لـ خـيـانـة الـتـوفـيــق

[جمال الشقصي]

:
:
:
:



شوارع ضيق
يحالفها كثير خيانة التوفيق
والنور يعميها
والشاي
والعمّال
يزعجهم الإبريق!
مادام تضحك نكسة الطالع
لا تضيق يالشارع
ما بالنواحي ناس
ما يْباع في الدكان..
غير أغطيه واكياس
لا أحذيه وامواس
لوجوهنا عكاز!
لرجولنا قالع!
وما احدٍ أبد طالِع
لا تضيق يالشارع
فـ بيوتنا للضيق
نطبخ مدامعنا
نفطر مواجعنا
نتغدا ماي إبريق
ما ننزل الشارع!



:
:
:
:

[جمال الشقصي]

:
:
:
:

لا تضيق يالشارع
بستاننا مقلوع
لا سور لا ممنوع
إدخَل نواحينا
فتش جيوب الجوع
فتش مداخلنا
ما يتسخ مدخل
قرّب يَا شارعنا
سجادنا من طين
ما نفرش المخمل
لا تْخاف يالشارع
دوس اللي نايم أمس
دوس الحلِم بالشمس
باجفاننا نطالع
بس ما نشوف اليوم
ولا ندري وش هو أمس
إدخل منازلنا
لا تخاف يالشارع
كل المنازل ناس
بهدوم محروقه
باحلام مدقوقه..
بس طايح الإحساس!
لا تضيق يالشارع
هذي منازلنا
من طولك الفارع!!

:
:
:
:

[جمال الشقصي]

:
:
:
:


علمني يالشارع
هذي الوظيفه بـ كَمّ؟
وكم في الوزاره عم؟
كم خال له مكتب؟!
وكم صاحبٍ كذاب
ما فكّ فمّ كْتاب
صارت فلوسه داب..
يلدغ قناعتنا!
علمني يالشارع
كم نشتري هاناس
والكل بايعنا..!
لا تخاف يالشارع
ما نحمل المفتاح
لا باب.. لا مصباح
فـ بيوتنا للريح
يا سيدي شارع!
والله يالشارع
ما نعرف نواشي
كل الأسى ماشي
ولا نحاسب البقّال
إحنا خلقنا ننام
واعمارنا تنشال..!
ندفع ونتسلّف
نتسلّف المقرف!
من هالرغيف الحاف
من شمعةٍ تنخاف
والله يالشارع
ما عمرنا كَلنا..
غير الجشع في عم
غير الطمع في خال
لا تخاف يالشارع
ما هي مناجلنا
ذي صورة الأحفاد
وعيالنا الأوغاد..!
يوم اعشقوا هالأرض
وكل عام طالِعنا:
وش في المآقي غير
ركعة ندم للعرض!!
يا ليت يالشارع
ما نوّروك فـ يوم
نورك يأذينا
يحفر مآقينا
من خطوة الطالع!


:
:
:
:

[جمال الشقصي]

:
:
:
:




يا عم.. يا شارع
ما ودنا باحلام
ولا نبغي نصارع
فينا المرض كافي
وما حد وفا أكثر
من جوعنا الوافي!
لو تدري يالشارع:
نشعِل أصابعنا
لاجل السهد يمشي
ويوصل مضاجعنا
جدراننا يا عم
ما هي موانعنا
جدراننا الإسمنت
من قصرها الفارع..
تتزوج الشارع!!
:
يا عمنا الممدود
ليت العرى موطن
ليت الجلود حدود!
كم طاحت العمّات
كم أم ما تدري..
من هو ابنها اللي مات!!
يا عم يالشارع
خلك لصوب الكل
ما به هنا مخلوق
يحتاج للسارق
كل القبور حقوق
وكل المرض وافي
وبعض الأمل حارق!
لا تنشغل يا عم
في البيت والا فيك..
ما يفرق الشارع!



:
:
:
:

[جمال الشقصي]

:
:
:
:



تذكر يَا شارعنا
عن صاحبي الشاطر
يومٍ كتب مره:
ما في البلد من شرّ
ما في البلد قاسين
ما كان أبد شاعر
لكن بصوته دين
كم ينفي.. ويؤكد:
ما هو الوطن: مهجر!!
:
يالشارع الأستاذ
علمتني أكبر
عكس الشجر
ش
ح
ا
ا
ا
ذ..!



:
:
:
:

[جمال الشقصي]

:
:
:
:


ما به جديد..
كنت القرى..
أو صرت غابه من حديد
يالشارع انْت أدرى
احنا نظل بعيد
ما نعترف بالبيت
لا غاز
لا كبريت
معبودنا العيشه..
في حفرة التنكيد
نكّل مثِل ما شيت
لاحفادنا طالع
يحلم يجي الشارع!
:
يا أرض.. يا ميلاد
يا بايعين السدر
من هو اشترانا نصل..
يذبح ثرى وبْلاد؟!
لو كلنا جعنا
وخارت عظام الخبز
ما اقول يا شارع
إنت السبب في الموت
با قول أنا للموت..
يا عم.. تفّّ..
وطزّ..!!!


:
:
:
:

[جمال الشقصي]

:
:
:
:

يا صاحبي الشارع
كلمني عنْك أكثر
عن خطوة المشراق
لقروش تتسارع
لـ كروش ما تصغر!
يا صاحبي الشارع
لي نظرةٍ وآمال
مزروع أطالع وجهك مْن الصغر
أقرا تفاصيلك
واسمع مواويلك
صوتك مزابل توت
توتك جنايز فقر
ياللي ظلامك صوت
يزهر بظلم أبيض
وصبحك غدا ليلك!
آطالعك مـِ المهد:
وادري انّه الخباز:
حارس مجاعتنا
وادري إنّ سعر الغاز:
يكفي يراعتنا..
تغزل حرير الباب
تطلي لنا الجدران
بخيوط مقطوعه!
يالشارع المكنوس
مثل الفقر.. بـ فلوس
وش حال باعَتنا؟!
باعوا العنب والتوت؟!
يا هل ترى:
باعوا مساميري معَ التابوت؟!
وش حال طاعتنا؟!
هي بعْدَها يالشارع فْـ محراب..
تغسل رصيف المغفره بالدمع
تكوي نواصي الكافرين بطاعةٍ والسمع؟!
تتبتل الأبواب
تنفخ سموم الغاب
تكفخ بجنحٍ كل ريشه.. داب..!!
يالشارع الضيّق:
ما بالنواحي ضيق
واحنا كبرنا ما نْتأمّل حلم
في خيانة التوفيق!
يالشارع الغنّاج:
من كاعبك لغناية الأسياج..
إرقص يَا شارعنا
فـ بطوننا بعنا..
ولـ بطوننا جعنا..!
يالشارع المحمود:
كل السكيك أقراب
كل النواصي حُب
كل أرْصفتْك بيوت
وخطوطك البيضا
وخطوطك الحمرا
لابوابنا..
أبواب!

:
:
:
:

[جمال الشقصي]

و
تدري
يـَ
شارعنا
:

البارحه.. عنق السؤال الضالّ.. خان المشنقه=طاح الصليب/ تلقّفته أعناق من تحت السؤال!
لمّت ليَ الشمس الأخيره نعْل عيد مشققه=لبّستها جوز الحمام الميت فـ بيتي ليال
كانت على سطح البيوت أبواب حب مطلّقه=صارت سطوح بيوتنا رمله من زجاج الضلال!
:

أو تدري يالشارع:
هذي البيوت أصحاب
مرجاحه تلم الثياب
يوم أكثر الجيران مثل أمي وابوي الطيبين
يوم إنهم عاشوا على موتة أخوي موطّنين
بالحزن والغفران
بالدمع والخذلان
والله يالشارع:
هذي البيوت أوطان
لا يمكن تهاجر
أو يمكن تغادر
هذي البيوت ألوان
من ضيقنا الفاجر!

:
:
:
:

[جمال الشقصي]

:
:
:

يالشارع الفارع
يا خطوة الأبرار
يا الما..
يَا كوب الطيبين
يا المنسكب فـ حلوقنا مايٍ حزين
تدري عن الأخبار؟
البارحه:
شفتك من الباب القديم
وامعنت بالشوف اليتيم
شفتك مشيت
وفي ظهرك المحني شجر
وقلوب ناس مْن الغجر!
شفتك سكيك تثور بامثالي.. فقر
يالشارع الوافي القدير:
من هو اللي جابك حارتي؟
تمسح ضجيج الروج بشفاه الحبيبه.. جارتي؟!
من أمّرك تخلي الحمام
تنهي المدارس قبل لا يبدا مع الأطفال عام؟!
يالشارع الحاني الأثير:
طيب.. باروووح
بس اترك بمرجاحة الأصحاب لوح
شيل الحبل
شيل الحديد الملتحم
شيل الظلال
شيل الهوا
بس اترك اللوح الخشب
كنا على هذا المكان
ياما نحبّ
ياما حفرنا بالاظافر حرف عيّا ينشطب
يالشارع الفارع ثوان:

بنتٍ تطاير شالها للصبح عطر وزعفران=لا تحرث أرجوحة صباها اليوم.. واتركها تلوح
إن ما كفاك أدفع حياتي لاجل لوح السنديان=بادفع لك رقاب الأهالي كلهم.. لعيون لوح!

:
:
:
:

[جمال الشقصي]

:
:
:


يا مالِك الحَيّ الجديد
كل عام وفلوسك شجر
كل عام وعيونك على مرأى الحديد!
والشارع بحوزة يدِك..
لِفّه هنا..
لفّه بعد لحظه هناك
الشارع أصله مسبحه
موجوده بيمنى الـ كبير
ومعقوده بكف الـ فقير!
:
يالشارع أبهى عن زمان
اليوم بضفافك بشر
ما عادت تضفك شجر
واليوم بظلالك حديد
لا شايب يمرّك ولا طفل الصباح
سيارتك هِيّ الوحيد..
اللي تكحّ وتنتحب!
تنبح على مرأى المطر
تكنس عوادمها سواليف الزهر
يالشارع بحيٍ جديد..
مزحوم..
لكنك وحيد!..
برجول تحملها الغجر
تسحب سلاسل من نباح
وجهٍ يجي
وجهٍ بظل الحِسن عيّا يلتجي
هذي ملامِحْك الجديده يا القديم!
:

يالشارع الغرّ أسألك:

وش تبيع الناس بك غير الدخان؟=وش شرَت من ضفتك غير الصديد؟
كلّ عام.. وذكرياتي صولجان=يحكم بذاكرتي ضحكه من حديد!!


:
:
:
:

[جمال الشقصي]

:
:
:
:


توفاك الأجل.. وانت الذي تتنفس وتجري=مَا احس بْك الربيع إلا زجاجة عطر مكسوره
ألا يا سيد النعمه.. ألا يا الشارع المغري=نباحك هو صباحك لو كِستْك عقود مشهوره
تلاطفتك كثير.. ولا عرفت أكرهْك من صغري=أباطلق لك من الليله جزيل الكره وحقوره
على اسفلتك.. واحس اني على رمل الخراب أسري=على ضفاف الشجر ما ادري نباح كلاب مسعوره!
تصدق: كثر ما اشوفك قصيده من لظى فكري=شِنِق معنى الحروف ومات نابغْته وطاغوره!

:

وابا كتب لك..

ترجّاني

:
:
:
:

[جمال الشقصي]

\

تصحيح:

شنِق معنى (القصيد) ومات نابغته.. وطاغوره

/

[جمال الشقصي]

:
:
:


يا شارع الحيّ القديم
يا شيما..
يا نوره
وسعاد
يا أم ريم
يا عْيون شيخات الحريم
يَا عيال سكتنا الرمل
يا بيوتنا اللي راحت بكيسة صبخ!
يا طين ما عمره اتسخ
أذكر ثقوب سطوحنا
يومٍ تخر الما على رووس الجميع
تثمر حصايرنا ربيع
وبالحوش ما تزلق عجوز
حتى عكاكيز الكبار
باول نفاف مْن المطر تجري.. وتفوز!
أذكر حدود الشارع اللي ما يشاف
لاجل (الكره) تجري معك
لا خوف من (تاير) يدوس بإصبعك!
يالشارع اللي ما تشوف
جزيتنا ذكرى اللعب
وجزيتنا واحنا وقوف!
وين أقدر اليوم أنعشِق؟!
من وين أحب؟
أو قول من وين الشعر؟!
والحب
والشعر
وغلاي
ما اتحمله وسط الشقق!!

:
:
:
:

[جمال الشقصي]

:
:
:

زهب شاي الْمُغَرْب/ الدافي/ المتشرّب النعناع=تقول أمي: جمال اشرب معي لاجل المسا يدفى
تقول: ودمعتي وجهٍ توكا جفني الملتاع:=أنا يا امي عجزت أشرب سوى من دلة المنفى!

:

وافضفض لك عن الشارع
عن الممحاه
عن (البلدوزر) الأصفر
وطفلٍ شاربه يكبر
عن (المتر) االذي قاسوا به عيالك
وانا بالذات
يومٍ حددوا بالفوت له منفاه!
أباحكي لك عن الشارع
وعن (ليلى) الصغيره وقلبها الفارع
واخوها يومها تمرض..
يقول اليوم ما تطلع
يقول الموت في (ليلى) لقى مضجع!

:

وباحكي لك..


ترجّيني!


:
:
:

[جمال الشقصي]

:
:
:

نعم يا امّي..
وحيدك كانت الرمله بداياته
قصيدتْه وحكاياته
على التربه
بدت سيرة شعر ذاته
واغني لك:
إلين مْن البكى تصحى شوارعنا
واغني لك:
ولا تلقين مما غنّته روحي منافعنا..!
واغني لك:
وادوزن شارع الحاره بحنجرتي
نشاز دموع غرقى بالنحيب البكر
وانا ادري ما يقوم البال
لاجِل تصحى قرارة فكر!!
:

على صبح البيوت اشتقت أشخبط بالفحم قلبين=كثير اشتقت يا امي أطعن القلبين بسهامي
رمالي نهر/ وشقوق الجدار آحسها بنتين=تسلل عطرهن قبل الغبار بدفتر أوهامي!!
قصيده كانت السكه/ وجيراني سلال التين=قطفت مْن المعزه وسطهم ما خانه إلهامي
علامك ما تبين أبكي وانا عيني مَا عادت عين؟=غدت لحظة عمى الذكرى بعيني.. تطرد رْهامي!




:
:
:
:

[جمال الشقصي]

:
:
:
:

وآطيّر الشارع..
سربٍ اغنيات وصبح
ما اقول هذا قبح
ولا اقول ضجة ليل
يا امّي تعبت أحكيه..
كذبة عطور جداد
يا امي تعبت أهذيه..
وآغير بْطاريه
وآقول مثل الكل:
هالشارع الفارع
نخلة صباح أعياد!!
:
والله يالشارع
ما اعَرْف أكذّب عين
عيني مَا هي للناس
ولا هي تطالعني!
عيني لو تشوفك
من جلدي المقلوع
جايز بـ تقلعني!!
عاد انت وش يعني:
لو جات منْكـ أعواد
وكبريت ليلة برد
صدقني لو أشعِلْك
ترمَد ثياب جْداد
صدقني لو أدفاك
جايز يطير الصبح
جايز يقوم الموت
ويعمّر بشبّاك!

:
:
:
:

[جمال الشقصي]

:
:
:


صباحك خير يا جدران حارتنا=مساك أطياب يا بيبان جيراني
فْـ ..بيت جْديد ما يشبه براءتنا=أعيش اليوم حرّ بقيد سجّاني!
تقل بابي يصيح: اشتقت جارتنا=تقل جاري الجديد اشتاق لاكفاني!



:
:
:
:

[جمال الشقصي]

:
:
:
:


أو قول هالشارع:
يكره يشوف أحباب
ما يفهم إن اللي رْكضوا:
طاحوا بْسلال أعناب
يا نورتي:
ما كنت أقولك من ترف
لا صحّ
لا عزّ
وشرف
كنتي تجيني من شوارعنا التراب
خلخالك الصادي ذهب
وحجولك الفضه مهب
وان بان مكعوبك تقل حفلة شهب!
كنتي تدقي الباب من سور السكوت
وآجيك للشارع حبي
ما اشيل لك خام وعِبي
لا ورد
لا شلت لْعبي
جيتك مثل هالشارع الحافي وحيد
مليان باشعار تْهبي!!
:
لكنها أشعار
رغم الضياق بشارعي
كنت أكتب عيونك بلاد
وغبار حارتنا عبير
يا نورتي لو تذكرين:
كل القصيد الباير بعينك حصاد
زهّبْت به ثوب العروس
وجهزّت مهرك بالورق
لا شغل
لا كذبة عرق
جيتك بلا حزمة فلوس
كل القصايد طرحتك
واحزان بيتي فرحتك!
ما كان هالشارع جدار
ولا كان رمله من حديد
كنتي إذا ضاقوا هلِك
وما لاقوا الخبز العفِن
خطّيتي بايدك في رمال الشارع:
إطلع ما اخبلك!!
لا تاكل وبيتي يجوع!
إياك تبلع لقمتك وآنا بطن داري يْهَلِك!
إياك.. تاكل والف عيب!!
ونقول أيادينا رطب
ونقول ناكلها ونطيب!

:

يا نورتي:
هالشارع اللي رتبوه
وبالورد
والأشجار ياما رتلوه
والله ما احسه لاحد
يا كثر ما فوقه أحد
وعْجزت أشوف بزحمته..
لو ربع واحد من أحد!
وينك؟
تجين نبعثره..
ونعاود لحارة شغبنا (ندفره)..!
وش رايك أنوار الشوارع نعتبرها خاتمك؟
والأرصفه وقْع نْسِمِك؟
قومي نقول الجسر هذا.. مع هذاك:
روجٍ سقط من مبسمك!!
:
يا نورتي..
لو تغمضي عينك عنَه
مادام ما هو من رمل
هالشارع بذكرى الحواير نسجنه
ونقول ما به من حديد
لا اسفلت
لا سكة حديد
وَلاَ نِقول بْيوتنا صارت بعيد
إنتي..
وقولي البيت هذا به أنا
وآنا أقول الأرض
كل الأرض
وجهة نورتي

:
:
:
:

[جمال الشقصي]

:
:
:



يا حارتي:
قولي لشارعنا الجديد
ما عادوا عيالي هلِك
و(ليلى) وسط لحد الممات
كِنّ أوْصَت صغار الحواير تجهلك!
يا حارتي..
رتبت أنا البيت الجديد
ولوّنت جدرانه من دهانٍ وحيد
لكن تعبت أستقبله
عيدية أطفالٍ حبوا
أو عطر في شال البنات
والله تعبت أستقبله..
لو وهْم.. عيد!
:
:
يا حارتي:
وش حال شارعنا التراب؟
واطلالنا برمل الخراب؟
وش حال خطوة فجرنا
للمسجد بساعة ثواب؟!
:
يا حارتي.. صار الكلام
كنّه جبل
وصوت النشيد اللي تعلكته سنين..
عاقِد على لساني حبل!
:
يا حارتي..
هالشارع بحيي الجديد
والله تمنى يمسكك
ياكل غلاك ويعلكك
يطلب يديك ويشبكك
عاجز يجي بثوب الزفاف
مادامت أرْصفته حديد
والزفت الاسود مو نفاف..!!


:
:
:
:

[جمال الشقصي]

:
:
:

يا حارتي الظلمى.. باروح
بعض المآذن كافره
كل المشاوير البريئه ناب في خصر الطموح!

:
:
:
:

[جمال الشقصي]

:
:
:

يالشارع المهدوم
كل النواصي لك قصيد
والذاكرة صوبك.. تحوم!
تْصدّق إني في الشمال:
كل ليل.. في حلقي الجنوب!
كل صبح.. أغرغر قلبي بحبك.. واذوب
أغسل بذكراك الحديد
والشارع بحيٍّ جديد
أكتب لك رْساله قبل لا اغفى وانام
واقول يا جدراني لو تترجّلي
عن سور.. عن غرفة مبات
وآنام في ذكرى البنات
اللي ركضت مْن الطفوله بشالهن
وطحنا بجميع الذكريات
بالشنطه..
بالثوب القديم
بالخبز الاسمر.. والشتيم!!
بالباص قدام البيوت:
لما يمر غبار حارتنا غبش
ويصحّي الطلاب من بيت ونعِش!!
:

يالشارع بْحيّي الجديد..
لا ما تعبت أتأملك:
ليش انت بعيوني الوحيد؟
وانت الوحيد اللي اجهلك؟!!
:
:
:

[جمال الشقصي]

:
:
:


الساعه خمس.. إلا رِبِع
محْدٍ طرق بابي
واخوي محْد تذكّره
العاده عصرية زمان
الساعه خمس إلا رِبِع
نلعب كره!
:
يا لون من زفت وسواد
أدمنتك العصر بمسير
طفتك مع الليل الأخير
طرتك تقل عصفور مشتاق الشُّرَف
أو قزةٍ تنعي الحرير
يوم انحطَب فرصادها..!!
للسوق للمقهى الرخام
رحتك وجيتك طول عام
كني ولا مره خرجت
كني فـ بيتي بطول عام!
:
:
:
ما جيت أباطلب حارتي..
بس (سارتي)..
تطلب رمِال ألعابها
و(شيخه) تخاف ثيابها..!
ياللي سرقت رجولهن
ضيّعت رقص حجولهن
وعلّقت هالثنتين دمعه للصباح:
تبكي على مريولهن!
:
:
:

[جمال الشقصي]

:
:
:
:

يا شارعي:

:

ما على الأوطان شرهه.. يالمقام=يسجن الله النبي في بطْن حوت!*





* أحمد السعدي: من نص ـ سكوت
:
:
:
:

[جمال الشقصي]

:
:
:

يا امّايتي:
ما ابي الحديد غْنايتي
مشتاق أقول إن التراب:
خصلة زهور مْن الشفق
محتاج أردد للتراب:
لا ثوب بالفقر انفتق!
محتاج أعمر هالتراب:
صوتٍ من الشعر انطلق!!
يا امّايتي كان وْلدِك
لا مرّ سكة صاحبيه..
يترك على رنة جرسهم عطر اديه
اللي من الخبز العجوز
باقي يفوح بوالديه
يا امّايتي الغربه بلد؟
والا البلد سجن الطريق؟!
مليت أرتب له سكيك الحاره الأولى شعر
واهدي له عيوني فجر
وشفاي له حزمة نصر
يا امّايتي وش ما عطيت؟!
واللي خذيت:
شارع سواده مو كحل
شارع على عيني انقفَل!!

:
:
:
:

[جمال الشقصي]

:
:
:


و
و
و

واقود الأرض.. للشمس الوحيده=واعلقها على نجمة سهادي
خبزت تراب حارتنا الجديده=وذقت رْغيفها كحّة أعادي!
سعل صبحي قبل حبر الجريده=من أخبار البيوت اللي بـِ غادي:
تلوح أسوار جيراني البعيده=واقرّبها.. والا قيها سوادي!
أنا يا امّايتي ما لي قصيده=ولا لي لهجه تخون المبادي
أنا يا امّايتي الجمله البليده:=بلادي.. يا بلادي.. يا بلادي!!

:
:
:
:

[جمال الشقصي]

:
:
:

فـِ شارعنا..
صباح النور جايعنا
مساء الخير يخدعنا
فـِ شارعنا بريق الما:
يصب مْن الشجر عصفور
مْبلل بالأديم البور!
فـ شارعنا الجديد تباع معشوقه
أبد ما تلبس إسواره
بلا كوشه
بلا كفٍ بحنا الحب منقوشه
فـ حارتنا الجديده تباع معشوقه
هي الحاره!!
:
:
:

[جمال الشقصي]

:
:



شهرين ما زرت المكان
ما رحت للحاره الجديده يالطريق
ويمكن مَا اروّح للأبد
ما لي علاقه بالدخان..!
ما واطِن الغابه الحديد
شهرين يا وجهي على المكتب ذبلت
من وحدتي البكمى انقتلت
لكن حييت:
مادام ما حولي شوارع من سواد
مادامت الرمله تلوح بناظري..
يعني بقت ريحة بلاد!
:
:

قريب البحر.. والمقهى على بعْد أربعة خطوات=وانا ما ارشف دفا قهواي غير بشايب الحاره
تقل هالشارع الممدود ـ مرود ـ يكْحِل اللذات=تصدّع من فحيح الناس قلبي.. واختفت ساره!
يَـ/ ساره: ما قوى خالك يرتب لعبتك بانصات=يَـ/ ساره علمي شيخه.. رفضت (القار).. محاره!!

:
:
:

[جمال الشقصي]

:
:
:


يا أميره..
تذكرين الصبح من شنطة صباحك؟
يوم يتدلى كتاب الدين من دفتر صياحك؟!
تذكرين الحاره السمرا بشَعرْك؟
لا تدلى (عقصك) بمشهات ظهرك..
كنه المرجان بان
كنه الباب المؤدي للزمان
اللي ندخل منْه لبلاد السنابل
ما نشم الورد الاصفر
غير في شتلة مزابل!
تذكرين عيون جارتنا الكبيره..
يوم تجلد صدفة الطفلين بالنصح الحرام!
يومها تذبح صفاصيف الكلام؟
تقطع النفنوف فيك
وترقع الملقوف فِيّ..!
ما تخلي بشفتك نبرة حمام!
وتذبح بفمي الرغيف
اللي جبته من صغر سني على هيئة نزيف!
في نصوص وخاطره
في الكروم اللي تدلى من غباء الذاكره!
تذكري فرصادنا؟
يومها ما كان ينبت من ثمر
واثمر لخاطر أسانا.. بلادنا..!
:

يا أميره..

دمع.. ينما في المحاجر ما يموت=لكن الرجّال موته دمعته
لو بكى.. تنفيه نخوات البشوت=وان سكت ترفض سكوته سمعته
كلما شمع الرضى شبّ البيوت=شفت مقبرْة الأوادم.. شمعته!

:
:
:

[جمال الشقصي]

:
:
:

وأصرخ يـ ..شارعنا
إطمي بزِفْتك كل سكه تصدفك
إمحي الدروب
لكن بذكرى الفقر لحظه.. راعنا..!
امحي منازلنا اللـِ ما قامت أبد
كانت ثلاثينٍ تطيح
كانت على الضعف المؤبد تستريح
لكن كثر ما هي تصيح:
كانت بلد!


كانت شقوق/ ضيوفها الغربان.. وغبار الزمان=تهوي على مد الثلاثين الطويله.. وما تطيح!
لو قلت لك كانت مخازن موت.. والعز المهان=لكن ورب الكعبه كانت خير عن هذا الضريح!!

:
:
:



:
:

[جمال الشقصي]

:
:


يـَ .. اصْدقائي
:
وانتوا أدرى الناس في قمة غبائي
يوم أنا ناسك عن الفوضى وشغبكم
عن لعبكم
عن دروب مغازل عيون العذرارى
و
آآآآ
ت
و
ا
ر
ى
خلف قضبان انتمائي
منغمس للدم في راية ولائي
ناسكٍ صوفي بالاعراف البليده
والتقاليد الشريده!
لا حكي يربط مَا بيني والعذارى
مثلكم يا أصدقائي
:

والله اني يا اصدقاي
ودي قلب الحاره ينبض من جديد
أرجع لعشرين عامٍ من وراي
واطلع بقيظ الجزيره للجهات
أطلب عيون البنات
واغسل رطوبة خجل وجهي بـ ..بنت
صوتها منديل يمسح قول: هنت!
وآتموسق في نصوص
ناحفه بالشِعْر/ ثقلانه فصوص!
:
ودي كفّ الحاره يقطع هالحديد
يرجع برملٍ جديد..
يـَ ..اصدقاي:

كافر مْن اليوم بالصوت المجيد=لا ولاء بدمي.. لا صوت انتما
يا ترد الحاره من أرض الحديد=أو خذوني العمر لسجون السما..!

:

[جمال الشقصي]

:
:
:

قلت أنادي بالرمال الهاربه=صوتٍ مْن الوجد يغتال الأرق
يحفر الحلقوم ناي الغاربه=وآتدوزن قبل صوتي بالغرق
بَشّ.. لكن الحنايا ضاربه=في حضيض الياس/ واللحن احترق!
ليتها يا تاج راسي خاربه=كنت أقوّم بيتي بجدار الورق
ولو سنين الباب عمْر مْواربه=العمُر فينا من التيه انهرق..
من حياة الموت جينا عاربه=دام قدرك عن مهانك.. ما فرق
وش يرد اللي فتل لك شاربه=وانت مسروق الثرى حد العرق؟!
يا كثِر ما قلت ياصل قاربه..=للمرافي.. وقارب الشمس انسرق
ماي.. وش به ينهرق والنار به؟=كلما اطفي شبر.. شبرٍ يحترق!

:
:
:

[جمال الشقصي]

:
:
:


وانت وش لك؟.. والتعب؟ والجوع.. والخبز الحرام؟=وانت وش بك تنتظرني لا ندمتك.. نتفق؟
الشفق يا سيدي الغالي مدافنْه الظلام=وانت لازم تعترف باجداثي فـْـ ..طلقة تفق!

عشت أداري الفقر بظلوع أجودي خانه مقام=يوم تفسير المقام: رْقاب تخضع للرّفِق
يا توابيتي باشيلك قبل لا ادخل للختام=ما قبلت الرمل عزوه تنتخي بي للنفق!
يندفن سري بأيّة أرض.. ما عندي كلام=لكن رْقبتي تحضْن الخاتمه باوسع أفق!

:
:
:

[جمال الشقصي]

:
:
:

واقول أمي.. سلامتها.. بْسلام الأرض=يطيح الكل.. ما اطَيِّح مقام أمي
خذ الحاره بما فيها.. وهِدّ العِرْض=ولكن: تعجز أمٍ جابتك.. خمّي!!

:
:
:

[جمال الشقصي]

:
:
:

للفقارى.. للطفوله.. لليتامى=للشعِر من باب تعْزِيةَ المآقي
للخضوع.. بأمّ محشومه ترامىَ=عشت ما ارضى فـ ..امّهات أغلى رفاقي
ليش ما احب الفقر دام آتنامى..=من صغِر سني.. على وهم انعتاقي؟!

:
:
:

:
:
:

[جمال الشقصي]

:
:
:

يقول البيت:
من جْداد الأهل.. ملّيت!
شوارعهم بقايا زيت
عفن فضه
وبكْتِريا ذهب وابراج
فلوس تروح
قروش تْغَدْي
ولكن البلد باسياج!
:
:
يقول البيت:
جمال أحتاج لكتابك
لنصّ الشعر يوم يْحَكْي بادراجك
وحيدٍ.. شاعرٍ بالكل
تحس بشجرةٍ طاحت.. باقاصي الغرب
تحس بدلةٍ تنكَبّ
ولا حس بظماك إنسانه تحسّك
ولا حسّك..
أبوكـ اللي دفع للمدرسه درهمْك
ولكنك تعيش تحس
بظلم أحباب
بنسيان الغلا اللي ما صِدَق.. واوهمْك!
تحس بمزبلة جيرانك الوافين
تحس بعنجهية طين..
تحس الكل
ولا حَسّ بصداقتْك الحميمه باب!
:
:

يَا حارتنا:
وش اللي باكتبه بفراق جارتنا؟!!
:
:

[جمال الشقصي]

:
:
:

يا كثْر اشتقت حارتنا
منارتنا
دواير من ضحى يكسر جبارتنا
ولا نوقف
وتوقف شمسنا الجردا
برز الباب واتردّا..!
ظلامي:
يا مسا شارع..
صباحي
يا الضحى إسفلت
طلبتك يا الحديد وبالجواب بْخلت:
وش يواسي بكى الحاره؟
من يعزي حزن فرقاي..
من اللي يعتكف في قلبي اللي خان جارتنا..؟!

أيا ربي:

شـَ ..اسمي نبضتي لا خانها حبي؟!

:
:
:

[جمال الشقصي]

:
:
:

يـَ ..ساره للتراب المخمليّ/ الأبيض/ الجذاب=باسرّح وجهك النازل من عذوق البراءه ديم
واقول: الرمل مفرش ذكريات الصبح للأبواب=إذا الظلمى غدت وجه الأوادم/ واللغه تقسيم!
باقودك لاقدم سكيكٍ خذتني للعذارى بـ ..آب=مراهقتي التي تحرص عليّ أكثر من التعليم!!
أنا يا سارتي هذا الدفين بحارة الأصحاب=ولو ما جاني مْن أصحابي إلا نعمة التقزيم
باقودك.. وانظري وش هي نهاية رملي التواب=كأن اللي سجد متيممٍ به.. واشيٍ/ نمّيم!
:
: