خـ ـد يــ ـجــ ــة .....

[جمال الشقصي]

\

يجوز اللي تجي من (دورق) الغيمات مصفيّه=يجوز ان الغمام أصلاً تمنى شعرها (دورق)
في كل أحوالها (حرمه) بكف العطر منسيه=حبيبه أو صديقه.. ما يهم إن كانها تورق!

/

[جمال الشقصي]

\

خديجه.. لو قفلت الباب.. كوني الباب والجلاس=وانا عهدٍ عليّ آبانسف المدعوّه: أزماني
يصير الشارع/ الشاعر/ تصير الكاسه/ الكراس=على شفاه الظلام أصفق نخب مهجرْك باوطاني
خديجه: والصحاب كثار/ خديجه والرذيله ناس=لذا ما عاد لي غير أدفنك في وحشة أجفاني
باغني بك تراب الفقر لين أستعظِم الإفلاس=أنا وانتي جريمه ما لقوا في كفرها جاني!
تعالي من خدر رمشك لكذبة عودك المياس=تشيب الشمس/ ما شاب السهر بيديك واحضاني
دروا بك أو عساهم يا خديجه ما دروا الحراس=أباضوي صوتك المترنح بفانوس حرماني
كسرت العرف.. ليلة ما رجيت مْن القرابه ساس=أبابني يا خديجه طيشك.. بتخريب عقلاني!
/

[جمال الشقصي]

\


يا خـ ـديـ ــجــه:


كيف أعيش؟!..

وانتي لا طرتي..

ولا خليتي

ر
ي
ش
؟!!

/

[جمال الشقصي]

\

يا خديجه
:
على البلدان طوفي فـ ليل بارد= وهاتي آخر أخبار المدينه
أنا عن تربة التصديق شارد=وعشت بداخل الكذبه الأمينه
خديجه: كل هذا العمر مارد=خذيني طفلٍ أكبر عن سنينه
سكنت الأرض ودروبي عطارد=ولا املك من حدود الأرض طينه!
/

[جمال الشقصي]

\

وقلت أطيركـ / أو تطيّرك المداخن=يا سوادٍ عشت به طهر الطفوله
والله إن أبرد براد الصدق ساخن=وانتي جمر احساسك الخاين رجوله!

/

[جمال الشقصي]

\

إذا صِكّت نوافذ خيرة البلدان
وغابوا الكل
وطاحوا من فم الإيمان
باقول انك ولا غيرك
تزيّد طعنتك خيرك
وانا سرك
وانا بيرك
ولا انتي فـ يوم أصدقهم
ولا اوفاهم
ولا اغلاهم
ولا حتى غلاك بداخلي نيشان
أحبك والخطا خيره
أحبك كذبه كبيره!

/

[جمال الشقصي]

\

ليلةٍ ما تحتضن تاريخ مومس=صعْب أدوّنها برزنامة حياتي
كلما القاني بالاطهار مْتنومس=قمت أحس المرجله.. أوسخ صفاتي
يا خديجه: كيف أجغرفها و(أقومِس)=خارطه.. قامت على تعزير ذاتي؟!

:
:
:

يا خديجه:
طارت الأيام عن حارس جهاتك
وانتي جنحانكـ جروح
ما تقوم.. ولا تلوح
اطلقي سربك على الأرض الدريجه
دام ما طرتي مع الحراس يوم
ولا على أرضك نجوم
ليش لمتي الورد في موتة أريجه؟!
ليش صحتي؟!
ليش طحتي؟
ليش نحتي؟!
وانتي لا بيتك حضن ياوي جناحك
ولا جناحك يا خديجه هو
س
ر
ا
ح
ك
!!!


/

[جمال الشقصي]

\


من؟



:



خديجه؟!!


















آآآآآآآآآآآآآآآآآه صارت شقتي أرض وبلد

يا خديجه:

إدخلي ما من أحد

حتى أنا..

ما ني هنا..!!


/

[جمال الشقصي]

\

يقول (أحمد).. (خديجه) يا (جمال) مْن الخطا والكذب=واقول: (أحمد).. (خديجه) طيبه لو صبحها داجر
أعرْف كثار.. ياما من زلال المغفره تنكبّ=ولا سيّل بياض وجوههم/ في وجهي الضاجر
على اطراف الحياه بْلا صديق ولا عرفني رب= رفضت الكل/ واخترت الوطن في مضجع الفاجر!

/

[جمال الشقصي]

\

في السما كنتي أو بدرْك الحضيض=والله إنك شيخة ورود الرياض
يااا جسد صاحي/ وشريانٍ مريض=علميني الركض بتراب الحياض
جيت أقول الذنب بالخط العريض=يوم أنا صوتي بلا حبل اعتراض
كيف أصدّق وجهك المرّ البغيض؟=وانتي ليلك وجه بالنور استعاض؟!
إيه نبع البغض من دمك يفيض=لكن إنتي تاج في رووس البِغاض!!

/

[جمال الشقصي]

\

تعالي نكرر التكوين
نقول إن الثرى عصفور
نقول إن السما ح ز ن ي ن..!
:

واسافر لك..
ولا القى لك أثر هارب
واجي شارب:
واجي علبة دخان بْها العطر ضارب
أدوّرْكـ.. وألاقيني
ألا قيك بزجاجة كحل مدفونه
ولا القاني!
:
خرجتي من سعال الليل
وانا مثلك:
خرجت أسعل بلاد وويل!
دموعك ما لها ماسِح
وانا امسح عطرك بمنديل
نعم شارِب:
فلج ما ينبت النوار
ولا يروي ضجر يابس بركض صْغار
نعم شارِب:
ثرى بلادي لحد العظم
ولا أنبت بجوفي دم!
:

خ
د
ي
ج
هـ
إي نعم شارِب..
وليش أصحى؟!
مَادام إن الوعي غرقان
مَادام إن السكِر قارب!

:

خديجه: هذي الليله بلاد الصاحي/ الشارِب=وش الكالف سؤالك عن غريب بسكرته ما طاح؟!
وراس الكل/ ما جيتك من أقصى نكستي هارب=وصلت أشعل على ضيّ النهار المنطفي مصباح
نعم.. ما ني عُرابي ولا ني المستعرب العارب=ولا اللثغه الدخيله يا خديجه بحنجرتْك رْماح
هلا بك يا خطيّه كبرها ما طاوَله شارِب=وانا اطمّنك: لا ني شارب ولا شايل المسباح!!

/

[جمال الشقصي]

\

يا خديجه:
لو زعل كل الحضور
شوفي ضحكة شاعرك.. كبر الكسور!
:
يا خديجه:
لو قصيدي به كسور
قولي شاعر ما وصل سنّ الحضور!!

/

[جمال الشقصي]

\

أو نسيت آخبّرِك
:
وين هي أرض القصيد؟!
يا خديجه:
كل ما تمطر على شفاهي الدفاتر
يلتوي بصوتي البري مليون قيد!

/

علميهم يا خديجه:
إني واصِل توّي من أرض الرماد
في عيوني للفرح للحظة حداد
لو وضحت كثير..
رمزية جسد
ولو رمزت الشمس بتراب الوطن
عشت في سجن البلاد!
:
يا خديجه:
كل ما قلته هِنا.. لعبة كلام
لا يخونكـ صوتي المفعم سلام
روحي بيتكـ
واكسري فانوس بابكـ
طيّري كل الحمام
وما تبقى من شجر لو تحطبيه..
هذا كل الشعر.. هاااااك:
وين زيتك؟!
وين لو تسمح هويتك:
تشعل الشاعر.. وتذريه
ب
س
ل
ا
ا
ا
ا
ا
م


يا خديجه!


/

[جمال الشقصي]

\

يا خديجه
:

فيني أكتب لك خطيه ما تقاس=فيني أنسف لك معاني الطاهرين
ما لثوبي يا خديجه من قياس=عاريٍ مثلك ومثل العابرين!
صدقي: ما باقيٍ في الناس/ ناس=وريّحي ذنبك بليل الفاجرين!!

/

[جمال الشقصي]

\

ليش أعيش العمر وحدي يا خديجه؟
وانتي وحدكـ..
قومي نمشي هالظلام
نعصر أطراف الكلام
ويْتقاطر عمر من ثغر الحرام!
قومي نسري يا خديجه
لا مطر للناس..
لا قمر واحساس
وحتى طول الأرض تحتك ناظريه:
ما له حدود وتماس!
قومي نسرق يا خديجه أي شي
الهوا
والما
وحلم العابرين
نرسم الصحرا صلاه
هذي الصحرا عباه:
ودها تتعطر بثلجٍ وفيّ!
عطريها يا خديجه بلثغتك
علميها كيف تنهض يوم من ماي الجسد
وتصبح المومس بلد!!
:
عاريٍ دربي ودربك وش عليه..
لو لبسْك.. يوصّل جسور المتاه
ولو رماك.. تجين لاول منتهاه!
دايره هالعمر تكبر يا خديجه
مثلما تكبر بشرياني النفوس
خزنة الأسما الكثيره
والعلاقات الحقيره
والكبيره
ما يطهرها سوى حزمة فلوس!
:
قومي نمشي الليل كله يا خديجه
ولا بدا لون الصباح
نختبي بجيوب غرفتنا البعيده
تحت شرشف هالسما
ونطبق الأجفان عن ناس وظما
تحت شرشفنا نقوم
وتحته نعود وننام
كاسك..
أنا كاسي نضب
يا خديجه:
بصحتك نخب السلام!
:
:
بصحتي مات النخب!!

/

[جمال الشقصي]

\

ناظريني يا خديجه.. وش تشوفي؟=وش على خدي من أخوال وعمام؟
كل بقعه ميته.. هذي ظروفي=وكل شمس تشع بعيوني.. الظلام!

يا خديجه:

لا تخافي.. الخوف كله في سيوفي=لا فتلت الشارب انهدّ الحسام


/

[جمال الشقصي]

\

لو تكوني يا خديجه
:
:
ساس طايح
أو تكوني عطر بالفجّار فايح
هاتي دمّك
قدمي القربان لي من نهد أمّكـ
والله انه يغسل التربه المجيده
يعلن الأرض الجديده
ولو هو سافل،
ولو حكوا لك بانّه المهره العطيله:
يااااه لو تدرين كم هو:
عن كذوب النسل جافل!!!
صدقيني يا خديجه:
ما يصالحني أحد
ولا يقاربني أحد
ولا يخالطني أحد
ما يناسبني الأصيل مْن القبايل..
قرّبي من مفرشي
بعت أنا دلة نسايبنا على مرأى القوايل
هاتي الكاسه الأخيره
والذخيره
والفناجين الأثيره
كلها تحت أخمصي دربٍ جديد
ما يوصلني سوى لليل الاحمر
والنخب والعزف والرقص (الصقيل)
ارقصي لي يا خديجه بلا هواده:
واحدٍ راحت بلاده
وش يشوف بكاعبك غير الوطن؟
غير النخيل؟!
هذي هي أرض النخيل!!
:
يا خديجه
:
فيكـ أبهذي بلا حدود
الشعِر ما هو لسان
ولا القصيد المُتعَب بظني أمان:
وجيت أشخبط لك حكي
بالوعي مو متّكي
جيت أقودك من أزاريري إلى كذب الوجود!

/

[جمال الشقصي]

\
دخّني..
وانفثي الدخان في وجه التمني
البلد.. ما هي لنا
ولا النواحي حيّنا..
دخّني.. أو دخّني..
في كلا الحالين ما لوّثتي حد
كل من يمسي حوالينا.. لـ ـح ــد !!
والصباح.. أحْدٌ.. أحَد!


/

[جمال الشقصي]

\

يا خديجه
:

علميني كيف أخيط بلاد من ثوب المنافي؟!=وآنا كلما (أعقم) الغربه.. خنقتك يا بلد
لو صحيح إن البيوت الطيبه من جذع غافي=ما وصلت أسأل خديجه يوم عن لوح اللحد!


/

[جمال الشقصي]

\

وش تبين أتوسّلِك؟
بعت كل اللي جنيت
الهوى
والناس
وجدار المبيت..
كل شيّ آبا اتركه
واعْتبري جدي ما زرع نخله..
حصد تمر نْخَلِكـ..!
/

[جمال الشقصي]

\

صديقي الجميل/ المُخرّب/ العقلاني جداً حمد عايد لايزال على قيد الصحو.. يبدو أنه يمارس عادته القديمة معي ويسأل: مَن هم هؤلاء يا جمال؟!.. وأقول له: ربما هي الأشياء حين تَحدُث يا صديقيَ الجميل/ وتُحدِثُ معها الأفراد..!

:

لا يتحدث حمد عايد كثيراً، ولكن قليله القليل منه يغمرني بلاداً وعصافير، فها هو يراقب (خديجة) معيَ ويقول:

خديجه واسكبي هذا (الجمال) فـ كاسة الأطهار=نبي نشرب نخب ناي الحنين وصوته الطاهر


:


ورَدَدْتُ عليه قائلاً
:

تصدق عاد..
خديجه المومِس العذرى
إذا صار الوطن سادي
إذا بيت الأهل صحرا..!


/

الآن تقريباً.. توقيتاً.

[جمال الشقصي]

\
يا بلادٍ ما انْجِبَت فوضى خديجه..
ـــــ أشهد إنكـ ما انتي إلا للسياج!
من يحس الورد لو سافر أريجه؟!
ـــــ من يشب الما.. لجل يضوي السراج؟!

/


آآآآهـ منها.. يا حمد!

\

[جمال الشقصي]

\

يا خديجة؟!!!!


و

(نقطة)

/

تحية لأبعاد وآلها الأفاضل

\

[جمال الشقصي]

\

نلغي النقطه ثواني يا خديجه
:
ما سمعتك؟
إنت شارِب؟!!!
:
إيه شارب يا خديجه
حلم أخوي اللي توفي فـ يوم غارب
وحلم أخوي الثاني اللي ما بقى
مات في لحظة نقا..!
إيه شارب..
حزن الارْض الواقفه من خلف هالباب الموارب
شارب نخيل الضواحي
يا خديجه..
ليش ما اشرب كل شي..
دام ما به شيّ صاحي؟!
:

شارب أحزان الفقارى.. والأماكن
ــــ ليتني قادر على شرب الحقيقه
النهار أقسى من أقسى ليل داكن
ــــ ليش مَا اشرب يا خديجه بالدقيقه؟!

/

[جمال الشقصي]

:
:





خديجه بنت
لأ..!
خديجه نبت
لأ...!
خديجه فرض..
إذا خان المطر فضل البحر والأرض
خديجه تروح..
ويرتاح الجسد برّا حدود الروح!
هي احساس الصحو بالخمر
تراتيل الخطا المسموح
لقت في يوم شمس العمر منسيه
وقادتها لباب العمر
خديجه ما تقول الصدق
خديجه ما تعرف الحق
خديجه دربي المقطوع
خذتني شنطة مْهاجِر..
وعشت بذنبها فـ اطهر سلال العتق!
إذا قامت..
تعاود للصحاري بسمة الهملول
وإذا تستأذن وراحت..
خذت باقدامها حزن المرافي حجول
هي ذراعي..
إذا حزن الصحاري قصّص الراعي!
هي بلاد الخطا المعتوه
تعرْف وجوه
وتعرْف اني الوحيد بجوعها واعي!!


خديجه ما اعتبرتك غلطة اللحظه أو الملهاه=خديجه ليه رحتي وقلبي معلّق بفستانك؟
أنا من كثر ما ادوّر طيوفك جتني الأشباه=وصكيت الشوارع خلف هالشقه.. على شانك

:
:
:

تعالي لي من السجان
من الزنزانه البكمى
ومن وسط المعاقِل/ عملقي البلدان!
تمشّي وسطهن مومس
وقومي الليل
أبي هالأرض من كاعبْك تتقومس
يجغرفها وفاك الغادر الخوان
أبيكِ تخطبين بكامل الكذبه:
ترى طعن الحزِن وافي
ترى كثر الوفا غربه!!
تبين الحق؟
والاّ يا خديجه لعن أبو هالحق!

كوني الزنازين.. والمعقل=كوني نسا الليل والترتيل
إنتي خليط الغبا الأعقل=يوم العقِل لكنة التخبيل!
لو خففوا الحكم.. أو يثقل=حرّه بتبقي لهذا الليل!!



.

[جمال الشقصي]

:
:

حزين.. ما ادري وين أصادف طيورك =وحيد.. أغني في فساتين لحمك!
عشقت ياما بنت تشبه حضورك=وفارقتها ظهريه تشعّ باسمك


:

[جمال الشقصي]

:


خديجه: والوطن ما هو سوى العرف الخبيث النتن!=ذري هالأرض من كاعبْك.. لين أكبر خطا العذرى
ذريها.. علّ من ليل الدخان/ تأرّخي لي هتن=أبا اغسل بالخطيه الموجعه تغريبة الصحرا
أنا ابن الساقيه يوم أصرمت نخلي عليّه متن=وانا المورق من الأرض العفيفه.. غلطةٍ قشرا..!


:

[جمال الشقصي]

:

أنادي لك
من السجان لثيابك
عسى كل امنيات الليل مكتوبه
عساني يا خديجه شيمة ترابك!

:

[جمال الشقصي]

:

علامك ما تجين؟!.. الكاس منسيه!=علامك ما دخلتي شقتي الليله؟!
حدود الناس عني وعنْك منفيه=تعالي نعلن الميلاد في شيله!
هنا خلي ثياب الصبح يا بْنيه=وهنا باحطب سلالة أصلي النيله!!

:

[جمال الشقصي]

:
:

يا خديجه
تمطر الجدران حزن الليل الاول
وآتجوّل:
في ثنايا صدفة اثنين بغمامه
في سما الدخان..
بسطوح العدامه!
في براجيل الفنادق..
يومها كانت خلاليلك بنادق
وشعرك المرمي على وجهك سرادق
وآنا لا نار اشربتني أو جليد
عشت بك سكة حديد
تاخذ عيوني بصدرك
وانزل بشنطة جنونك في فنادق!!
:
يا خديجه:
كل فلسٍ ندفعه.. هذا خرابي
من تذاكر حانتك حتى ثيابي!
والله كنتي ألف ليله من حقيقه
الحدود
المهجر
الخبز
السنابل
كنتي ورد الأرض لا خانت حديقه!
:
يا خديجه
لمّي ثيابك عن خدود السواحل
كل ضحكه في المدينه تتبعك
وكل وجه بضحكته دجال قاتل!!

وآنا مختار المدينه.. يا خديجه!!!!!


.

[جمال الشقصي]

"

إنتي وينك؟

لا هدا عطر بثيابي ولا سجاير

هذي الشقه بعيده

لو دخلت بْها بدونك

تبتدي تبكي الستاير

:


إنتي وينكـ؟

كاسة الشاهي بْردَت

وباقي أكياس الأكل فوق المراتب!

وباقي راتب

ما شريت بْه المواعيد القدام

ولا دفعت فلوسه بكاسة عتيم

يا خديجه

كل نخب بْمنضدة يومي يسيح

هذي فرقاك الدريجه!

:

[جمال الشقصي]

:

ورحت أغني:

يا بلد ما تورق النسمه بشذاها=فارقيني بْساع.. محتاج المهاجِر
لو عطتني من خديجه لو أذاها=كانت أبرك لي ولا طيب الخناجر
هي مَرَه لو تنقرى سيرة حذاها:=ما اوْسِموا عفة خديجه بأرض فاجر!!


:

[جمال الشقصي]

:

خانك اللي في مساري الدم تاب=خانتك عين الحقيقه في غيابك
لا تبيعي الصدق لاهلك والصحاب=ما يخون إلا ذوي القربى ترابك!!

:

[جمال الشقصي]

:

وين أشوف؟!
وآنا حطيت أوفياي بخاصرة قلبك سيوف!
طاحوا أدري
ولا تبقى لواحدٍ منهم طيوف..
بس أبا انشد عن طريقك
وين ألاقي ريحتك؟
وين أشم آثار ليلك واشربه؟
وين أقوّمني فـ لحظة طيحتك؟!

:

يا خديجه:
ما بقى وافي معاي
كل خنجر في ظهر قلبك يجول:
جاك من صدق أقرباي!!
اللي خانوني معك
واللي باعوا مضجعك
يا خديجه كلهم ما يعرفونك
يا خديجه:
كلهم قالوا عشاني
بــ
يــ
سـ
جــ
نـ
ـو

نك!!

:

[جمال الشقصي]

:

رسالة إلى من خانك:


ألا يا يا صاحبي.. يا دمّتي.. يا محزمي.. كلمه: =دخيلك لا تقول لآدمي عني.. ولا حاجه!
توكّل يا ابن عمي/ اجترّ بالكذبه سنا النجمه=بتبقى لي خديجه/ وهاك نجم الكذب معراجه
قدرت تخون باللي بآخر التكوين له إسمه=أجل وش فعلتك بافقر فقير تعرْف مخراجه؟!
أبا حكي لك: خديجه ما تقول ان خنتها كلمه:=خديجه لخاطري: تشعر جحيم الثار: ثلاجه!!

:

[جمال الشقصي]

:


غني أكثر يا خديجه
واآنا اغني..
من قصب روحي إلى ناي التمنّي
وآتشكّل لك مداين..
خيمة الوافي بها مليون خاين!
وآتدوزن لك مآذن..
ليلها فجار يتلوُن القداس
في لحاهم ألف فاس..
يحطب الورده فدا خيانة خديجه!

:

يا خديجه..
كلهم لو يضحكون:
تطلع أكواز الذره برمح وخناجر
وخبز بيت أمك له أنياب وطعون!
يا خديجه..
كلهم لو يركعون:
تبتدي موت المحاريب الأثيره
وآنا من عينك باقوم:
لاجل ما يستمنئ الوهم بجفونك
ولا يْتكوّن واقع الكذبه بجفونك
ولا بكا يكثر بمدمعْك العطيب
شبي جفنك بالخيانات الكثيره
اللي أولها أنا
واللي آخرها مطاليق العشيره!!

:








يا خديجه:

صحّي أبواب السجون بصوت موتك=والهمي السجان يركع في صلاحك
لو قيود العدل تدري بطهر صوتك=تستحي للدم/ تطلق لك سراحك!!

:

[جمال الشقصي]

:


يا خديجه:

تعالي نعاشر الجدران
نبرّ بطين..
ونتشيم بإسمنت الثرى العريان
تعالي ننتمي لسْلالة الميته
نقول الجيفه عمتنا
نقول المزبله تهويمة الحيّان..!

:


إذا انتي الوافيه وخانوك=صديقاتك.. ورفقاني
كثر ما اعطيتي وهانوك=أبا اهدي الموت جنحاني

"

[جمال الشقصي]

"
رسالة أخرى إلى نفس الخنجر:

"



إيه.. من عظمي تفاصيله تنامت=ومن عروقي صار في هيئة مُوالي
لكن الأرض الكريمه لو تسامت..=يبقى في تاريخها نقطة تِعالي!
يا خديجه.. طاحت الليله وقامت..=شيمة الباقين بالضلع الشمالي
لو سمعتيني مع الأيام شامِت=ما شمَتّ إلا على رخص المعالي
اللحى مو كلها في وجه سامِت=الوجوه أغلبها باللحيه تغالي
وآنا شفت اللي طعنْك اليوم.. صامت=يا خديجه.. ولا تجرّا في سؤالي
لكن بفمي إجابه.. وان تعامَت=شايف بْها كل من خانك..تعالي:
دوك.. هاللي خيانته بجنبك ترامت=أقرب واقرب من أعمامي وخالي!
بس لاجلك سدرة أنسابي.. وشامت=ولا تبقّى من أثرها غصن عالي
يا خديجه.. كل أبوها ولو تسامت..=سدرة الوافين.. ما تسوى نعالي!!


"

[جمال الشقصي]

"

عشانك: ما يدق الباب هذا واحد مْن أهلي!=وعد مني لاشب بمدخل الشقه تراحيبي
عرفت إن الثرى مزبلْة الاقراب.. وغبا نخلي=لذا: في كاسة الظلمى دفنتك يا محاريبي!
خديجه.. لاجلها تفنى حياة أنسابي.. ونجلي=أنا النسل الأخير اللي تجذر في دما عيبي!!

"

[جمال الشقصي]

"


خذيني بعيد..
أبا اتعلّق خطية في سما ذنبك
واغامر بالتصوف في رضى نخبك!
خذيني بجمرة السيجار
بباب البار
بحانة صحوك الملغوم
خذيني من دعاء القوم..
أحس إن المبادي يا خديجه يوم..
وإذا روّح عجزنا نصوم
أحس إن الأوادم لو تغني لي:
غدا وجهي سمار البيد
وعيدي يحرق بصدري ثياب العيد!

:

خذيني يا خديجه من خيام البيد..
من الشارع..
عن ارْصفة النهار بعيد
أنا ما ابي حنين البيت والحيّان
رفضت آجاور الجيران..
إذا انتي مو معي بشقه..
إذا انتي بصحبة السجّان..!


"

[جمال الشقصي]

"


واقلّك شيّ..؟


"

كسرت البارحه وجه المسا بزجاجة البحار=أبي كل الشواطي من زبدها تجرح المرفا
توسدت الرمال الخاويه ليلة رحيلك.. بار!=سكرت بدمعة بلادي عليك وخاطري منفى
لعنت الأرض.. كل الأرض.. بلسان القصيد البارّ=خديجه: ما بيدّي حيلةٍ غير أحرقك، وادفى!!!


"

[جمال الشقصي]

"


وإلى ذات الخنجر..

رسالة أخرى/ متأخره!!


"



والله انك مو جمل=لا ولا دمّك.. دمي
كلك فــ/ـبعضك حَمِل=في خرابة آدمي!!

والا اقلّك:

مسا الكذبه..
مسا تاريخك الموسوم بالرغبه
مسا اللعبه يا بِن عمّي..
تذكرتك فـِ ليله نخبها بردي
فـ ليله لونها وردي
تذكرتك تقول: إن الوطن فاضي
نواحي بلادي تقاضي..
على المليان والفاضي!!
تذكرتك تبي تلجا لشاطي بلاد
أبد ما تحمل الأوغاد..
وجيت اسمك ولد عمي..
ورحت أوغد من الأوغاد..!

"

خديجه تقول:
جمال اكسر لشاطينا حديد قفول
وتطلقني (عجوز) بمتنها مريول!

وكنت انته معي تقرا:

(خديجه طيبه لو صبحها داجر)

وكنت تقول لي إقرا:

(أنا اخترت الوطن في مضجع الفاجر..!)


وكنت تأيد الفكره:

يا بلادٍ ما انجبت فوضى خديجه= أشهد انك ما انتي إلا للسياج!

"


رساله من خديجه لآخر الأوغاد:
أنا احبك كثر ما خنجرك وافي..
عشان الشاعر المسكين..
عشان اللي سترْك وهذا هو..

ح

ا

ف

ي


!


"



"

[جمال الشقصي]

"

مسا الفجّار..
تمايم ديرة الأبرار
صباح الخير.. يا خيرة هلي با اكتب:
هلا يا اهْلي بداخل لوحة الفخار!
تشقق في ثرى صدري جدار الكل
تناسل من جديد أكثر
تنامى ظل!
وكلما حان موعد جيّة الوافين..
هلي الغالين..
وكلما لاح لي الراعي أو الفلاح..
أصب الما فــِ موقد خيمتي وابتلّ
وعشان أنهي سلالة ظِل:
كسرت بعتمتي البيضا سنا المصباح!

"

[جمال الشقصي]

"

إذا بشّ الثرى بالسحب
وتورّد حافي الرمله بزهرة حب
إذا العصفور غرّد في الأديم البور
دريت إنك عبرتي من ثواني قصار
عطيتي اللولو للمحار
وخليتي الخراب.. قصور
خديجه: (وينها عيونك)؟!
أنا عيوني صحاري طاعنه دونك!

"

[جمال الشقصي]

"

ما كنت أقلّك قبل ليل المساري=مشوارك المجهول.. يوصل لمجهول
وهذي خُطاك اليوم يا قِدْم عاري=مْعلقه في راس حزمه من نْصول!
لا يا بعد كل الخلايق.. تداري=ما في حدود الارض شبرٍ بلا نذول!!

"

[جمال الشقصي]

"
عطي جدار العنابر يا خديجه ريحة عْراكك=وصحي لي الزنازين بـ بقايا سيرة الحانه
أبي لا من تثاوب مجلد السجان بادراكك=يفلك يا شقا الأصفاد عن رسغين.. سكرانه!
بعثت لْك الحمام ينوح بآخر صبح شباكك=وابشرك: الخيانه مْن البحر.. لابعاد شطآنه!!

"

[جمال الشقصي]

"

هم يقولوا ما لهم ذنب وأيادي=ولا عليهم في طعن طهرك أثر
وآنا اقلّك يا خديجه: لا تنادي=كلهم ما كانوا في الواقع بشر
وادي الشيطان يبدا من بلادي=وينتهي بحدودها وادي المكر
لا نبيل ولا أخو شمّا.. وفادي=خلطة الأنجاس في هيئة قدِر!!




"




يا خديجه عشت وحدي
دافيٍ مستور وسط أنياب بردي
أحطب الشقه روايه
واشعل أطياف الفراغ سنين عمْر
في شبابيكي ظلام
كل ليله توفِد الصاله شعر
وافرش السفره كؤوؤس
فارغه مثل النفوس!
وانتظر
ثم أنتظر
ثم أنتظر مثل المطار
باكر تمريني الشقه واقول:
ما وصل قبلك بشر
ولا تجي بعدك عروس!

"

[جمال الشقصي]

"

تعرفيني زين واكثر يا خديجه
لو بجيبي كسور خبزه
ما كليت كسورها قبلك وربي
ما أفتش في جيوبي..
قبل ما تنبض كرامة روحك بدمي وقلبي

يا خديجه:

طاحت أسوار المدينه في عيوني=ولا تبقّى في الجهات إلا مماتي
حاولي لو صادفك مرّه جنوني=تعترف ذاتك بعقلية شتاتي
الجميع اللي تظنيهم متوني=ما هم إلا حفرةٍ شالت حياتي!!



"

[جمال الشقصي]

"


لا تخسْر أكثر.. ترى الباقي صلاتك=ولا تصلّيها من النفس المِعيبه
إنت لو قللت من كذبة صفاتك=يمكن أقبل بك ولو (شاه بزريبه)!
لا تهين بطيحتك واسع جهاتك=طيحة الأنجاس مثلك.. مو غريبه!

"

[جمال الشقصي]

"

عشانك ما تحبي يا خديجه غيري.. اش فيهم؟=الاقراب القريبه وش بلا هم ضرهم شوفي؟!
خديجه: حِبي هالمستضعف الواهن وذليهم=أبي رخض المبادي يا خديجه تهزم الصوفي
تفور الشمس بايام النهار ولا تضوّيهم=دخيلك فلّي الظلمى.. يموت الزير في خوفي!!!


"

[جمال الشقصي]

"

اللي شاور لي بأرخصهم.. رخصني=يا خديجه.. لا يغرك معمدانك
كان هالقدّيس يا ما كان حصني=والحصون تقوم في قلة أمانك
مو ذنَب عقرب على غفله قرصني=جاتني لدغة من أمنته زمانك!!

"

[جمال الشقصي]

"

اليوم طاح اللي فــ /..عمره ما سقط=ولا اظن يطهَر لو تحمّم بالمحيط!!
أغلى الأسامي صارت بعيني نقط=محتاج أعيش أكثر مع قلبي العبيط
لا يا خديجه لا تذميّهم.. فقط:=..تفّي بوجه الذاكره الزفت.. العبيط!!!


"

[جمال الشقصي]

"

لمي السحاب.. ولا تردي لصحراي=روحي فــ ..امان المغفره يا كبيره
عزيزةٍ تبقين باحراش ذكراي=ولو ذاكرتنا كل ابوها.. مريره
عرفت هذا اليوم قدام مرآي:=إن النظر مشلول شوف وبصيره!


"

[جمال الشقصي]

"

اعبري الصحرا إلى برّ الوجود=وهوّدي صوفية الذات.. وتمادي
لا (أفا) تقوى تحررّك القيود=وانتي ما خذتي سوى (أف) الأيادي
جيتي مثل اللي بعد بكره يعود=وعدتي مثل مغادر الساحل لوادي
كل شنطة مثقله بكذب الوعود=وزنها الفايض ترى خفّ المبادي
غادري الصحرا إلى ما لا وجود=كل شبر بأخمصك عن قفل صادي!!

"

[جمال الشقصي]

"

مرّدي الجدران بالكاسه الأخيره=واكسري زجاجة ظلامك في ظلامك
الوجوه النابضه حولك كثيره=وفي الحقيقه عاشت بنبضة ختامك!
كم وكم حاولت ما تغشاك حيره..=في السؤال الواقف بطيحة مقامك
يا خديجه: لو جفا المفرش سريره=لا تقولين السبب جيفة حطامك
لا يبرر قلبك خيانة عشيره..=كونها تجهل مع الطيش التزامك
كنتي أكثرهم مع الخذلان.. خيره=وصنتي أكثر من نسف فرط احترامك
تعرفي وش قالت الحانه الأثيره؟=قالت إن اللي كسر نخبك.. سلامك!
غادريهم يا خديجه بدون سيره=هذي الأطيان ما طالت غمامك


"

[جمال الشقصي]

"

باركي له يا خديجه..
قام يكبر ويتناسل من طعونك..
ياكل الصبح بردونك
ويتقهوى بالضحى رهبة سجونك!
وانتي ما توفين لعيال الشوارع
ما تقولين السلام إلا لـ ..بارع:
في مماتك..
في ولد يطعن ظهرْك الناسكـ فـ ..قبلة صلاتك


يا خديجه لو فرضنا:

يطلع المؤمن من أذكار المناره=ولو فرضنا ما له ذنوب وكبيره
ليش في الآخر على فرط الطهاره..=ما لقيتي غير طعنته الأثيره؟

"

[جمال الشقصي]

"

رخيص اللي نشر ثوبك على حبل المطر وابتل=وصديقتْك الرخيصه صارت أغلى من بني عمه
أنا ما قلت ما من سلام أبْداً بحرب الأهل؟!=لذا هاك انسحابي عن فروع سْلالة الرمه!!


"

[جمال الشقصي]

"

فــ ..هذا الثرى المطحون
عظم وأوادم دون..
لا تسئليني بلاد
أو تنشدين سجون
كل الجهات أوغاد
كل الزمان طعون!
وانتي بلادك في سجاره للظلام
كانت ومازلت معي
جمرة سلام!


"

[جمال الشقصي]

"

سلام الله على فْحول الظلام وسادة التهريج=سلامٍ من خديجه في سجون البحر والصحرا
مثل ما نشتري ثاني وثالث للغدا (صهريج)=أبا اشري من فتات الليل سدرة نسلي القشرا..!


"

[جمال الشقصي]

"

لا تنشدين الشرف والنور=كل الشبابيك مقفوله
واسراب حلم المسا المهجور=يا للأسف جات مقتوله
وانتي على الباب والا السور=كله سوا بأرض مجهوله
تدرين وش يخرب المعمور؟=وليش البساتين معلوله؟
يومٍ حشمنا القلوب البور=وصارت بالاجحاف مأهوله
لا تنشدين الضيا عن نور=شمس الوفا حيل.. مشلوله!!


"