .. المهم دشينا ومسكنا الطريق الطويل مشي : ) و ياهي انفتحت نفسيتي بجد أطالع الناس و الموجودين و أنا أمشي و أقول يالله كلهم مجتمعين عشان شيء واحد "القراءة " ...


دخلت و بديت من يمين المعرض لأني قاعدهـ أدور على "شموخ" و ببدأ رحلتي معاها فأضطريت أنو أمر تقريباً على جميع المعرض و أخذ فكرة سريعة .. تقابلت أنا وياها و لأول مره و بدينا نتمشى بين دور النشر نقرأ و نأخذ الأستايل المُحبب لِـ أنفسنا ...


كان زحمة الرجال و قليل النساء .. و المشكلة الثانية اللي واجهتني أنو أبي أوصل للكتاب لكن لازم أنتظر زحمة الرجال تخف أو أن اللي واقف عند هالجزء يبعد شوي عشان أقدر آخذ اللي أبيّ .. و لمن أطلب اللي بالمكان يجيب لي الكتاب اللي ماأقدر أوصله من الزحمة الكل يلتفت علي وعلى الكتاب اللي أطلبه .. حسيت كأنهم يبون يسابقونيّ عليه .. أو يطلعون على محتواهـ إن كان يستحق أو لا ..


من أكثر الكُتب أهمية و اللي حرصت على أنيّ أقتنيها الكتب النَقديّة و الفروقات الأدبية بين العُصور .. ربما لِـ اتصالها بدراستي أو ربما بسبب تأثير الدراسة على عقليتي ففضلت أن تكون كتبيّ من هذا النوع ..
لم يخذلني جمعها .. فَـ أنا قبل أن أقتني الكتاب أبحث عنهُ جيّداً .. وبعض سرعة المرور على المحتوى و الفهرس يعطي إدراك أوسع ..





تلك هي الكُتب التي سَـ أبدأ رحلتي معها حتى أُنهيهَا ..



1- أقنعة الخوف - عيد الناصر - دار الفراديس لِـ النشر
2- أبو شلاخ البرمائي - غازي القصيبي - مكتبة تُهامة
3- راسبوتين - عصام عبدالفتاح - مكتبة تُهامة
4- كشكول طالب ثانوي - محمد الهويمل - دار الكفاح لِـ النشر
5- القراءة و توليد الدلالة "تغيير عاداتنا في قراءة النص الأدبيّ" -د.حميد لحمداني-المركز الثقافي العربي
6- السجينة - ترجمة غادة الحسيني-دار الجديد
7- الأشج- غازي القصيبي - مكتبة تُهامة
8-الأعمال الكاملة لِـ جبران خليل جبران - دار رسلان
9-في أعماق الروح"الحلم في القصة القصيرة السعودية "-تهاني المبرك-دار المفردات
10-أنسنة الحرف -إبراهيم الجريفاني-دار بيسان



وبس ...







الثلاثاء 10-3-2009م






.

[تهاني سلطان]

.






كثير من الناس حولنا نرفعهم لأعلى سمانا و نقربهم لِـ قلوبنا و نخلي من تفكيرنا وتفكيرهم أمر واحد مانختلف بالأراء إلاّ بأشياء معينة و بالأخير كلنا نتقبل بعض بحلونا ومرنا .. هالأشخاص من غلاتهم و تقديرهم قلوبنا مسكنهم و رغباتهم أمر سهل و ميسر بالنسبة لنا .. الأهم أنو نشوف الفرحة بكلامهم و الأبتسامة بشفاههم ..

لكن أحيان و البعض منهم مايقدرّون هالنعمة اللي بين أيديهم .. أو يمكن حنا "النعمة" نشوف أن هالمقابل اللي يردونه لنا شيء قليل .. بحسب أختلاف التضحيات و درجات الحُب المتفاوتة عند البعض ..

فيه من هالأشخاص اللي قابلتهم .. أشخاص أعطيهم و أعطيهم و أعطيهم و أحس أنهم يستحقون الكثير و أن هالشيء من رد الجميل لا يُقدر بثمن .. و أشخاص أعطيهم و من وقتها يرودنها كأنه دين عليهم ويبون يسددونه لأن في حالة لا قدر الله صار بالعلاقة بينا شيء يكون لا لهم و لا علينا .. أفكارهم غير مفهومة و تحليلها صعب ..

و فيه أشخاص كل ماتعطي أكثر كل مايبتعدون أكثر .. و كل ماتحاول تقربهم أكثر تلاقيهم مجرد سراب يلعب بعواطفك و يشتت شخصيتك علشان بس تبي توصل لفكرة معينة تجتمع أنت وياهم بنفس الرأي .. أتعب معاهم كثير .. لأن أبيّ أرضيهم .. ولمن أركز بشخصيتهم أكتشف أن الرضا مايعترفون فيه بذاتهم .. كأن بينهم وبينه عداوة .. أو كأن الرضا اللي أنت تقدمة شيء مجبر تسوية وموب بكيفك .. لمن تقرب و تحاول تتصل فيهم تسأل عنهم تحاكيهم تلاقيهم ينشغلون بغيرك .. لمن يفقدون هـ "النعمة" يدورون عليك ألين مايلقونك .. وترجع معاهم ولا كأن شيء صار ..

أشوفني من الناس اللي تضحي كثير و تهتم برغبات الآخرين .. حتى أنو أحيان أسوي أشياء أكون ماأقدر عليها لكن عشان ماأردهم أسويها .. طيبة القلب هي المشكلة و هي المحرك الرئيسي بالموضوع .. اللي يقهرني فيني أشخاص كثير يبتعدون عنيّ بقدر ماكنت أحاول أقرب لهم و أهتم فيهم و ماأزال أحمل لهم نفس الإبتسامة و خاطري طيب .. بعد ما أبادلهم ابتسامة منيّ و أهم يتفاجئون معقولة تبتسم لنا أكون لعنة ذاتي ألف مرة و رجعت شريط الإساءات اللي كانت منهم أكثر من عشرين مرهـ .. بعدها أقول ممكن ماكانوا يقصدون اللي سووهـ ويمكن يبون يفتحون وياي صفحة جديدة .. لكن و أكتشف أن عداوتهم ليّ صارت أكبر .. ما أقدر أتغير عشان فكرهم .. و لا أقدر أغير منيّ.. هذا الطبع أحبها بذاتي .. خصوصاً أن الأشخاص بعد رحيلهم مايبقى لهم إلا الذكرى الطيبة حتى لو كان الشخص معادية .. أذكر والدي كان بينه وبين شخص ما مشكلة موب هينة .. و أنقطع أهو و والدي سنوات .. حاول بعدها والدي الأتصال عليه .. كان الآخر يسبه و يشتمه و لا يحاكيه نهائياً .. بعد مدة جاء خبر وفاته ..تلقاهـ والدي و كان يبكي بشدة لم أراهـ من قبل على هالحال .. قال ياما تمنيت أكلمه و أتراضى أنا وياهـ .. كان أهو الغلطان و أنا اللي معاي الحق .. لكن كنت أبي الرضا من الله وماكنت أبي غيرهـ .. حاولت فيه لكن مارضى .. إلى هاليوم والدي يذكرهـ بالخير على كل اللي سواهـ معاهـ ..


و مشكلتيّ الوحيدة وماهي مشكلة بقد ماهي "نعمة" .. هذول الأشخاص اللي أنا مستعدة أفضى لهم بأي وقت .. الأشخاص اللي ماتعرف شنو يكون تصنيفهم بداخلك .. لا يتعدون أنهم أشخاص عاديين .. و أبالغ بهم إلى مابعد الصداقة .. ولا أستطيع أن أضعهم تحت مسمى الحب .. أشخاص ماقدموا لك الكثير .. لكن بالفعل موجودين .. بالضيقه موجودين .. أشخاص يتعدون مرحلة التضحية .. أشخاص لو بتشوفهم كل شوي تحبهم على رأسهم .. أشخاص إذا ذكرتهم مثل ما أذكرهم الحين تدمع عينك على أنك قدرت تُوجدهم بحياتك و تحمد ربك على معرفتهم ..
أحيان التضحيّة لهم قليلة .. و الوقت مايساعد أبد أنك تفهمهم أهم بالنسبة لك شنو ..! .. أو أهم شنو سووا لك بحياتك وكيف غيروك .. هالأشخاص تبي تبالغ لهم حرفياً تخاف يفهمونك غلط .. لأنك متأكد أن هالشيء اللي يقدمونه مايحسبون له ثمن و لاينتظرون ردك له.. أهم خُلقوا بهالدنيا عشان يكونون معاك بأي شيء تبيه وكيف ماتبيه .. لو عليهم مستعدين يقدمون أرواحهم الغالية بأطباق من ذهب .. هذول الأشخاص عمرهم مايطلبونك .. عمرهم مايقولون قدم لنا .. أنت بقدر ماأنت لهم .. بقدر ماهم طغوا عليك و صرت تشوف نفسك شيء صغير بدونهم ..


كذلك تذكرت أشخاص يرحلون بلا سبب .. ماتعرف ليه .. وماتدري كيف ذكراك عندهم .. هم باقي يذكرونك بكثر ما أنت تذكرهم .. هم باقي يشعرون بوجودك في أشياء تركتها معاهم .. ولو كانوا يذكرونك ..! ..كيف راح تكون الذكرى .. حلوهـ .. أليمه .. مُتعبة .. عادية ..
جميعنا لا نريد أن نكون ذلك الشخص العادي بحياة أحد ..


"الحب- الارتياح - الشعور " و الله أشياء صار صعب تلقاها بالآخرين .. و صعب أحد يفهم إذا ترك فيك جرح عميق من حركة بسيطة .. والمسألة ماهي مسألة "شخصية حساسة " المسألة مسألة تعامل و علو .. مسألة تعامل مع أرواح .. شيء ماهو بيد أحد .. شيء منزهه .. لو كل واحد يفكر أنه يتعامل مع روح مايبي يجرحها مثل مااهو مايبي ينجرح .. مايبي يبكيها مثل مااهو مايبي يبكي .. يبي يفرحها .. يبي يساعدها .. يبي يسهل عليها طريق يكون صعب لها سهل عليه ..
متى ماعرفنا معنى الروح البشريّة كل هالشخصيات راح تتلاشى .. وراح يبقى الذكر الطيب .. و هذا أهم شيء للأنسان بحياته و بمماته ..






السبت 5-4-2009 م








.

[تهاني سلطان]

.






جمعة مباركة للجميع .. و يارب يكون الأسبوع الماضي رائع .. و في الأسبوع القادم التشويق و المزيد من الكرف و انتظار الأمل.. و ياعسى إن شاء الله بين الذكريات و بين حلم المستقبل أمل يرضي اللي بذواتنا و يحسسنا إنا نقدم أشياء تخدم الآخرين لا تكون عائق لهم ..

قمت هالمساء و أنا رايقة جداً جداً جداً .. و حاولت قد ما أقدر أبتعد عن الضغوطات من كل الجوانب حتى أعيش ساعات هاليوم برضا على ذاتي و برضى على اللي حوليّ .. لكن "يافرحة ماتمت " إلاّ شيء يصير يعكر المزاج .. إلاّ شيء ينكد عليك يومك ..


فتحت الـ "لاب توب" و بديت أتصفح مواقعي المعتادة .. بعد ماخلصت قلت بدش شوي على الإيميل و هنا كانت الفاجعة .. أدخل الرقم أول مره "خطأ" مره ثانيه"خطأ" مرهـ ثالثة "خطأ" .. ياربي شنو السالفة ..هالإيميل كمل معاي السنتين و تزيد .. يعني مستحيل أكون غلطانة بالرقم .. تعوذت من الشيطان و قريت عليه قلت يمكن صايبة شيء .. مع ذلك مارضى يفتح .. و السواة ..!
دخلت على إيميل ثاني و أضفت إيميلي و كمان هنا كانت الفاجعة الثانية .. تمت إضافتي على الماسن .. من الصدمة بديت أسولف قلت السلام عليكم .. قال وعليكم السلام .. قلت كيفكِ مالك شوفة اليوم .. قال لي معليش حياتي أنا اليوم مشغولة .. أشوفك بكرة بالجامعة .. برب ..

ياقوة وجهه سارق ايميلي و معليش يتكلم بِـ لسانيّ خير :| .. قلت تعالي تعالي .. أسلوبك متغير ليه .. قال لي معليش والله نفسيتي تعبانه بكرة اقولك على الموضوع بالكامل ..
يالله .. قد ايش فيه ناس بجحين مثل هالإنسان ماشفت .. طلعنيّ من طوريّ قلت له ..الله لا يسامحك سارق ايميلي وبيوم جمعة .. والله ادعي عليك ربي مايوفقك << عاد أسلوب البنات إليَّا مره قعدت تنافخ من ورا الشاشة وتدعيّ http://www.getsmile.com/emoticons/smileys-91853/c0/lol.gif
ولا حياة لمن تنادي ولا كأن وحده قاعدة تدعي عليه قبل شوي .. شوي قالي خلي صاحبة الإيميل تكلمني و يدز لي الرقم ..يعني بفهم سارق ايميلي تبي أكلمك ليه .. من أنت عشان أكلمك ..!
هنا أنا عاد خلاص قلت السالفة مافيها ياحياة أو موت ...قلت شوف ياأنك ترجع إيميلي يا أنك بتشوف شيء ماشفته من قبل .. و بالأخير أنا اللي ماعاد شفت إيميلي ..



و أنا قاعدة أزين لي إيميل جديد أسأل نفسي لهالدرجة ماعاد فيه خصوصيّة .. لهالدرجة الناس تنتهك البعض ولا أحد يحس برقابة ذاتية .. أو رقابة من الله سبحانه وتعالى .. الأشخاص اللي زي كذا .. أشخاص بعقل .. أشخاص مبدعين ..لكن للأسف كل هالأبداع وظفوهـ لِـ التلاعب بِـ أشياء الآخرين الخاصة .. أحدى المنتديات العزيزة على قلبي بعد كل يومين يتقفل من قبل الهكر .. المقصد و لاشيء ..مجرد فضاوة .. و شباب عاطل عن التفكير لأي شيء يخدم صالحة .. من غير العبط اللي معيشين أرواحهم فيه .. زي هالأشخاص ليه مايُستفاد منهم بأمور أخرى تخدم أشياء كثيرة و تخدمنا .. ليه الأنظار مو عليهم .. لمن أفكر كم قعدوا وسهروا عشان يتعلمون اختراق أو تهكير مكان .. ألقاهم بالأسابيع و الشهور .. وأرقام وحسابات ومنافذ وطرق مالها أول من آخر .. والله خسارة هالشباب يعيش على أمور كذا بجد خسارة ..



بعد التفكير .. و التفكير .. فتحت بيت جديد .. نظيف .. مافيه ولا كونكت :) .. و بديت أرسل للي بجوالي أن الهكر تراهـ يتميلح ماعليكم إلاّ تحذفونه و الله يتولانا برحمته .. اللي مقهورة عليه أكثر شيء مدونتيّ تابعة لِـ الإيميل نفسه .. راحت مع الإيميل :( .. و هالشيء بيخليني أفكر أفتح مدونة خاصة بِـ رابط مُباشر .. لكن مو الحين لأني مشغولة بِـ دراستي كثيراً .. لكن قريب راح تكون بِـ أذن الله ..







لِـ إيميلي المهكّر :(
http://www.6rbtop.com/library/resources/Rabe7_Sager/Collection/listen/49483_hi.ram








.

[تهاني سلطان]

.




أنا بهذري ومالي خص باللي يصير .. لأني ماعرف هالمتصفح إلاّ بِـ الأوقات الغلط .. يعني مثلاً بكرهـ عندي تجويّد وتسميع قرآن << أحس بتحوم كبد الكثيرين على سالفة حفظ القرآن .. بس صدق والله مو هين وهذي آيات و أرجع أقول الواحد لازم يحفظ زين ولا يرتاح أزين .. بعد عندنا اختبار تجويد "أعرف بتقولون شنو عندها البنت محولة دراسات " ..بس عاد هذي المواد العامة تاخذ أكثر الهم من مواد الاختصاص ..يعني مثلاً <<مكثرة مثلاً أنا هاليومين تلاقون سارقتها من أحد أعتقد دنوhttp://www.getsmile.com/emoticons/smileys-91853/a0/tongue.gif ..نرجع نقول يعني مثلاً أستاذة الثقافة الصحيّة << صدمة أدب انجليزي وثقافة صحيّة .. عادي عادي أرجع و أقول مواد عامة .. خايفين منها أكثر من Prose مادري وش تحس به اللي تدرسنا ..كل شوي تهدد وتتوعد فينا .. و أنا و أنا .. و القروب شايلة عليه مره وكل شوي "تشخط" جنب الحضور شيء كذا بالاخير أكتشفت عشان السلوك على قولها .. على أنو نشارك معاها و معطينها جو بالكلاس بس أهي مادري شفيها علينا .. والله نحبها و نعرف أنها طيوبه وهيك بس معليش .. يعني ساكتين أو مو ساكتين ماتفرق عندها ... يوم أروح أنا وهنوفه نقولها ليه حاطه لنا شخطه عند اسمنا تقول "سلوك وراح تخسرون نقاط "<<سلامات تحولنا موبايلي http://www.getsmile.com/emoticons/smileys-91853/q/weep.gif ..


أي برجع لسالفة حفظ القرآن .. الحين أبي أحد يسمع ليّ .. و بما أن بنت اختي الكبيره حافظة جزء من القرآن وترتيلها وتجويدها مضبوط "ماشاء الله عليها " فقررت أنو أروح لها العصر ...عاد ذنبها أنيّ خالتها .. وعقاب لي تبيني أزين معها سكلوب عشان على الفطور بكرهـ لصاحباتها .. على طاري الفطور شكراً أسوم ق على الفطور الغداء اليوم .. شكراً عبدالكريم << أخوها لأن أهو اللي جابه لنََا .. أي بعد شكراً د.أسماء و د.فاطمة ..حبايب قلبي أهم http://www.getsmile.com/emoticons/smileys-91853/y/kiss.gif ..

وفيه وفيه بعد شيء ياربي ..أي أي ذكرت .. أنا من سمعت طاري الإجازة ماعاد لي خلق بالشيء.. ينقال بأجّز زي الخلق يعني كأن ماوراي اختبارات ميد تيرم بعد الإجازة على طول .. أنا من عرفت هالجامعة واختباراتي بعد اجازات دايم ..يعني حتى بالإجازة أم أسبوع اللي طافت د.إيمان أرسلت لنا إيميلات أنو لازم نقرأ الروايتين اللي أخذناهم هالترم .. يعني حرام تضيع علينا الأسابيع الذهبيّة و المُشكلة خلاص هذي الإجازة الوحيدة ألين الصيف .. يعني وراهم ماحطوا اختباراتنا هالأسبوع و الأسبوع اللي قبله .. يامساكين يانحنhttp://www.getsmile.com/emoticons/smileys-91853/j0/book.gif ..

أي آخر شيء بقول سالفة وبروح أنوم ليّ ساعتين عشان أقوم أحفظ ..

أنا بالعادة بنت أختي الصغنونة جود .. أهي دلوعة وكيوت وكيرلي هير ..لو بيدي كليتها .. كل ما أشوفها أقولها يآآي لبسك مرهـ يجنن .. يآآآي شعرك مرهـ حلو .. يآآآآي استايلك خطير .. ومن هالكلمات عاد أهي سنتين و شوي .. و أنا من زمان أقولها هالشيء.. وهي تقعد تطالعني .. و أقعد أعيد عليها و أحسها تقول وش تحسبه ذا الخاله : ) .. أمس جايه عندنا وتدق باب غرفتي و أنا ماأواطن اللي يدق علي باب غرفتي و أنا نايمة .. يعني أنا بقوم لحالي بس لا أحد يقعد يسوي فيها ويدق .. عاد يوم سمعت أنها أهي ركضت وفتحت لها وقعدت أبوسها وأخمها لأن بنت اللذينا توحشني .. هالمرهـ ماقلت لها من يآآياتيّ شيء : ) .. قلت لها يالله بنزل وياك نشوف ماما قلت تيب .. وأنا على الدرج قالت لي خالتو ××× .. قلت لها لبيه ..قالت يآآي شعرك مرهـ حلو .. تخيلو بالدرج قالت لي هالكلام من الصدمة بغيت أطيح ..قلت شنو تقولين قالت شعرك حلو .. قلت عيدي عيدي ..عاد استحت و سبقتني .. والله ماتوقعت منها يطلع هالحكيّ .. خصوصا أنو صمتها عودنيّ عليها كل ماأقولها هالكلام .. الحين أفكر أعلمها الرد لمن ينقال لها أو تقول لأحد أنو لازم تقول ""مرررهـ شكراً " ..وبكذا راح يكون الدرس الثانيhttp://www.getsmile.com/emoticons/smileys-91853/1/stareup.gif ..




الثلاثاء 21-04-2009
.