أغنية للمهجر

[جمال الشقصي]

\
(حين كبلت براءتي.. أردت فقط تكريم عنقي أعلى المشنقة)

/

سأبدأ.. مع الأيام
حكاية تربطني بأقدم حالةٍ تجمعني مع هذا الكائن المدعو: محاولة نطق/ نطاق المحاولة شعراً.
:


واجب شكر وعرفان:
إلى العظيم تركي حمدان.. لازلت أعلق كتابتك الصغيرة/ الوفيرة عن هذه المقطوعة في قلبي، وعند كل موعد صباح ومساءٍ في هذه العزلة، أشعر بأن أكبر كائن يتكون في المحيط، ليست الحيتان.. بل الحب والحنان لمصافحة ذات تركي حمدان الأعمق فكراً من المحيط.. وأكرم.

\

[جمال الشقصي]

\
سما الوحده.. فتات الأرض=واغامر.. والمدى وحده
حقيبه للسفر/ من فرض=أراضيي.. شنط خرده!و
ا
ص
وّ
ت

لك ..

تعبت مْن البكا يا امّه..
حزن معتوه لو تدرين يا امي الوطن فيني!

لو البيبان.. تتشابك=لو الجدران لحظة: شوف
تشوف غيابّك/ إْيابك=تحس المهجر: المألوف:

وتتكوّم على سيرة فلج طينك طينكـ
وترجع ثاني.. تتـ ـكـوّم
يِحتّ البرد/ تشرينك
يطيح اليابِس.. بْحينك
وتقرع ساعة الحايط بصرخة.. آآآآه
أبي أرض المطار ألحين..
أبي بلادي.. بأوشك حين!
:
يقولون المنافي/ المهجر/ الغربه/ ألم وبعاد=يقولون الوطن لحظة تغِيبه.. ينفطم موتك
وانا اقول الفراق السرمدي: دمّك يصير بلاد=وعشان انك تقبّلها بوفاك: تْصادر بيوتك!
تغور جْراح في قاع الحنايا.. وتبشر الأوغاد:=(ترى مهما الوطن جاع/ اشْبِعه من صرخة سكوتك)!!
:
أقوم مْن الغبَش مجروح
واناظر من ورىَ صُفْرَ الدرايش صبحي المبحوح
كرهت أفرش بطاولتي شغب ربعي
تعبت آكل معَ خبزي وطن.. مذ.. بو.. ح..!
واذاكر ما يرسّبني
نجحت بْراسبٍ
م
م
دو
ح
!

/

[جمال الشقصي]

\

عشان أرتاح...
زرعت بدفتري المكسور/ غصن جراح!
أنا المعجب بحزني لو يوقفني..
ولا ارغبني بْجدراة:
ط
ااااا
ح
!
شـ اسوّي يالقلم.. ما يفهم أعياد=(جمال).. ولا عرفت ألقاني الأجمل!
أحس بطعنة الوافين: ميلادي=أحس بدون طعنه داخلي.. أفشل!!
:

وتقروني:
رتابةْ غايبٍ/ منفي
منافي ترتب.. ج ن و ن ي..!

أفكّ أزار (كعكة) مولدي باكر؟=أو الباكر لبست الموت في (كعكه)؟!
شموع كثار.. لا أدري.. ولا فاكر=وحتى الشمع من وجهي يبي الفكّه!


/

[جمال الشقصي]

\

مطاراتك.. وتذكرتك=تذكّرْتِك.. مطاراتك
تعال اقسم لي ذاكرتك=أبي ناتج مسافاتك!
يجوز القسمه ناذرتك=جوازات لْبقا ذاتك
بتعرف يوم طايرْتك=بأن الأرض.. مأساتك!!
:
حبايب طينك الملزوق بفراش السهر.. را ح وا..
عبث.. راحوا
بلا بكره بـْ تجيهم بال
بلا رجعتْك.. وارتاحوا..!
وش اللي قاله الفانوس لاهدابك..؟
وش الدرج الذي ماليه باحبابك؟!
وش انته؟.. والحنين الصرف؟
أيا مْهاجر:
رح افتح شرفة الغربه من الآخر
وطيّح طينكـ/ ترابك
يبونك كل ليله تسرد الأرحام
يبونك تكتب القلعه
وشط أنهارك العرجا
ي ب و نك..
ما يبونك تعتقد حزنك
ولا تنطق بطاعونك!!

هلي مليت من وجهي على ركعه=هلي.. طاحيت على (الماكيت) طاولتي
بلادي ما رضت تهديني الرجعه=وهي والله: بدال المنهج أسئلتي
من الواقف مَا بيني وبينها.. دمعه؟!=من اللي سيّل دموعي بمرجلتي؟!

:
وينسونكـ
ولا تنسى من بلادك شبر واحد
وينفونك..
ولا تنفي من السيره سطر جاحد!
و.. ير.. مو.. نكـ..
ونلقف في حضن منفالك.. كِلْ واحد!!

:
يجونك بالوضوء/ وبالصلاه/ بحصة دروسك=يجونك بالكتب/ بالخطوه الأولى/ وتتبسم
وتتبسم/ وتتبسم/ وتتبسم: وهو موسك!!=شف اش اكثر انكسر نابك من الجافين: ما تعلم!
تهجرّنا.. ولا أرضٍ رضت بعد العنا تبوسك=تبوس الأرض.. هذي الأرض.. كن الأرض.. تتندّم!!!
:

ولا تهتمّ
ترى كل الثرى باكر.. مقابرنا
ترى الدنيا:
فرح
م
!
ت
م
!

/

[جمال الشقصي]

\

و تتنبا:
بعد يومين
خمسه..
عشره
بْترجع،
واذا ما عدت:
أكيد بْيتصل صاحب
وتقعد طول مدة غربتكـ بالأرض
حواريك بقنوت.. وفرض
وتتوسل:
يدَقّ الباب
أو الهاتف.. يرنّ أحباب
تبي ضحكه لطول العازب/ الشاحب
:
يدَقّ الباب.. أو يكسر أحد هالباب=دخيل البعد يبعث لي أحد صوبي
دخل الوقت.. لو يملا عراي ثياب=قرفني صمتي وطوّلت بشحوبي
حزين أكثر/ من خيانة ثرى وانساب=وابي طعنة.. ولو كف محبوبي!
على هدومي.. يفوح العطر بالأغراب=ولا فالح بردْم العطر من ثوبي!
مصيبه رحت للغربه وانا كذاب=أنا الغربه تجيني بدعوة دروبي!!
ترى لو قيل لك يا أرض: منّك تاب:=أبيك تعلميهم: بُعدك ذنوبي


:
:
:

[جمال الشقصي]

\

يكفّينا..؟
زهقنا دلة القهوه من الشارع
نبي فنجان أهالينا..!

نبي عْمامه.. تمرّ بْشارِع المهجر=نبي شايب/ عجوز/ نْقبّل أكتافه
صباح وليل.. والْبوم الصور خنجر=كإنْه يَنحَر بْنظراتيَ خرافه!
:
أحد شافك على فراشك؟
؟!!
أحد حسّك.. وقلبك ينبض غراشك؟!
نعم واااااجد:
جروحك
نزفك
وْ
شاشكـ !!

دفاترنا مليناها حروف/ قلوب=وعلى صبح الستاير نرسِم الخلجان
إذا نفضى دقيقه واحده.. يا دوب..=جرينا للغرف ونقبّل البلدان!
هلا أمي/ أبوي/ اخواني/ المحبوب:=أنا طيب/ وينقصني: أجي، ولهاااان!
:
*
*
*
تعالوا نضمد الغربه بْقصايدنا=تعالوا للحمام بْنبعث رْساله
إلى اللي هَمّه فـْـ عيده.. يعايدنا=ترى كلٍ هنا منذبحه آماله

توصّوا بْشيّ؟!
أنا هالعيد جا بوا لي:
(عساك بـْ حيّ)..!!

تـوصّـوا بْـشــي ؟؟؟

/

[جمال الشقصي]

\

صباح البيت.. وش طعمه؟=جدار الدار.. وش لونه؟!
أنا من ضيقتي يا امّه=زرعت الغربه عْيونه:

قبل يومين..
لقوني خارج الغرفه
على الجدران..
على أعتاب مبنى منهدم كتفه
وهو مثلي
يجوع.. وما معه سلفه!
يجوز انه نسوه لخاطري عريان
أو انه.. يـ.. بْيِشابهني
ويضحك
يسخر
بحتفه..!
:

لقوني وفي يدي صوره
وفي الصوره.. ثلاث صغار
بلا إسفلت.. أو دوّار
ضواحي ميّته وفروع
من النوار
والأزهار
والأعمار
:
:
أنا اذكر كانت الصوره قبل لا ارحل:
بلد
واصحابي الأبرا..!!

وش اللي صار..؟
وش اللي صار؟!
وش اللي
ط
ا
ا
ا
ا
ا
ر
؟!!

/

[جمال الشقصي]

\

على شارع موازي للضفاف البور=بجنب الليل/ والنافوره البكما
هنا بابي.. أدِشَه.. ينخرع عصفور=يطير مْن الفزع/ من صورتي الظلمى:
:

وانا افرش سفرتي باكياس
وانا مقبل على اللقمه..
أناظر وحدتي/ العَتمه
بظهريه من الأغلاس!
و اذوق الأكل كـ الأموااااااس!!
شبعت دموع يالذكرى!
تبعت مْن العذاب أنداااااس!!!

:

السابعة صبحاً:


متى ما التف بي المعطف=معاه التفت ّ الخطوه
مشيت الجامعه أخطف..=سهاد الساهر بقهوه!
وصلت القاعه.. ما أعرف؟!=أو اني رحت للبلوه!
سؤال: مْذاكر الأحرف؟=جواب: الأحرف: فـ خلوه!

:

الثانية بعد الدرس:

قبال المطعم اللي ما يسلفني..
قدرت أتغدا باظفاري..
وحرقت لْفافه بحضني!!

:
الليل.. باقي العمر:

أجرّ أوراق ليلة أمس.. أبي أكتب=واقول أكتب لباكر.. واكتب الفاضي
كذا مرت ثلاث سنين.. والمكتب:=هو الطباخ.. والكَوّاي.. والقاضي!


كل يوم:

يا ترى.. تستقبل بْلادي غريب؟=إبنها الغايب وهذا هو يعود
أشعر اني من ضواحيها قريب=واشعر بطردي من أبواب الحدود!

/

[جمال الشقصي]

\

بعدْما اغسل هديل الوقت..
أحاول أبْري الأغصان
واجيب الصمت في هيئة ملفّ أزرق!
أحاول أقطف مْن الليل عصفوره..
و ارتبها تحت عنواني التالي :
(تراني اشتقت)!!
نعم.. والله تراني تقت..
لكل اللي تناسوني على غفله..
واصِفّ الغربه في كراستي حفله..
أ ب ك ت ب ك م ..
حنين ٍ فاض من جمر الضلوع العوج..
غ ص ب.. ع ن ي..
لو أتندّم!!
(أغدا ً ألقاك)؟!..
وطول الوقت هَـ الغنّايه بفمي..
ولا ساقت رصيف لْمقطعة همي!!
بانام أرجوك..
تعبت مْن الكتابـه لْشيّي.. ما يقرا
و لا لحظه عليه أطرا..
بانام أرجوووووك.. يا..
د
مـّ
ي
!!!!

/

[جمال الشقصي]

\
أبا اسألني:
وهم ما قد طروا حالك
وهم ما قالوا..
شـ احوالك؟!
علامك تملي الشنطه لُعَب وعطور؟
هدايا من خزف..
وطيور؟!
علامك لا ثقل وزن الحقيبه..
ترمي نعالك؟!
علامك لا كثر فرض الضرايب..
تدفع وتدفع؟!
وتعلم ينطرك صاحب؟
بني عمك؟
أو أخوالك؟
وتعلم بالمطار أحدٍ تذكّر إنك بترجع؟!
أباسألني:
أحد كلّف جيوبه تشتري زهره؟!
بلاش الورد..
أحد مستأجر الأجره؟!!
عشانك جيت لديارك.. ولـ عيالك
أبا اسألني:
بلاش إنك تقول.. وتهـذي.. وتسأل=وخلي فْـ(بالك بْلادك).. ولا تشره
ترى هو أضعف الإيمان لو توصل..=ولا فـ بيتك غريب استأجر الحجره!!

/




:
ونقطة
(.)

/